MATHAIA 24

Jisua’n tempil siat hrang thu an sîrna

(Mk 13.1-2; Lk 21.5-6)

1Khan, Jisua a suaka, Tempil ata a fe laiin, Tempil inen hrangin ar chutirhai a kuang an honga. 2Ama khan an kuang en roi, “Thudik nangni ki hril, hitaka lung inkhat khom hi a hmuna om no ni; an rêngin paiin om zit an ti,” a tia.

Buaina le dengintheitirna

(Mk 13.3-13; Lk 21.7-19)

3Khan, Jisua’n oliv tânga a toi laiin, a irchutirhaiin a bingin an hong irhmupuia, “Nin hril ta, hihai hi itika mo a itung hrang? Ni zuang nôkna hrang le rammual mongna hrang irsinsiana sinirkhêl kha i imo a iom hrang?” tiin an irdona.

4Jisua’n an kuanga, “Tukhomin nangni an huang nona hrangin, irdîn roi. 5Mi tamtakin, ‘Mesia kha ki nih,’ tiin keima irhming songin hong an ta, mi tamtak huang an ti. 6Nin kôla irdoina thuthang lan hriat nin ta, khannisianlân, nin milung inbuai no roi. Kha thilhai kha chu a hong itung ngêt hrang a ni, khannisianlân, a mongna chu la ni no ni. 7Nam le nam irdoi an ta, ram le ram irdoi an ti. Hmun tina châm tâk a ta, hnîngnu inhnîng a ti. 8Khahai kha nâiha sê ar phut ta tihna a ni.

9“Khanchu, deng nangni inthei hrang le nangni that hrangin nangni lan cheltir an ti. Keima sikin nam tinin nangni khôkmâk an ti.#Mt 10.22 10Kha tika chu mi tamtakin an iamna masan an ta, irchel irhlômtir an ta, irkhôkmâk irhlômtir an ti. 11Khanchu, deipu dol tamtak la hong suak an ta, mi tamtak la huang an ti. 12Khan, sual a la pung hrang sikin mi tamtak lungthungna la dâi a ti. 13Khannisianlân, tukhom a mong dêna tuang diar ka chu saninhringin om a ti.#Mt 10.22 14Khan, hi Ram Thurchi Sa hi nam tin inhriatna hrangin rammual pumpuia ihrilin la om a ta, khanchu, a mongna hong tung a ti.

Intakna ichiom tak

(Mk 13.14-23; Lk 21.20-24)

15“Khanchu, intakna ichiom porinche tak, deipu Davida lei insîr kha hmu nin ta, hmun irthianga khan ngîr hmu nin ti,” (khan a tep murdi’n chu a omzia inhre ri se). #Dan 9.27; 11.31; 12.11 16Khanchu, “Judai rama omhai kha tânga rot ri sehai. 17Mi, a in chunga om khom in sûnga a neinun la suak hrangin chum no ri se.#Lk 17.31 18Mi, loia om khom a puan la hrangin kîr no ri se. 19Kha nî khan chu inrâihai le nâite pom laihai chung chu a rik vang na! 20Nin rot hrang zoro kha phalbia mani, Sabat nia mani, a hong tung nona hrangin Pathian kuang chongchai roi. 21Kha zoro dengthei inthang om hrang kha chu rammual irsiang ata atûn ten hin la om ngai mah, om khom om nôk ta no ni.#Dan 12.1; Thup 7.14 22Khannisianlân, Pathianin kha sûnhai kha an bong ta ni no len vâng sian chu tûte hringin suak no nihai. A mi inthanghai sikin Pathianin kha sûnhai kha inbong a ti.

23“Khanchu, tukhomin nin kuang, en u ta, Krista chu, ‘Hi hi mani, so so mani,’ an ti khomin taksôn no roi, 24Krista dolhai le deipu dolhai an la isuak hrang a ni, khahai khan thei len vânghai sian chu inthanghai lua an huang theina hrangin irsinsiana le thilirkhêl inthang tho an ti. 25Irngai roi! A zoro a hong tung mân nangni ki lei ihril a ni, 26Tukhomin nin kuang, ‘En ta, ramchâra a om,’ an ti khomin fe suak no roi, ‘A chontan sûnga a om’ an ti khomin taksôn no roi.#Lk 17.23-24 27Mihriam Nâipa zuang nôk hrang chu kôlirtêka, sak tiang ata thang tiang ten irtêk ang kha a ni hrang sikin.

