THUVÂRHAI 16
16
1Lungrîla lei ngaitua irfûk hi mihriam sintum a nia,
sâmna rêk chu Rengpaa irthokin a ni.
2Mi, mâni irngaiin a itho murdi a dik a ti thei,
khannisian Pathianin chu lungrîl tumna kêng a irkhî ngai.
3Ni ngaituanahai satvur hrangin Rengpa ngênin lân,
khanchu ni ngaituanahai kha hlo chukin sin thei ni ti.
4 Rengpa thilsiam murdi hi omzia nei inzen a nia;
mi siahai khom sûn saloia hrang an ni.
5Lungrîla lârirpâk murdi chu Rengpa hranga intirom an ni;
dengtheina tuang loiin insua no ni.
6Dikna le iamomna nei chu Pathianin a ngaidam ngaia.
Rengpa chitna’n mi’n sual a mâk ngai.
7Mi, a omlamin Rengpa an lômtirin chu a râlhai khom rual sa’n a siam thei ngai.
8Dikloi taka lâklût intam nêkin chu dik taka hlo suak,
tômte nei a sa ual.
9Mi, a lungrîla a sin hrang a ngaitua theia,
kalchôi hrang lam chu Rengpa’n a zêk pe ngai.
10Reng khan Pathian irchamneina chang a ta;
a roirêl tinrêng a dik ngai.
11Vârna le irkhîna dik hi Rengpa nuamlam a nia;
a ni, vârna tinrêng a idik hrang a ni.
12Pualoina hi rênghai hranga intirom a nia,
felna hi rêngtoihmun detna a ni sikin.
13Thudik hi rêng lômna a nia;
thudik hrilhai chu uksak a ti.
14Mi vâr khan rêng inlômtir tum a ta,
rêng ningmurna chu thanginthei ang kha a ni.
15Reng hmêl vâra khan hringna a oma;
a ngaisakna chu rua hnungkhôn thoa sûm ang kha a ni.
16Rângachak nêkin khom vârna nei hi a sa uala,
a ni, tangka nêkin khom inhriat thiamna chu inthang ual hrang a ni.
17Mi sahai murdi’n sualna lampui hnung an songsan ngai;
khasikin, a lampui fena vêng insa khan a hringna a inzôk a ni.
18Irpâkna’n chu irhmangna tiang a hruaia,
irsongna’n irhmangna tiang a hruai ngai.
19Mi lârirpâkhai le râllâk thil irsem nêkin chu irngaiintôm taka inriang ni hi a sa ual.
20Irchutirna irngai mi chu tuanintungna dong a ti.
Rengpaa irnghat mi chu mi vânnei a ni.
21Mi vâr puihling chu a vârna’n mi’n inhria an ta;
a chongbâi thum dôr mi an hnê ngai.
22Mi vâr hrangin vârna kha hringna hnâr a nia;
mi’nvêt irchutir tum chu chanlamboia zoro inhekna a ni.
23Mi vârhai khan an chong mân an ngaitua baka;
an itihai murdi’n lungrîl an hnê ngai.
24Chong sa chu khuaihlutui ang dôr a ni.
Hringna hrangin a thuma;
takpum hranga hrisêlna a ni.
25 #
Thuv 14.12
Mâni irngaia lam dik ni le irhoia inlang,
khannisian a mongna chu thina khom a om.
26Sintho mi khan a fâk hrang sikin sin a thoa,
a phîngchâm khopna hrangin sin a tho ual ual ngai.
27Mi siahai chu mi dang ningthik sinna hrang lam an zonga;
an chongbâi suak chu mei ang kha a ni.
28Mi pualoihai khan chong chanlamboi an hril indarh ngaia;
irkhîk za zata buaina insua’n rual irchangna a’rsentir ngai.
29Mi nunsiahaiin an rualhai an huanga;
siatna tiang a hruai ngai.
30An irkamnôia, nang inmitkhum mihai ata irdîn ro,
a hmûr phong loi mi khan thil saloi an tungtir ngai.
31Hring dam sôtna hi mi fel lômman a nia;
lu chuak hi an roiinpuina a ni.
32Mi lungrîl ir-uai hi mi hrâthai nêkin a sa ual.
Mâni lungrîl sep zoi hi khopui inhnê zoi nêkin a sa ual.
33Mihriamin Pathian nuamlam inhriatna hrangin tâ an sân ngaia,
khannisian a mongna chu Rengpa ta a ni.
Currently Selected:
THUVÂRHAI 16: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
