THUVÂRHAI 20
20
1Zu in hi nuizabûr mi siamtu a nia;
zû’nrui hi invêtna a ni.
2Reng ningmur kha chi ro, kâmkeibaknei inhrûm ang kha a nia;
a ninginmurtir chu mâni hringna chunga thil tho’nsual a ni ngai.
3Intôhaiin chu irhal an phut ngaia;
anni lai ata irkêm hi irhming satna a ni.
4Sin mi irthaboi, a zoro taka irnêng tuk loi chu,
bu ât zoro’n a kut dô a ta,
ite nei no ni.
5Mihriam lungrîl ngaituana chu tuikhanglian inthûk taka tui ang kha a nia,
khannisianlân inhriat thiamna nei murdi’n thangsua a ti.
6Mi tamtak iamom irti inzen ni an ta,
khannisianlân, mi iamom tak tak nangma’n hmu’nfel tum roh.
7Mi fel, dikna nei mi nâihai chu râlvân sa an ni.
8Roirêlnaa rêngtoihmun khan a mitin thil saloihai murdi a khâipai ngai.
9“Ki lungrîl ki’rthiangtira,
ki sual ata ki’rthiang tâk,”
tu mo a ti thei hrang?
10 Rengpa’n vârna le irkhîna dik loi hmang mihai chu a hnôl ngai.
11Nâipangte lua a sinthoa khan a nina an langtir ngai;
nâipang sa a ni le ni loi a sintho ata inhre thei a ni.
12Inhriatna mikuarhai le hmu theina mithai hi Rengpa ni ipêk se seng a ni.
13Irtha inboia zâlthangdârin ni zoro ni hmangin chu hong inriang ni ti.
Sin tho’n lân fâk nêk irkhopin nei ni ti.
14Thil irchotu khan a man a hlu hrai a ti ngaia;
khan a kîr nôk tenin chu a man a irhniamtira khan ar pâk nôk ngai.
15Ni insîr kha nin hriat infelin chu rângachak le lunghlu nêka thil hlu ual ni inei a ni.
16Intô khualmi lâkai chunga mophurna la hranga chonginkungtu chu,
ama irchon khom bânda intung a ti.
17Dikloi taka ni ilâklût chu mihriamhai ta hrangin irzuk a oma,
khannisian inhnunga chu lungtehret bâr ang kha ni nih ti.
18Thil tum ni nei mân irhril irsakna zong ro,
irdoina ni siamin chu nang a hruai thei hrang mihriam sa zong ro.
19Chong tam mi’n chu thil irthup ip thei ngai ma;
khasikin mi chong tam hrai irpâlpui loi a sa.
20A nu mani, a pa mani, khua sâltu chu
inthim irsakhak hnuaia meiser that rip angin a hringna mong a ti.
21Irchon hi a phuta ol tengin buk thei zel ni khom sianlân,
inhnunga chu satvurna ni zit ual no ni.
22“Sual chu lei thuan zôi zel rong” ti no ro.
Rengpa nghâkin lân,
ama’n indiktir ving a ti.
23Inhriatna le vârna dik loi hi Rengpa mithmua intirom tak a ni.
24Mihriam lampuihai chu Rengpa inkung a nia;
itin mo mihriamin a hringna lampui a inhriat thei hrang?
25Pathian kuang thil nin hlan mân ngaitua bak ro.
Inhnunga nir sîr nôk itinin.
26Reng vâr khan thil tho’nsualtu kha chel suak a ta,
khonzâna boiin dengintheitir a ti.
27Mihriam lungrîl ngaitua theina chu Rengpa meiser a nia,
einia irthokin ite thup thei no ih.
28Reng kha satna felna le dikna’n roi a rêl kârka inlal a ti.
29Ruathartehai roiinpuina chu an hrâtna a nia,
tarhai mahripomna chu an lu chuak hi a ni.
30A kâra chu ei lampui fena indiktirna hrangin intakna tamtak irtem a nang ngai.
Currently Selected:
THUVÂRHAI 20: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
