THUVÂRHAI 15
15
1Sâmna irnêmin chu ningmurna ar kiangtir ngaia,
henhrum rêkin chu ningmurna an pungtir ngai.
2Mi vârhai an chongin chu inhriatna nei irzuk a omzia an langtir ngaia,
intohai rêkin chu chong chanlamboi an hril ngai.
3 Rengpa mit chu hmun tina a oma;
ei sin sa le saloi a thîr mai ngai.
4Lungkham chongin hringna a pêka,
nunrôngna chong rêkin chu lungrîl an siattir ngai.
5Into’n chu a pa irchutirna zong ngai maka;
mi vâr rêkin chu irchutirna a pom ngai.
6Mi felhai khan irchon tamtak an hrêa,
mi pualoihai inlâpna chu buaina a om ngai.
7Mi vârhai khan inhriatna an sem indara,
intohaiin chu khaang khan tho mahai.
8Mi pualoihai irbôlna chu,
Rengpa ta hrangin intirom a nia,
mi felhai chongchaina chu a ifel a ni.
9 Rengpa khan mi siahai lampui chu a hnôla,
felna lampui zuituhai rêk chu lung a thung ngai.
10Thil sual sintu chu a sate’n denginthei ni a ti.
Irchutirna pom loi chu irhmangna a ni.
11Mithi khua Rengpa’n a hmu zita,
mihriam lungrîl len vâng chu hmu’n fel zit a ti na!
12Mi hmusit song ngaihai khan irchutirna nuam ngai mahaia;
mi vârhai kuang khom ite irdon nuam ngai mahai.
13Lungrîl a lômin chu irtha an fântira;
lungrîl beidongna’n chu hmêl an ngûitir ngai.
14Mi bengvârhaiin irchutirna an nuama,
intohai rêk chu an intona khan an milung a chuk ngai.
15Dengthei tuangtu hrangin chu sûn murdi hi a saloi inzen a nia,
mi lungrîl irthâhai chu a nitin raifânin an om mai ngai.
16 Rengpa chia, inriang chu irchonga buaina nei nêkin a sa ual.
17Sechal hmê leh tuitaka bukhalâi ota,
milung irhoi loi nêkin,
anhring fâka inthurual taka bu nêk chu a sa ual.
18Milung hrâtin irkhalna an suaktira,
lung ir-ialin chu irngeina an tungtir ngai.
19Mi thaboiin chu hmun tina intakna tong a ta,
mi dik rêkin chu buaina nei no ni.
20Nâipa vârin chu a pa an lômtir ngaia.
Into vai kêng a nu a hmusit ngai.
21Intohaiin chu an intona kha an raifânna a nia,
mi vârhai rêk chu thil sa an sin ngai.
22Ngaitua bak loia sin tho chu tuanintung ngai maka;
lungvâr sak thei tamna chu hmanchang suana#15.22: hmanchang suana ti hi hlochuk mani, irlâp mani tihna a ni. a om ngai.
23A zoro taka sâmna dik tak inhriat hi lôm an om vang na!
24Mi vârhai chu hringna panna lampuia an fea;
thina panna lampui chu an mâk ngai.
25 Rengpa’n mi irsonghai in chu inkarpai a ta,
meithâi irchon rêk chu sûnghualpui a ti.
26 Rengpa’n ngaituana sualhai chu a hnôla,
mi irthiang chonghai chu a lôm ngai.
27Mi huatirham khan ama in sûngkua an buai ngaia,
fâk inrûk fa ngai loihai rêk chu irfûktir a ti.
28Mi sahaiin chu mi an itih pe hrang lam an ngaitua bak ngaia.
Mi saloihai rêkin chu mi an sâm zôi zela;
buaina an insua ngai.
29Mi sahai chongchaina chu Rengpa’n ar ngaitua ngaia,
mi siahai rêk chu a hla pehai ngai.
30Râifân hmêlin mi an lômtira,
thurchi lômomin mi an hartir ngai.
31Hringnun siam indikna irngai theina neitu chu,
mi vârhai laia om a ti.
32Irchûna nuam loi chu mâni irhmusit a nia,
irchutirna pom rêk chu hong vâr a ti.
33 Rengpa chi hi vârna irchutirna a ni zela.
Irngaiintômna chu chôiirsângna omna a ni.
Currently Selected:
THUVÂRHAI 15: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
