MIKA 2
2
Inriang dengintheitirtuhai dongtum
1An zâlhmuna pualoina ngaituatuhai le thil saloi ngaitua suaktuhai kha an chung a rik e!
Zînga khua a hong vârin an itum ang ngei khan an tho tâka.
2Mi dang loihai an irzuka,
an lâkpai pehaia;
inhai an irzuka an lâk tâka;
mi le an in sûng mihai,
mi le an irchonhai dênin an ihnuaisia a ni.
3Khasikin Rengpa’n hiang hin a ti:
irngai ta hi in sûngkua chunga hin thil saloi ki ingaitua a ni,
khatak ata khan nin ring la sonpai mak chêia,
lârirpâk takin fe ta no chin ni:
zoro saloi a ini hrang a ni.
4Kha nikhuaa khan nangni demin chongirkhekna thu siam an ta,
chap hla beidong om insamin,
ilong zitin kin iom tâk a ni hi te:
ki mihai dongtum an danglamtira:
ki kuang ata a isonpai tâk a ni hi!
Tehel hmanghai kuang kin lei sem indarh tâk a nih ti an ti.
5Khasikin Rengpa mihai inkhômhai laia khan,
tasânna hruia irkhit petu tûte nei no chi ni.
6Thu hril no ro, tiin an insîr ngai.
Hi mihai kuanga hin thu hril no nihai:
hrilinsiatna kha irkiang no ni.
7O Jakoba in sûng mihaio,
Rengpa irtha kha tuangdiarna a irsam ma ni?
Hi hi a sintho mani ti hrang ma ni?
Dik taka om ngai chunga khan ki thuhai hin thil sa a itho loi ma ni?
8Khannisianlân, ki mihai kha atûn laia,
râl angin an hong inding suak a ni:
irdoi nuam loia lungthi taka chai irvâkhai ata an silkai songkol irfualhai an hlîk pea.
9Ki mi nupanghai kha an in hoitak ata nin inhnot suaka;
an nâipangtehai ata ki roiinpuina kha nin lâkpai ving tâk a ni.
10Thoi unglân, fe irhmang roi;
hi hin zôkna om ma;
nin pualoina sikin insiat zit ni a ti.
11“Uain le zu luang a ti,”
tia milak hril deipu irvâk vêlhai kha,
hi mihai deipu ni le irhoi an ni.
12O Jakoba-hai, nin rêngin nangni koi buk ngêt ki ta;
Israel mi la omsunhai kha hruai khôm ngêt ki ta;
Bozra khuaa belra angin siakhôm ki ta:
sa pâl an hloisûl hmuna om ang maiin,
mipui an ni sikin irse mur mur an ti.
13Suk thengtu kha an matona hong a fea;
an suk thenga, mikot dênin an fe thiaia,
khataka khan an ife suak a ni;
khan, an rêng kha an maton tiang a fea,
Rengpa khan an maton a hruaia.
Currently Selected:
MIKA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