28“Khoa khom saruak omna rikipa raikosohai omkhôm an ti,” a tia. #Lk 17.37

Mihriam Nâipa zuang hrang thu

(Mk 13.24-27; Lk 21.25-28)

29“Khan, kha dengthei zorohai kha ar zoi le chu misa inthim a ta, tha vâr ta no ni, irvân ata ârsihai tâk a ta, irvân sinthotheinahai kha inhnîng a ti.#Isa 13.10; 34.4; Ezek 32.7; Joel 2.10,31; 3.15; Thup 6.12-13 30Kha zoro tika chu irnênga nam tinrêngin chapin an rôp irchûm an ta, Mihriam Nâipa hi sinthotheina le roiinpuina irkhêl tak le irvân sûm laia a zuang hmu an ti.#Dan 7.13; Zak 12.10-14; Thup 1.7 31Bekul inring tak tum ni a ta, khanchu, a vân vântîrtônhai kha rammual kil minlia tîr suakhai a ta, kôlkung rengata kiang tianga kôlkung dênin a mi inthanghai chu bukkhômhai an ti.

Theipui kung ata irchu hrang

(Mk 13.28-31; Lk 21.29-33)

32“Khanchu, theipui kung om lam ata hi irchu hrang nin nei; a ôn a hong irnoia, a hna a hong incherin chu kholum a hong nâi tah ti nin inhriat ngai. 33Khaang dênin, nangni khomin khahai murdi nin hmu tika chu ama kha a zuang nâi tâka, mikot bula a om tah ti inhre roi. 34Thudik nangni ki hril, khahai murdi kha a tung mâka chu atûn laia mihai hi boi no nihai. 35Irnêng le irvân boi a ta, ki thu chu boi no ni.

Tukhomin a nikhua le a zoro an inhriat loi thu

(Mk 13.32-37; Lk 17.26-30,34-36)

36“Khannisianlân, kha nikhua le a zoro kha chu Pa ti no chu tûte’n inhre mahai, irvâna vântîrtônhai khomin, Nâipa khomin inhre mahai. 37Mihriam Nâipa zuang nôkna chu Nova dam laia ang khan ni a ti.#Irp 6.5-8 38Tuilian mân, Nova irkuanga a lût ni dênin an fâkin an nêka, dôngma pasal an irnei ngai, 39tui a hong liana, an rêngin an irhmang zit mâka chu imo a hong itung ite inhre mahai; Mihriam Nâipa zuang nôkna chu, khaang tak khan nih a ti;#Irp 7.6-24 40Kha tika chu mi inhni loia sin an ta, inkhat ihruaiin om a ta, inkhat imâkin om a ti. 41Nupang inhni’n bu suk an ta, inkhat chu ihruai ni a ta, inkhat chu masan ni a ti.

42“Khanchu, irtûng chianin om roi, itik nia mo nin Rengpa a izuang hrang inhre mak chêi. 43Khannisianlân, hi hi nin inhriat, inru hong hrang in neitu’n inhre sianlân, lei irtûng a ta, a in inmok no ni.#Lk 12.39-40 44Khasikin, nangni khom irtûng chianin om roi, nin sabei no lai takin Mihriam Nâipa a zuang hrang sikin.

Siahlo iamom le iamomloi

(Lk 12.41-48)

45“Siahlo iamom vâr tak, a pu’n a in sûng charêla, siahlo danghai zoro tina an fâk sem pe hranga hruaitua a isiam kha tu mo ni ni? 46An pu a honga, khaanga sin thoa siahlo a hong ihmu kha a vân a sa. 47Thudik nangni ki hril, a neinun murdi chunga a pu khan a zêk hrangin phun a ti. 48Khannisianlân, siahlo saloi a niin chu, a milungin ka pu chu hong lat no nih ti a ta, 49a siahlo chanpuihai kha lei zêm a ta, zu’nruihai laia fâkin in a ti. 50Khanchu, kha siahlo pu kha a tûng no lai tak le an hriat no zoro lai takin hong pe a ti. 51A pu khan inhnot suakpai a ta, vârirlethai idong anga kha indong a ti. Kha khan chap le irkamnôina om a ti.

Currently Selected:

MATHAIA 24: HRACLBSI

Highlight

Copy