THUVÂRHAI 19
19
1Mi, milak vai thoa lan to nôk nêkin chu,
mi’nriang lungrîl satak irputa om a sa ual.
2Inhriatna boia nuamna ringot khom hi sa ma;
milung inrang hrai mi chu buaina a tong ngai.
3Mi senkhatin an invêtna’n anni na nâk an siata,
khanchu an lungrîlin Rengpa an nuar ngai.
4Irchonghaiin rual tamtak an neia,
inrianghai rêkin chu an rual nei sunhai khomin an mâksanhai ngai.
5Inhriatpuitu dik loi chu tôkhmol tuang loiin om no nia,
milak chong chungirchuan chu zôk no ni.
6Mi tamtakin mi lianhai ditsakna dong an tum ngaia;
ditsaktu hrangin chu tinrêng rual sa an ni.
7Mi’nriang chu a’rzirpuihai lua khomin san nuam ngai mahaia;
a rualhai len vângin chu tûte hmu no ni.
8Vârna nei khan ama hringna lung a ithung a ni;
inhriatna neitu chu vânnei a ti.
9Inhriatpuitu dik loi chu kuttum tuang loiin om no nia;
milak tho ngai chu irhmang a ti.
10Intô chu hringnunhoiin om no sianlân,
suak khom rêng nâihai chunga irchamnei no ri se.
11Irngai thiamna nei mi’n chu,
a ningmur an suai thei ngai.
Mi tho’nsualna uksak loi hi roiinpuina a ni.
12Reng ningmurna chu kâmkeibaknei inrung ang kha a nia,
a ditsakna rêk chu satvur rua ang kha a ni.
13Nâipa into’n chu a pa hrang vânduaina an tungtir ngai.
Dôngma hrângsia chu itiklai khoma tui zung mai ang kha a ni.
14Mi’n a pa ata in le loi irchonhai a lua thei,
khannisian Rengpa tak ata vaiin kêng dôngma vâr chu hmu thei a ini.
15Ni nuamin chu nir tha inboi mai ro;
zâl mai ro,
khannisian phîngchâmin om ni ti.
16 Rengpa dân zôm indik murdi’n a hringna a ivong insa a ni;
a omlama irdîn loi rêkin chu thi a ti.
17Inrianghai san chu Rengpa a intângtir ang kha a nia,
a sintho sa chu Rengpa’n thuan a ti.
18Ni nâihai kha an la nâiinpang laiin sep ro.
khano’nchu, an irhmangna hrang lampuia changpuitu ni ni ti.
19Milung hrâthai ina chu tôkhmol a tong ngai.
Buaina ata ni kêlsua khomin,
la kêlsua nôk mai la nang a ti.
20Irchûna tiang ni mikuar ni sunga,
irchû ni nuamin chu mi vâr la hong ni ni ti.
21Mihriam lungrîla thil tamtak ngaitua om khom sianlân,
a hnungkhôna chu Rengpa lungdo sin ni a ti.
22Huatirham hi mualinphoina a nia;
mi minlakhai nêkin chu inrianghai an sa ual.
23 Rengpa thu zôm hin hringna an tungtira,
a zôm murdi’n lungchuk takin an oma,
thil saloi irkhum om ngai ma.
24Mi senkhat chu an bâia bu hong thun lua khom an rin ngai.
25Mi irsonghai tôkhmol tho a sa,
khanchu mi’nmôlhai hong irchû thei an ti.
Inhriat thiamna nei chu hrilin lân,
hong vâr a ti.
26A pa dengintheitira,
a nu inhnotsuaktu chu,
nâipa mualinphoina intungtirtu a ni.
27Ki nâipa, irchutirna ni mâkin chu ni inhriat tâkhai khom kha irnghil thai ni ti.
28Thu’nhretu dik loi chu roirêlna a ihmusit a ni.
Mi siahai khan sualna lung an thung ngai.
29Roirêlna chu mi irsonghai hranga siam a nia;
tôkhmol chu intohai inruangna hrang a ni.
Currently Selected:
THUVÂRHAI 19: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
