MIKA 3
3
Mika’n Israel hruaituhai a hril mualinphoi
1O nangni, Jakoba-hai hruaituhai le Israel sûngkuaa roirêltuhaio,
irngai unglân, nangni ki ngên a ni:
roirêl dân kha nin inhriat hrang ni no ni mo?
2Thil sa nin khôkmâka,
thil saloi nin irngai poimoa,
an vun nin hlîkpaia,
an ru ata taksa nin khok thâka;
3Ki mihai hme nin fâk saa; an vun an hlâipaia,
an ru an inkhiakpaia:
a ni, bêla suang hrang angin an irchan chita,
hmê irtok bêl sûnga hme irchan chit ang dênin.
4Kha tika chu Rengpa insam an ti,
khannisianlân anni kha sâm no ni:
a ni, kha tika chu an thil thoa an itho insa loizia ang takin,
annihai ata a hmâi thup a ti.
5Pêk hrang neihai kuang, irtharngamna tia khêka,
pêk hrang nei loihai irdoina om a ti,
tia insîrtu deipuhai khan ki mihai an huanga,
an chungchâng thu Rengpa’n hiang hin an sîr:
6Inlârna nin hmu loina hrangin nin kuang zân hong tung a ta;
pânzia nin en thei loina dôrin nin kuang inthimna zuang om a ta;
deipuhai hranga khan nikhua liam a ta,
sûn khom an chunga khan nikhua’n thim ni a ti.
7Hmutheituhai kha inzak an ta,
pânzia entheihai kha mualinphoi an ti;
a ni, an rêngin an bâi hîp an ta,
Pathian sâmna om maka.
8Khannisianlân Jakoba-hai kuang an tho’nsualna inhriattir hrang le Israelhai kuang an sualna inhriattir hrangin Rengpa irtha sika thilthotheinahai roirêlnahai le hrâtnahai khan ki isip tâk a ni.
9Nangni Jakoba-hai sûngkua hruaituhai le Israel sûngkua roirêltu,
roirêlna dik intira, dikna tinrêng irlettir paituhaio,
hi hi irngai unglân nangni ki ngên a ni.
10Zion kha thisenin an sina,
Jerusalem kha siat zoina’n.
11Khataka hruaituhai khan fâkinrûkna sabeiin roi an rêla,
khataka ochaihai khan hlo sabeiin an irchûtira,
khataka deipuhai khan sum sabeiin pânzia an ena:
khaang dôr khom khan Rengpa kha ei laia a iom loi ma ni?
Thil saloi ei chunga zuang tung no ni tiin Rengpa chunga nin irnghat a ni.
12 #
Jer 26.18
Khasikin Zion kha nangni sika khan,
loi anga lâk nôk ni a ta,
Jerusalem kha thil siat om khôm ni a ta,
biak in omna tâng kha ramhnuai hmun irsâng ang ni a ti.
Currently Selected:
MIKA 3: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
