NEHEMIA 3
3
Jerusalem kul indingthar nôkna
1Khanchu ochai inlal Eliasiba chu a urêng ochaihai leh an thoia, belra lampui an siama; an irthiangtira, a inkhârhai an sina; Hamea in irsâng dênin an irthiangtira, Hananela in irsâng dênin. 2Kha zoiin chu Jeriko mihaiin an siama. Khan anni zoia chu Imria nâipa Zakura’n a siama.
3Khan ngahai lampui chu Hasena nâihaiin an sina, a neinunhai an siaa, a inkhârhai an charêla; a kalna le an tûknahai an sina.
4Anni zoiin chu Hakoza nâi Uria nâipa Meremota’n a siam insaa. Anni zoia chu Mesezabela nâi Berekia nâipa Mesulama khan a siam insaa, anni zoi nôkin chu Baana nâipa Zadoka’n a siama.
5Khan, anni zoiin chu Tekoa kho mihaiin an siam insaa, khannisian an mi lianhaiin an hruaituhai sina khan irpôl nuam mahaia.
6Khan inkhâr milui#3.6: Lekhabu senkhata chu Jeshana inkhâr ti a ni. chu Pasea nâipa Joiada le Besodeia nâipa Mesulama mihaiin an siam insaa, a rêla an siaa, a lampuihai an charêla.
7Khan anni zoia chu Gibeon mi Melatia le Meronot mi, Jadona’n, varâl tianga ram optu thu hnuaia om Gibeon mi le Mizpa mihai le an siam insa nôka.
8Kha zoiin chu rângachak siamtu laia mi Harhaia nâipa Uziela’n a siama. Kha irzoiin chu mirimhoi siamtu laia mi Hanania’n a siam nôka, Kul irsahai dênin Jerusalem chu an siam insa nôka.
9Anni zoiin chu Jerusalem bial chimrip hruaitu Hura nâipa Refaia khan a siama.
10Khan anni zoiin Harumafa nâipa Jedaia’n a siam insa, kha irzoiin chu Hasabneia nâipa Hatusana’n a siama.
11Harima nâipa Malkija le Pahat-moaba nâipa Hasuba haiin hmun dang le meipui sêmna in irsâng an siam insaa. 12Kha zoiin chu Jerusalem bial chimrip hruaitu Halohesa nâipa Saluma’n a nâinuhai leh an siama. 13Phâiruam inkhâr chu Hanuna le Zanoa haiin an siam insaa; a inkhârhai charêlin, a kalnahai siamin an tûkna an sin insatira. Khan sahrok paina tianga inkhâr dênin kul mûk sângkhat an sin saa.
14Sahrok paina inkhâr chu Bet-hakerem bial hruaitu Rekaba nâipa Malkija’n a siam insatira, inkhârhai le a kalna le an tûknahai a siama.
15Khan Mizpa bial hruaitu Kolhozea nâipa Saluma, tuikuang lampui chu a siam insaa, ar khûtira, a lampuihai siamin a kalna le an tûknahai irfûkin, khan rêng irhuan kôla, Sela dîl irkulna chu Davida omna khua ata chum theina leidâk dênin a siam insaa.
16Kha zoiin chu Azbuka, Betzur bial chimrip hruaitu nâipa Nehemia’n Davida thân irdîn le dîl khua le mi hrâthai in irdîn dênin a siam insaa.
Levi irchi kula sinthohai
17Kha zoiin chu Levi irchihaiin an siam insa nôka; Bania nâipa Rehuma haiin. Kha irzoiin chu Keila bial chimrip hruaitu Hasabia’n a bial irhmingin a siam insaa. 18Ama zoiin chu a urênghaiin an siam nôka; Keila bial chimrip hruaitu Henada nâipa Bevaia haiin; 19kha zoiin chu Mizpa hruaitu Josua nâipa Ezra’n hmun dang kul kôi irphutna râltukfam siana panna lam a siam insata.
20Kha irzoiin Zabaia nâipa Baruka’n, sathnem irngaitakin hmun dang kul kôi irphutna ata ochai inlal Eliasiba in lampui dênin a siam insaa. 21Kha irzoiin Hakoza nâi, Uria nâipa Meremota’n hmun dang Eliasiba in lampui ata Eliasiba in hekna dênin a siama.
Ochaihai kula sinthotuhai
22Khanchu a kôlvêla ochaihaiin an siam insa nôka. 23Anni zoiin Benjamina le Hasuba’n an in irdîn an siama. Anni zoiin Anania nâi Maaseia nâipa Azaria’n a in kôl kha a siama. 24Ama zoi le chu Henadaba nâipa Binuia’n hmun dang, Azaria in ata kul kôi irphutna a kil dênin a siam insaa. 25Uzia nâipa Palala’n kulkôi irphutna irdîn le intângna in kôla rêng in irsâng ual ata irlôinahai a siam insatira. Kha zoia chu Parosa nâipa Pedaia’n a siam insaa. 26Nethinim haiin nisua tianga tui mikot irdîn dênin in irsâng irlôina dênin an siam insa nôka.
Sinthotu danghai
27Kha zoiin chu Tekoa kho mihaiin hmun dang, in irsâng lianpa fena le Ofel kul dênin an siam insa.
28Sakor lampui chung tiang chu ochaihaiin mâni in irdînhai an siama.
29Anni zoiin chu Imera nâipa Zadoka’n a in irdîn dênin a siam insaa. Kha zoiin nisua tianga mikot hrungtu Sekania nâipa Semaia’n a siam insaa.
30Kha zoiin chu Selemia nâipa Hanania le Zalafa nâipa kirukna Hanuna haiin hmun dang an siama. Kha zoiin Berekia nâipa Mesulama khan a omna irdîn a siam insaa.
31Ama zoiin chu rângachak siamtu laia mi Malkija’n Hamipkad mikot irdîn Nethinim hai in le bepâr thohai in dênin a kil panna dênin a siam insa nôka.
32Khan a kil fena le kêlbelra mikot kâr chu rângachak siamtu le bepâr thohaiin an siam insa a ni.
Currently Selected:
NEHEMIA 3: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
