THUVÂRHAI 24
24
-19-
1Mi siahai irzuk no’n lân, anni leh rual irchang tum no ro. 2An lungrîla buaina siam vai an ngaitua ngaia; an bâiin mi ningthikna thu vai kêng an insîr ngai.
-20-
3In chu vârna le inhriat thiamna lungphûma sin indet a ni. 4Inhriatna omna kipa in sûng tentan tinhai chu thil hlu le enhoi takhai irvôtir a ni ngai.
-21-
5Inhriatna nêkin vârna a sa uala; a ni, hrâtna nêkin khom inhriatna a poimo ual. 6Ni doi mân satakin lei irsiamirfôk bakin lân, lungvâr nang phua an tam dôr inhnêna chu chang ni ti.
-22-
7Intôhai hrangin thuvâr chu an hril zita; thu poimo insîr irhlôm zoro’n ite ti hrang tum nei ngai mah.
-23-
8Thil saloi ni phan maiin chu mihaiin buaina siam ngaitu nang ti an ti. 9Intô ngaituana chu sual a ni. Mi hmusit chu mi ihnuaisia an ni ngai.
-24-
10Lunginzîng nikhua’n ni’rzal chitin chu ni irzal ta tak a ni.
-25-
11Dikloi taka that hrang tâkhai chu inzôk lat ro. 12“Kei chu ite inhre ma ung” ni ti thei, Pathianin chu ni lungrîl tumna an hriata, a ivarh mai kêng. Nang a thîr chiana; nang an hriat zit. Ni sintho lam ang takin nang thuan nôk a ti.
-26-
13Ki nâipa, khuaihlutui in ro; a isa a ni. Ni mileia khuaithâr ata khuai a ithum angin, 14Vârna chu hringna hranga sa a nih ti inhren fel ni ti, vârna ni neiin chu ni sûnmaton ir-âng a ti.
-27-
15Mi siahai, mi fel in roka, a in la pe hranga khâr pe ngai mihai angin om no ro. 16Mi fel chu voi tamtak inrîl khom sianlân, a thoinôk mai ngai; mi siahai rêk chu siatna’n an irhmang ngai.
-28-
17Ni râlin siatna a tongin lôm no’n lân, an rîlin ni raiinfânin ir-iam no ro. 18khano’nchu Rengpa’n nang hmu a ta, lôm no nia, a chunga tôkhmol an inlek itinin.
-29-
19Thil saloi sintuhai sikin ni beiindong no’n lân, annihai kha irzuk no roh. 20Mi siahai chu sûnmaton tûng hrang nei mahaia, an meiser chu thatpai ni a ti.
-30-
21Ki nâipa, Rengpa chin lân, rêng kha mahrip tho ro. Anni doia irhel mihai chu irthoppui no ro; 22Khaanga mihai chu irningloiin irhmangin om an ti. Pathianin a ni no le rêngin an chunga siatna an intung pe thei nin hriat mo?
Thuvâr danghai
23Hihai khom hi mi vârhai thu’nsîr a ni:
Roirêltu hrangin theibîk nei hi sa mah. 24Mi pualoi thiam changtu chu, mi tinin hnôl an ta, khua sâl an ti. 25Roirêltu, mi dikloi intuangtirtu rêk chu mi’n lôm an ta, irhming satna hlo a ti. 26Dik taka sâmtu chu rual sa a ni. 27Loimân nir fûktir diama, ni bingin irsinsiam thei ta ki tih ti nin hriat infel mâka chu dong tum no ro. 28Asan dik tak inhre loiin ni tualbôm chungchâng thu’nhretu ni no’n lân, ni bâi khomin huang no ro. 29Ki chunga a itho angin a chunga tho ki ti! a tho dân ang takin lei tho rong!” ti no ro. 30Mi thaboi laia ki fea, inhriatna nei loi mi irhuana ki chai vêla. 31Irngai ta, ilhling kungin a sip zita, hloi vai a oma. A’rhuan dâihai khom a chim rem ruma. 32Khahai kha ki ena, satakin ni ngaituaa, irchûna satak a nir hmu suaktira, ki pom ta. 33#Thuv 6.10-11 Ni nuamin chu insîng viatin lân, in viat ta, 34ni in kârin inriangna khan inru angin nang chel a ta, irsamna’n sipai angin nang hong de thut a ti.
Currently Selected:
THUVÂRHAI 24: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
