THUVÂRHAI 17
17
1Buaina sip ina hruaithe fâk nêkin chu irngei diala bu dâi tang nêk a sa ual.
2Suak vârin a pu nâipa chunga khan irchamneina nei a ta,
irchon khom dongtum nei a ti.
3Rângachak le sumtak chu meiin a’rthîta,
mihriam lungrîl rêk chu Rengpa’n a fia ngai.
4Mi dik loihaiin chu saloi tiang
an mikuar an sunga,
mi minlakhai khom milak tiang
an mikuar an sung ngai.
5Mi’nrianghai hmusittu chu Pathian a siamtu a iêsêl a ni.
Mi vânduaina inriamtu chu vîk tong loiin om no ni.
6Nâipanghai roiinpuina chu pahai hi an nia,
putarhai rênglukhum chu an tu le tehai an ni.
7Mi mahriphaiin milak hril ngai maka,
intohai rêkin chu thu poimo insîr hrang nei ngai mahai.
8Mi senkhat irngai dânin chu fâk inrûk hi,
dôi angin sin a thotheia;
thil tinrêng a tho thei hrangin an iam ngai.
9Mi tho’nsualna ngaidamtu chu lungirthungna a izong a ni.
Mi tho’nsual inhriat maina khan rual irchangna a sen ngai.
10Into’n voi irzakhat vîka a irchû nêkin mi vârin voikhat irchutirnaa a irchû a tam ual ngai.
11Mi sia, buaina siam chian chian ngaihai chunga khan,
thina kha palâi nunse tak tîr ni a ti.
12Into, invêt irtongpui nêkin chu,
savompui a têhai la pe zoia irtongpui nuam a om ual.
13Satna, suala thuan nôk ngaitu chu thil saloiin a in mâksan no ni.
14Irkhal irphutna chu tuitial chet ang kha a nia;
khasikin irngo irzêm an tungtir mân irngamtir tum ro.
15Mi sual thiam changtu le mi sa thiam no inchangtirtu chu an ruaiin Rengpa hranga intirom an ni.
16Intô thiamna neina hranga sum inthâm hi ite ar fêna om ma,
mânia inhriatna a nei no sikin.
17Rual sain chu itiklai khom lungthungna an langtir ngai.
Irzirpui hi chardong nia hmang hranga suak a ni.
18Inhriatna nei loi mi vai kêng mi dang lâkai chunga mophurtu hranga chonginkung ngai.
19Sualna irngaiinna miin chu buaina a’rngaiinna a ni.
A neina song zo zôi miin chu buaina a izong a ni.
20Tukhom thil saloi ngaitua ngai le insîr ngaiin chu thil sa hmu ngai maka,
siatna vai a ihmu a ni.
21Nâipa invêtin chu a pa hrang lungdûkna a ni.
Nâipa intô neitu pa chu lômna nei ngai ma.
22Lungrîl irthafânna hi damna satak a nia;
lungrîl ngûina’n chu ru an chârtir ngai.
23Roirêltu dik loiin dâihrekin fâk inrûk an lâka,
khanchu roirêlna dik hmang nuam ngai ma.
24Mi vârin chu vârna tiang a’rnghat ngita,
intô rêk chu kil tin an khîk têituai ngai.
25Nâipa intô chu a pa beidongna intungtirtu a nia;
a nu hrangin irsîrna an tungtir ngai.
26Mi felhai intuangtir sa ma;
mi sahai tôkhmol fâk an omin chu rêl indikna a iom loi a ni.
27Inhriatna nei miin chu a chong ar dîn ngai.
Milung ir-ial taka om mi khan inhriat thiamna a nei.
28Intô khom a dâihrekin chu mi vâra tep sa a nia;
a chong intômin chu mi lunginchong neiin ibe thei a ni.
Currently Selected:
THUVÂRHAI 17: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
