THUVÂRHAI 14
14
1Nupang vârin in an sin ngaia,
nupang into’n chu ama kut ngeiin in a set ngai.
2Dikna neiin chu Rengpa chi mi a nih ti an langa;
dikna nei loi chu Rengpa chi mi ni mah ti an lang ngai.
3Mi’nvêt chongin chu lârirpâkna khianghrol a oma,
mi vâr chongin chu an zôk ngai.
4Sehrâtchal om loina sâ in chu a fâi ngaia,
khannisianlân irlâpna tamtak pêktu chu sehrâtchal hrâtna sika a ni.
5Thu’nhriattu iamomna chu irkhêl ngai maka.
thu’nhriat indik loiin chu minlak a hril ngai.
6Mi hmusit ngaihai chu itiklai khomin vârna hmu ngai maka,
khannisian inhriat thiamna nei mihaiin chu vârna an hmu zôi zel ngai.
7Intô kuang ata irkêm ro;
a kuang ata ite thil sa irchû hrang hmu no chi ni.
8Mi vârhai vârna bi chu an sintum an inhriatna hi a ni.
Intohai into nasan chu inhriat an irtina hi a ni.
9Intohaiin chu an sual zoro’n poi ti mahaia,
mi sahaiin chu ngaidam an zong ngai.
10Ni lômna chu ni ta a nia,
ni ngaisiatna khom ni ta a ni.
Tûte’n nang irkoppui thei no ni.
11Mi siahai in a chim tena khom mi sahai in chu lan ding mai a ti.
12 #
Thuv 16.25
Mâni irngai ringota lam dik chu thina lam khom a ni lik thei ngai.
13Innuinaa khom ngaisiatna a om thei.
Raifânna a hek tena chu beidongna a om mai ngai.
14Mi siahai chu an siat man hmu an ti.
Mi sahai chu an sintho lam ang takin lômman ipêk ni an ti.
15Into’n chu chong murdi a iama;
mi vârin chu a ke sir hrang a en bak ngai.
16Mi vârin chu buaina a lôina hrang a ngaitua ngaia,
intohai rêk chu ngaitua loiin an pût zôi zel ngai.
17Milung hrâthai chu inmôl takin sin an tho ngaia;
mi vârhai rêk chu milung dairiamin an om ngai.
18Intohai chu an into man an hmua,
mi vârhai chu inhriatna inkhumtirin an om ngai.
19Mi sualhai chu mi felhai makunga kûnin,
mi dikloi chu mi felhai kotbâia kûn an ti.
20Mi’nriang chu a urêng a sûngsuak ngei khomin an hnôl ngaia,
mi irchong rêk chu urêng tamtak a nei ngai.
21Vânsatna dong nuamin chu inriang lunginkham ri se;
mi hmusit hi sualna a ni.
22Sin sa sinin chu mi danghai mahrip le iamzoina a dong ngaia;
thil sual sinin chu an tho’nchâi ngai.
23Sin takirtâi hi inlâpna a nia;
chanlamboi hrila toi chian chu inriangna a ni.
24Mi vârhai lômna chu irchongna a nia,
intohai rêk chu an intona vaia inhriat an ni.
25Thu’nhrepuitu thudik insîrna’n mihai an zôk ngaia;
milak a hrilin chu mihai a ihuang a ni.
26 Rengpa chitna khan tûngna lian tak a oma;
a nâihai khan zôkna hmun an hmu ngai.
27 Rengpa chi chu hringna tuihnâr a nia;
thina chânghai lôi theina a ni.
28Mipui tamna khan chu rêng roiinpuina a oma;
mipui tômna rêka chu rêng nâipa irhmangna a om.
29Mi phûkdâi chu mi vâr tak a nia,
milung hrât chu an tozia vai târinlang a ti.
30Lungrîl damna chu taksa hrisêlna a nia,
hnarsâna rêk hi chu ru hmon theina a ni.
31Mi’nriang sirphâna chu Pathian a siamtu êsêlna a nia;
mi’nriang lunginkham rêk chu Pathian chôiindômna a ni.
32Mi sia chu a sintho insual khan ama irhmangna hrang an tungtir ngaia,
mi fel chu a felna khan hrung mai a ti.
33Vârna chu mi bengvârhai ngaituanaa khan a om maia;
intohaiin chu vârna ite inhre mahai.
34Felna’n nam a chôiirsânga;
sualna chu nam tin hrangin mualinphoina a ni.
35Renghai ngaisakna chu tirtôn vârhai chunga a oma;
ama philtuhai chunga chu a ningmurna a chum ngai.
Currently Selected:
THUVÂRHAI 14: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
