JOELA 1
1
Chîmu khâi ifâk zoi, mihaiin poi an iti
1Pethuela nâipa Joela kuang Rengpa thu zuang tung kha. 2Putarhaio, hi hi inhre roi, hi rama om murdihaio, nin mikuar sung roi. Hi hi, nin zoro lai le nin puhai zoro lai khomin a om ta ngai mo? 3Kha kha nin nâihai hrilhai unglân, nin nâihai khan an nâihai hril sianlân, an nâi nôkhai khan irlo dang hril nôk thiai ri sehai. 4Thing irnge irlungin a ifâk mihlia murdi chu khâihmimsein a fâka; khaihmimse’n a ifâk mihlia murdi chu irlungin a fâk zoi, thing irnge’n a ifâk ban ka kai kha irlungin a fâk zoi. 5Inruihaio, har unglân, chap roi; uain in murdihaio, a uain thum sika khan khêk rak rak roi; nin bâi ata lapai a ni tâk sikin. 6#Thup 9.8 Nam hrât tak, tep zoiloi, ki rama a zuang suak tâka, a hâ chu kâmkeibaknei hâ ang a nia, kâmkeibaknei lian tak hapui ang a inei sa a ni. 7Ki grep hrui an siattira, ki theipui thing hôk a khêt infâi zita, a pai irhmanga; a ônhai khom a khêt invâr zoi ta.
8Dôngmate’n, bora puan boma, a sat lai pasal a isûn angin chap rak rak roi. 9Baidi inhlanhai, in hranga inhlanhai kha Rengpa in ata inboi a nia; ochai, Rengpa sinthotuhai kha an char a donga. 10Loi kha insiat a nia, ram khan a charindonga; bu kha insiat a nia, uain thar kha a kanga, hriak kha a châra. 11O nangni, loi neituhaio, inzak unglân; o nangni, grep hrui enkoltuhaio, bu le faôi sikin khêk rak rak roi; loia bu ât hrang kha ar hmang tâk sikin. 12Grep hrui kha a thêma, theipui kung kha a châra; dalim thei kunghai, tûmhai le apple thei kunghai, loia thing murdihai khom kha a chuai tâka; mihriam nâihai laia lômna kha a chuai irhmang tâka. 13Nangni ochaihaio, bora puan sil unglân, chap roi; nangni, maichâm sinthotuhaio, khêk rak rak roi; nangni ki Pathian sinthotuhaio, hong unglân, bora puan silin zân sôtin zâl roi: nin Pathian in ata kha baidi inhlan le in hranga inhlan kha khap a nia. 14Bu nghei zoro ser irthiang unglân, inkhômpui ir-up siam unglân, Rengpa nin Pathian ina khan putarhai le hi rama lêng murdihai kha hruaikhôm unglân, Rengpa kha insam roi. 15#Isa 13.6 Kha nikhua kha a chung a rike! Rengpa nikhua kha anai tâka, Itinrêng thotheitu ata irhmangna ang zuang tung a ti. 16Ei mithmua fâk hrang inboi a ini loi ma ni, a ni, ei lômna le ei lômna kha ei Pathian in ata inboipai a ini loi ma ni? 17Chîmuhai kha irnêng châr hnuaihaia khan a hmona; panghai kha a rama, fasiarhai kha insiatin a oma; a bu kha a thêm tâk sikin. 18Sial le lôihai kha an inrûm bâka na! sehrât pâlhai kha an char a donga, sûlhring hmun an nei no sikin; a ni, belra rualhai kha an chapa. 19O, Rengpa, nang kin sama: mei khan ramchâr ram hloisûl hmun kha a kâng zit tâka, mei dôn khan rama thing murdi kha a kâng fâi zit tâka. 20A ni, ramsahai kha nangma irngaiin an inphu huan huan a ni: vadungtehai kha a kang zoi tâka, mei khan ramchâr ram hloisûl hmun kha a kâng fâi zit tâk a ni.
Currently Selected:
JOELA 1: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
