ISAIA 16
16
Moabhai hrang lungzîngna
1Ram roirêltuhai hrangin kêlbelrahai chu Sela khua ramchârna hmun ata Zion nâinu tâng tiang khan chôi unglân. 2Khanchu, Moab nâinuhai chu vate irbu ata râiphîta vuanghai angin Arnon vadunga khan om an ti. 3A’rfûk ni ti pe’n lân, roi ni rêl pe ro, ni râifân chu sûn lai taka inthim angin om sianlân, irzûlpaia omhai chu irbîk ta ri sehai; a rothai chu chel ta loiin. 4Moab-hai ata irzûla omhai chu, ni kôla om ri sehai, an ta hrangin an siattirtu kôl ata irbîk theina ni ri se; mi huang ngaitu khom ite ni loiin a om thei tâk sikin, insiatnahai om ta maka, a êsêltuhai chu hi ram ata hi om ta no nihai. 5Khanchu rêngtoihmun kha chu, inren irhlômna pungin om a ta, kha ina Davida puan ina khan, mi inkhat roirêlin, roirêlna fel zongin, thil fel inrangtaka thoin, toi a ti.
6Moabhai chu an lârirpâkna thu ei inhriat angin, an chong irpâkna le, an irsor le an ningmurna thuhai le an irsongnahai chu ite bêin bê ni maka. 7Khasikin Moabhai chu Moab mihai chunga khêk an ta; Kir-hareseth grep inhrolhai chu milung hoi loi pumin la an ti. 8Hesbon loihai a chuai zoia, Sibma grep hruihai le, nam tina an rênghaiin a kung sa la omhai khom inkhiakhai rem rum an ti. Jazer khua dênin an chia, ramchâra an omsuama, a ônhai zârin, tuipui an irzâm kâi ta.
9Khasikin Sibma grep râng chu Jazer châin châ ki ta; O Hesbon le Elealeh, ki mitrithi leh hin buak ki ta. Ni bu âtna le sûn lumhai hin irdoina thu an tungtir ta. 10Irhuanhaia khan a lôma raifân hmêl om ta maka, grep irhuan raifânnahai chu om thei ta maka, grep ra sôm hrang khom om ta mah. A lôma khêk irhâi inlang thei zoi ta mah. 11Khasikin ki sûnga rîlhai khom Moabhai inrenna sikin perkhuang irhâi angin ar hâi a oma, ki phîng khom Kir-heres inrenna sikin perkhuang irhâi angin a om zoi ta. 12Khanchu hiang hin ni a ti, Moab a hor lang tena chu bozôla nuama sôlin chongchai hranga a hmun irthianga a hong tena khom hlochuk no ni.
13Hi hi Moab chungchâng Rengpa’n ki kuanga a insîr chu a ni. 14Atûn hin chu Rengpa’n, “Irhloa a kum inkung kum thum sûngin Moab roiinpuina chu om ta no nia. Mi tam zaphai khom sian a thi zoi loi mi tômte an la oma, a la omhai khom ite tho thei ta no nihai,” tiin a hrila.
Currently Selected:
ISAIA 16: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
