NEHEMIA 2
2
Nehemia Jerusalem a fe
1Khan hiang hi a nia, rêng Artazerzia kum sômhni an lal kum, Nisan tha uain an sôm zoiin uain kha ki lâka, rêng ki pêka. Matona khan chu a makunga beidong hmêl irput ngai ma unga. 2Rengin ki kuang, “Damloi khom ni ual mak chea, itina mo beidong hmêl ni irput tâk hi te? thil dang ni no ni, ni lungrîl a isôl kêng ni a ti,” a ni tia. Khanchu a sân ki chi tâka. 3#2 Rng 25.8-10; 2 Tsn 36.19; Jer 52.12-14 Keima’n rêng kuang khan, “Reng chu kumtuangin dam sôt ri se: ki irchibulhai thân omna khua chu a ramin a inkhârhai a kânga, beidong hmêl irput loiin mo ki ini hrang?” ki tia. 4Khanchu rêng khan, “Imo ni izong?” a tia. Khanchu irvân Pathian kuang ki chongchai tâka. 5Reng kuang khan, “Rengin a sa a iti lam a niin chu, ni siahlo hin ni mit ki lei tung ngaiin chu, Judai rama ki’rchihai thân omna khuaa nin fetir ro, khua la va inding nôk hi rong,” ki tia.
6Rengin ki kuang, “I dôr ten mo ni va iom hrang, itik tena mo ni ihong thei nôk hrang?” a tia. Khanchu rêngin lôm takin a nin fetira; keima’n hunbi kin danga. 7Kha vai kha ni loiin rêng kuanga khan, “Rengin a sa a ti’n chu varâl tianga roirêltuhai irhmupuihai hrangin Judai ram ki fe theina hrangin lekha ni pe’n lân; 8khan rêng ram nghâktu Asafa hmu hrangin irhrungna kul inkhâr enna, khopui kul hrang le, ki va iomna hrang in le thing an ni pêk theina hrang lekha ni pe sa ro,” ki tia. Khan ki Pathianin a nin dit sikin rêng kuanga ki izong ang a ni pêka.
9Khanchu varâl tianga roirêltuhai kuanga ki va tunga, rêng lekhahai chu ki pêka. Rengin ki kuanga sipai hruaitu le sipai sakor chung chuang mi an fetirhaia. 10Khan Horon mi Sanbalata le Amon mi siahlo Tobia haiin an len hriatin chu Israelhai san hrangin an hong a nih tiin an milung chuk pehai maka.
11Khanchu Jerusalem ki hong tunga, sûn thum ki’rngam baka. 12Zâna chu ki thoia, kei le mi dang tômtein: Jerusalem tah hranga ki itho tum ki Pathianin ki lungrîla a isia chu tûte hril ma unga, ki ichuangna ti no chu sa dang ite chôihai ma unga. 13Khan zâna chu phâi tianga mikota ki suaka, Dragon tuisunsuakna tiang le sahrok paina tiang ki fea, Jerusalem kul chim le a inkhâr kânghai ki en vêla. 14Khan tuisunsuakna lam le rêng dîl dênin ki fea: khannisian ki chuangna sa fe thei ving loina hmun a nia. 15Khanchu zâna vadung ki’rvâka, kulhai kha ki ena; ki hong kîr nôka, phâi tianga mikota khan ki lûta, kha tiang khan ki hong kîr nôka.
16Roirêltuhaiin khôn mo ki ife le imo ki itho khom inhre loiin; khan Judahai ochai, mi thathai, roirêltu le mi dang sinthohai ngai khom la hrilhai ual ma unga. 17Khanchu an kuang, “Kin ngîrhmun a isiat lam hi nin hmua, Jerusalem a ram ti le, a inkhârhai a kâng ti khom nin inhriata: tho insîrinsiata ei ni loina hrangin Jerusalem kul chu indingtir nôk ei ti,” ki tia. 18Khan ki Pathianin a ni inuampui lam kin sîra, ki makunga rêng thuhrilhai khom. Khanchu anni’n, “Thoi ei ta, indingtir tak tak ei ti,” an tia. Khanchu kha sin sa tho hrangin an kut an inhrâttira.
19Khannisian Horon mi Sanbalata le Amon mi, siahlo Tobia le Arab mi Gesema’n haiin an inhriatin chu an nin nuisanin, an ni hmusita, “Nin sintho hi itho sika mo? Reng chunga hin nin tehel nin izong ma ni?” an ni tia. 20Khanchu hiang hin ki sâmhaia, “Irvân Pathianin ni’rnghil maka; khasikin keini a siahlohai hi thoi kin ta, indingtir nôk kin ti; nangnihaiin chu Jerusalema hin dongtum mani, irchamneina mani, hnungmân mani ite nei thei no chin ni,” ki tia.
Currently Selected:
NEHEMIA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
