THUVÂRHAI 23
23
-6-
1Mi lian le khalâi nin otin, ni lungrîla tu mo a inih ti inhre mai ro. 2Nin thang ok khomin irkai viat ro. 3Fâk nêk tui tak nang a idohaia khan inruak no’n lân; nang huang a itum khom a ni thei.
-7-
4Irchong ringot tuma sôlhai hrangin vâr ro. 5Sum chu mitha irsiama vuangpat angin mit khapkârin vuangpat a ti; irmu vânlaizôla vuang ngai anga hin.
-8-
6Mi tiksia khalâi do ot no’n lân; a fâk itui dohai irzuk no ro. 7“Tho hong ro, hong fa ro” a tiin, a lungrîl taka ti mah. A ngaitua lam ang takin kêng a nina chu a ini. 8Ni fâk kha inluak nôkpai ni ta, ni thu thumhai chu chanlamboi ni a ti.
-9-
9Intô inhriata chong omze nei hril tum no ro; ni thuvârhai kha inhlutna lam inhre no ni.
-10-
10Tianlai ramri milui kha phêt viat no’n lân, farahai ram irchupuihai no ro. 11Rengpa chu anni sûnghualtu hrâttak a nia, nangma doiin an chungchâng thop a ti.
-11-
12Irchutirna tiang ni lungrîl pêkin lân, ni mikuar kha inhriatna thu tiang sung ro.
-12-
13Nâipang sep indîn no ro. Irchutirna khianghrolin zêm khomin lân, thi no ni. 14Khianghrolin nir chutirin chu thina ata a hringna inzôk thei ni ti.
-13-
15Ki nâipa, ni vârin chu ki lungrîl lôm tak tak a ti. 16A ni, ni bâi ata vârna thu kin hriatin lôm ki ti.
-14-
17Ni lungrîlin mi sualhai irzuk no ri se; Rengpa chitna hi ni hringnun thupui tak ni ri se. 18Khanchu ni sûnmaton ir-âng a ta, ni sabeina chu inboipaiin om no ni.
-15-
19Ki nâipa, irngaiin lân, vârin lân, ni hringna lampui ngaitua inthûk ro. 20Zu indu mihai le fâk indu mihai irpôlpui no ro. 21Zû’nrui mihai le rôlruakhai chu hong inriang tîr tîr an ti. Fâk le nêk zâl vai ni tho’n chu puanchet sil zôi zel ni ti.
-16-
22Ni pa, nang neitu thu irngaiin lân; ni nu kha a hong tarin hmusit no roh. 23Thutak chu irchôkin lân, thiamnahai le inhriat thiamnahai leh khan ircho roh. 24Mi fel pa chu satakin a raifân a ta; nâipa vâr neitu chu lômna nei a ti. 25Ni nu le ni pa chu inlômtirin lân, nang a neitu, ni nu chu raifân takin inomtir roh.
-17-
26Ki nâipa, ni lungrîl ni pe’n lân, ki hringnun hi ni enton ni ri se. 27Notizuar le nupang nghal chu thina châng ang an ni. 28Hrâtlâksonghai angin nang an irdîp chiana; mi tamtak irthiang loina an inthâk ngai.
-18-
29-30Tuhai mo chungrik ngai, tuhai mo beidong ngaia, tuhai mo ar khal ngai? Tuhai mo thubuai nei ngai, tuhai mo a bi om loia sâbe tuang ngai? Tuhai mo an mit cho khak ngai kha? Zû buala om mai ngaihai, zû induhai kha an ni. 31Zu’n nang a inthêm hrang phal no ro, a sen rak khomin, ar fi liai khomin, a ni no le a phûl but but khomin en no ro. 32A hnungkhôna chu mirûl angin nang inchuk a ti. 33Ni mitin thil irkhêltakhai hmu ni ta, ni lungrîla ngaituana fel nei thei no chi ni, fel tak khomin chong thei no chi ni. 34Tuikhanglian chunga zâl angin mani, irkuang puanzâr ngul sîpa om mani angin ni nih ti. 35“An ni zêma, khannisian ite lak inhre ta ma ung. Itho mo ki ihar thei viat loi? La in nôk mai ki inang kêng” ti nih ti.
Currently Selected:
THUVÂRHAI 23: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
