HOSEA 14
14
Hosea’n Israel ta hrangin a ngên pe
1O Israel, Rengpa ni Pathian tiang khan kîr nôk ro, ni pualoina sika ngei ni itûk tâk a ni. 2Rengpa kuanga khan kîr nôk unglân, a kuanga khan hiang hin insîr ro: a tho’nsualna murdi kha la paiin lan a sa ka kai kha pom ro; khanchu ei hmûr rahai kha sehrât chalpa irthûlin ki hong inhlan e. 3Assuria khan ni saninhring no nia, sakor chuanghaia chuang no ning; kin kut suakhai kuanga khan, kin Pathian nin ni e, ti ual ta no ni ung. Farahai khan nangmaa hin lungkhamna an hong ihmu ngai a nia.
Israel hrangin nun thar Rengpa’n an kung
4An hnungtôlna hi indam ki ta,
Anni ata ki ninginmurna kha ar kiang tâk sikin,
anni kha lung ki ithung hrang rêng rêng a ni.
5Israel hrang khan irdorfîm ang ni ki ta,
ama kha lili angin sa a ta,
Lebanon tâng thing irzung angin a’rzung thâk irzar a ta.
6A zarhai kha inbûk ngêt an ta,
a satzia kha Oliv thing ang dên ni a ta,
Lebanon tâng angin a mirim hoi a ti.
7A’rhlîma lênghai kha hong kîr an ta,
bu angin hong hring thar an ta,
grep hrui angin hong irnoi a ta.
Lebanon Uain angin an irhming inthang a ti.
8Efraima khan millimhai le irnâina imo a inei ta hrang?
kei hi a chongchaina sâmtu ki nia,
a indingtir hrangtu khom ki ni.
Kei meisâr thing hring mur ang ki nia,
Ni ra sahai kha keima ata a ni.
Thukhârna
9Tu mo vâra hihai hi inhre thiam thei hrang; tu mo fing vâra inhre thei hrang? Rengpa lampuihai kha a dika, mi dikhai khan an izui hrang a nia; tho’nchâituhai rêk chu kha khan an irfûiin an itûk hrang a ni.
Currently Selected:
HOSEA 14: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
