THUVÂRHAI 18
18
1Mi, mâni ringota om nuam chu mâni hrang vaia sa an hriat ngaia;
mi murdi’n thudik an iti kha pom ngai ma.
2Into’n chu inhriat thiamna a nei le nei loi ngaisak ngai maka;
mi’n mi vâr ni ti ri sehai tia a lungrîla om insîr vai kêng a inuam ngai.
3Sualna a hongin chu hmusitna khom a honga,
inzakna chu mualinphoina le tongna a ni.
4Mi, a bâia thu chu tui inthûk tak ang kha,
vârna tuihnâr luang ang kha a ni.
5Mi sual thop chu sa ma.
Roirêlnaa mi fel hnôl khom sa ma.
6Into’n irkhalna a phutin chu tôkhmol a izong a ni.
7Intô a chongin chu ama irhmangna a nia;
ama chongbâi suak chu ama irkhitna hranga châng a ni.
8Chong tufiam hi irngaihoi a oma,
bu nêk irhnikin ei sûng a ibit mot mot ang hi a ni.
9A sin thoa mi thaboi chu mi irhmangtirtua irzirpuipa a ni.
10 Rengpa chu kulpui det tak ang kha a nia,
mi felhai an intân lûta an zôk ngai.
11Irchonghaiin chu an irchongna khan khopui kulbang dettak angin a ihrung thei an sôn ngai.
12Tukhom a’rngaiintôm no’n chu chôiirsângin om ngai maka;
mi irchonghai chu irhmangna lampuia an hrô ngai.
13Ni sâm mân irngaitua bak roh.
khano’nchu invêt hlôna le mualinphoina ni a ti.
14La hring nuamna khan dam loi laiin intûk indet a ta,
khannisianlân lungrîl a popin chu sabeina boi a ti.
15Itiklai khomin mi vârhai chu irchû an nuam mai ngaia;
mi bengvârhaiin inhriatna an zong ngai.
16Mi lian hmu nuamtuhai chu thil pêkin lampui an hong pe ngai.
17Ama thiamna thu’nsîr masatu chu a’rdoipuitu’n an sîr nôk mâka chu a dik angin an lang ngai.
18Mi hrâthai an irkhalin chu tasânin thubuai kha an infel thei ngai.
19Ni’rzirpui sanin lân,
ama khan kulpui det angin nang hrung a ti.
Nir khalpuiin chu a in nang khâr pe a ti.
20Mi, a chongbâi suak ra khan hring a ti.
21Ni chong khan hringna a sûnghual theia;
ni chong dên khan hringna an siat irhmangtir thei.
Khasikin ni chongna ra kha fa ngêt ni ti.
22Dôngma hmu chu thil sa a ihmu a ni;
Rengpa’n a ingaisakna a inlang a ni.
23Mi’nriang a chongin chu mahrip takin a ngên ngaia,
irchong rêkin chu inhrum khakin a sâm ngai.
24Rual senkhat chu rual pai pai a oma,
khannisianlân, rual senkhat chu mâni irzirpuihai nêka iamom ual an om.
Currently Selected:
THUVÂRHAI 18: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
