MATHAIA 23

Jisua’n Dân irchutirtuhai le Farisaihai kuang ata irdîn hranga a hrilna

(Mk 12.38-39; Lk 11.43-46; 20.45-46)

1Khan, Jisua’n mipui le a irchutirhai kuang thu an sîra, 2“Dan irchutirtuhai le Farisaihai hi Mosia Dânhai hrilfia hranga phal an ni. 3Khasikin tho hranga nangni an ibe murdi chu nin zômin, nin izui hrang a ni; Khannisian, an om dân chu zui no roi, an insîrhai hi an hmang ngai no sikin. 4Puakrik pêl intak takhai an siama, mihai chunga an bâng ngaia, khan kha mihai sanna hrangin an kutpârhai lua hmang nuam ngai mahai. 5An sintho murdi kha mihai hmu hrangin kêng an itho ngai; an bân khit le michal khitnaa Pathian chong irziakhai hi en u ta, an inhrol vang na! An songkol irfual irvonahai khom hi en u ta, an sei vang na!#Nam 15.38; Dhn 6.8; Mt 6.1 6Hruaithena hmuna toina satakhai, Sinagoka toina langsârhai, dukana chubai irmûk hai, 7mihaiin ‘Rabbi’ an itihai an irngaisâng ngai.

8“Nangni chu ‘Rabbi’ tia koi ni viat no chin ni; urêng khat inzen nin nia, irchutirtu inkhat vai nin nei sikin. 9Irnêng chunga hin tûte ‘Ka pa,’ ti no roi, pa inkhat vai irvâna nin nei sikin. 10‘Hruaitu,’ ti khomin irkoi no roi. Mesia vai hin nin hruaitu a ni sikin. 11Nin laia a roiinpui tak chu nin sinthopu a ini hrang a ni.#Mt 20.26-27; Mk 9.35; 10.43-44; Lk 22.26 12Tukhom irngaiinhlu ka chu irhniam an ta, irngaiintôm ka chu chôiindôm ni an ti.#Lk 14.11; 18.14

An vârirletna Jisua’n a dem

(Mk 12.40; Lk 11.39-42,44,52; 20.47)

13“Nangni Dân irchutirtu le Farisai vârirlethaio, nin chung a rik! vân Ram lampui kha mihai nin khâr pehai ngaia; nangni lak lût mak chêia, a lût hranghai khom an ilût lak phal mak chêi. 14Nangni Dân irchutirtu le Farisai vârirlethai, nin chung a rik! Meithâi sum nin fâka, mi huangna’n sôt tak tak nin chongchai ngai, khasika khan nin dûk tong lûminna ual a ti. 15Nangni Dân irchutirtuhai le Farisaihaio, nin chung a rik e! mi inkhat irlet hrangin tuikhanglian le ram phêk pumpui nin irfang ngaia, khan, a hong irletin chu kha mi kha nangni nêka a bâk inhni’n hrem hmuna fe hrangin nin siam ngai, 16‘Nangni hruaitu mitcho, tukhom Tempil sâlin mi’n khomâksâm sianlân, ite ni mah, Tempil rângachak sâla khomâksâm chu a isua hrang a ni,’ tituhaio, nin chung a rik e! 17Nangni, mi invêt mitchohaio, i hi mo a roiinpui ual, rângachak mo rângachak irthiang infâitu Tempil kha mo? 18Mi’n maichâm sâlin khomâksâm sianlân, ite ni mah, khataka thilpêk sâla khomâksâm chu a isua hrang a ni nin ti saa. 19Nangni mitchohaio, i hi mo a roiinpui ual, thilpêk mo thilpêk infâitu maichâm kha mo? 20Khasikin, maichâm sâla khomâksâm chu maichâm le a chunga om murdi sâla khomâksâm a ni. 21Tempil sâla khomâksâm chu Tempil le a luatu sâla khomâksâm a ni. 22Irvân sâla khomâksâm chu Pathian toihmun le a chunga toi sâla khomâksâm a ni.#Isa 66.1; Mt 5.34

23“Nangni Dân irchutirtuhai le Farisai vârirlethaio, nin chung a rik! A zoro taka vâng ngai, podina hai, lêngmiser hai, kumhoi hai sôma inkhat nin pêk ngaia, Dân thua poimo ual, dikna hai, lungkhamna hai; iamomna hai nin ngainêp ngai, khannisian, khahai kha kêng nin itho rua tak chu a ni, a danghai khi ma ual loiin.#Lev 27.30 24Hruaitu mitchohaio! Nin tui ina thoivâi irthît infâia, saringsei chu nin invol ngai.

25“Nangni Dân irchutirtuhai le Farisai vârirlethai! nin chung a rik: Nin khilât le khêng pên tiang nin infâia; a sûng tiang chu hlêprûkna le insumloina’n a sip a ni. 26Farisai mitchohai! khilât sûng tiang chu infâi bak unglân, a pên tiang khom fâi sa a ti.

27“Nangni Dân irchutirtuhai le Farisai vârirlethai! Thân lung nâl invâra, pên tianga sataka inlang, khannisian a sûng tiang chu mithi ruhai le ruak porinchena tinrênga sip ang kha nin ni. #Tîr 23.3 28Khaangin mi tin mithmua pên tiang chu a sa angin nin inlanga, khannisian, nin sûng tiang chu vârirletna le sualnaa sip nin ni.

Jisua’n hrem an ini hrang thu an sîr

(Lk 11.47-51)

29“Nangni Dân irchutirtuhai le Farisai vârirlethai! nin chung a rik e! Deipuhai thân nin sina, mi felhai inhriatmaina lunghai nin irvo ngaia; 30ei irchibulhai om laia khan lei om tâk khom inlân, Deipuhai thisen an insuakna khan chu kop no ih, nin ti ngai. 31Khasikin deipuhai lei thattuhai irchia mi nin nih ti nin inlang chak a ni, 32Fe unglân, nin irchibulhaiin an lei iphut kha irzoitir roi. 33Nangni mirûlhai le mirûl irchihaio! Hremhmun fe hranga rêlinchukna irthokin itin mo zôk thei hrangin nin irtûng?#Mt 3.7; 12.34; Lk 3.7 34Khasikin nangni ki hril, nin kuang deipuhai, mi vârhai, Dân irchutirhai hong tîr ki ti; senkhat that nin ta, hembe nin ti; senkhat Sinagoka zêm nin ti, kho tina inhnot irzûl thiai nin ti. 35Khanchu, Abela, mi fel tak thisen nin insua ata, hmun irthiang le maichâm kâra Barakia nâipa Zakaria thisen nin insua dên khan, irnêng chunga mi fel thisen suak murdi moh chu nangnihai chunga chum a ti.#Irp 4.8; 2 Tsn 24.20-21 36Thudik nangni ki hril, khahai murdi kha atûnlai mihai chunga a itung hrang a ni.

Jisua’n Jerusalem lung a thungzia

(Lk 13.34-35)

37“O Jerusalem, Jerusalem! Deipuhai thattu, Pathianin ni kuanga itîra omhai lei dêng thattu! Ârpuinu’n a têhai a mitha hnuaia a iop khôm angin ni nâihai voi iza mo op khôm ki tuma, nuam mak che? 38Irngai u ta, nin Tempil kha marakin, a korongin om ta a ti.#Jer 22.5 39Nangni ki hril, Rengpa irhminga hong chu Pathianin satvur ri se, nin ti mâka chu atûna irthokin ni hmu ta no chin ni,” a tia.#Ipn 118.26

Currently Selected:

MATHAIA 23: HRACLBSI

Highlight

Copy