THUVÂRHAI 21
21
1Reng lungrîl chu Rengpa’n a zêka;
tui luangna iva korong a isiam angin a nuamna tiang tak an kôitir ngai.
2Mi tinin an omlam tinrêng hi anni mita chu a dikin an bê zit ngaia,
Rengpa’n chu lungrîla tum dân kêng a ivarh ngai.
3Irbôlna nêkin dikna le felna sin hi Rengpa lôm lam a ni.
4Mi siahai chu an irpâkna le an irsongna khan an lungrîl a zêka,
kha kha sual a ni.
5Mi takirtâi ngaituana khan neinungna tiang a pana;
mi thaboi rêk chu irsamna tiang vai a pan ngai.
6Dikloi taka irchon buk chu irhmang zôi zel a ta,
a zongtu hrangin thina a ni.
7Mi siahai chu an nunsiatna khan irhmang an ta;
thil sa sin an nuam no sikin.
8Thiamloi changhai lampui chu a kôi ngaia;
mi sahai lampui rêk chu a tûnthai ngai.
9Dôngma hrângsia le hmun khata inhoi taka om nêkin chu,
in sûng kilkhôra om a sa ual.
10Mi siahai lungrîl khan thil saloi a’rzuk mai ngaia;
tûte chunga lungkhamna nei ngai ma.
11Mi hmusit ngaihai dengintheitira an omin chu mi’nmôlhai an lei vâr ngai;
khan, mi vârin chu irchutirna a idong kha an hriat mai ngai.
12Pathian, mi fel khan mi siahai in sûnga thil om an hriata,
khasikin mi siahai chu irhmangtir a ti.
13Inrianghai chapna nir ngai no’n chu,
nang khom changpui innangin ni chapna irngaiin om no ni.
14Mi chunga a ning an murin chu dâihreka thilpêkin a milung insuai a ti.
15Roirêl dikin chu mi felhai an lômtir ngaia,
mi saloihai hrangin chu irhmangna a ni.
16Mi tukhom inhriatna dik ata invâi chu thina’n a nghâk chian ngai.
17Hringkhonhoi vai irzuk chu mi’nriang ni a ta;
zu le sa irngaiinna mi chu irchong no ni.
18Mi siahai chu mi felhai dengintheina hrang an châng kama khan an irpal ngai.
19Dôngma hrângsia,
chiar chian chian le hmunkhata om nêkin chu ramchâra om a sa ual.
20Mi vâr chu irchong tak le hoi takin a oma,
intô rêkin chu poisa a hmu le chu a hmang lat ngai.
21Dikna le lungkhamna neiin lân,
ni hring sôt a ta;
mihai mahrip le chôiirsângna dong ni ti.
22Hruaitu vârin chu mi hrâthai khopui a lâka,
an kulbang irnghatna khom an simtir ngai.
23Buaina ata irken ni nuamin chu ni milei vêng insa ro.
24Irpâk le irsong mi chu ar hming hmusittu a ni;
mi liana irbein irpâk takin sin a tho ngai.
25Mi thaboi,
sin zong nuam loi chu ama vai a irthat a ni.
26Mi thaboi khan sûn misa tâkin a inu nuamhai ngaituana vaiin kêng zoro a inhek ngai,
mi fel rêkin chu a pêka,
inhroi loi takin a pêk ngai.
27 Rengpa’n mi siahai irbôlna thilpêk chu a hnôla,
a bîkin lungrîl sual irputa an hong inhlana ni’n chu a hnôl ual ngai.
28Inhriatpuitu dik loihai thu’nsîr chu tûte’n iam no nia,
khannisianlân inhriatpuitu dikhai chong chu pom ni a ti.
29Mi pualoihai chu a sa anga inlang hi an theitôk a nia,
mi felhai rêk chu an lampui an rêl infel ngai.
30Mihriam vârnahai,
inhriatnahai le thiamnahai hi Rengpa doina a niin chu chanlamboi a ni.
31Sakor chu râl buala hmang hrangin le irsiam chian thei a ni ngai,
Khannisian inhnêna chu Rengpa ta a ni.
Currently Selected:
THUVÂRHAI 21: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
