EZEKIELA 47
47
Biakbuk ata tuihring luangsuak
1 #
Zak 14.8; Joh 7.38; Thup 22.1 Khanchu, mihriam khan biakbuk lûtna khan a ni hruai nôka, khanchu irngai ro, tui chu a lûtna hnuai ata kha suakin biakbuk nghana tiang nisua tiang khan a luanga. Khan tuihai chu sim tiang panga biakbuk hnuai tiang ata kha sim tiang panga maichâm omna tiang khan a luanga. 2Khanchu mihriam khan biakbuk hmun ata kha hmâr tianga dâi mikota khan a ni hruaisuaka, khanchu nisua tianga ngha dâi mikot vêla khan a ni chaipuia, khanchu ivadungte hi dâi mikot sim tiang pang ata hi a luanga. 3Khanchu ar khîna hmol leh khan mihriam khan ivadungte kha mûk sângkhat nisua tianga khan ar khia, khanchu khataka khan, kha ivadungte kha pal hrangin a ni hrila; tui kha ki kechum tena inthûk a nia. 4Khanchu mûk sângkhat ar khi nôka, khataka tui kha chu ki’rkhûk ten a nia, khanchu mûk sângkhat dang a’rkhi nôka, kha tui kha chu ki kong ten a nia. 5Kha hnung chu mûk sângkhat dang ar khi nôka, kha tui kha chu an thûk sabak tâk sikin pal thei ta ma unga, irhliai ti no’n chu irkân lam om thei ta maka.
6Khanchu ki kuang, “Mihriam nâipa, hihai hi savingin ngaitua ro,” a tia. Khanchu mihriam khan tuidung panga a ni hruai nôka. 7Kha hmun kha ki tung tena chu, ivakam inhnia khan thing tamtak hi ki hmua. 8Khanchu ki kuang, “Hi tuihai hi nisua tiang ata ram hi hroin Jordan phâizôla a lûta, khatak ata kha tuipui thia a luang lûta. Khan tuipui thia a luang lût tena chu kha tuipuia tui al kha tui irthiangin an changtir ngai. 9Khanchu tui luangna hmun tina khan ramsa chi tinrêng le ngahai om an ta, tui khan tuipui thia tuihai kha irthiangtir a ta, a luangna hmun tina hringna intungtir a ti. 10Khanchu Engedi tuihnâr ata Eneglaim tuihnârhai tena khan nga cheltuhai chu tuipui kôla khan om an ta, khataka khan an lênhai chu kaizarin phoi an ti. Khataka khan Mediteranean tuipuia nga chi tinrêng an iom angin nga chi tinrênghai chu om an ti. 11Khannisian khataka tuichir hmunhai le dialdôk hmunhai kha chu irthiangtir ni no ni, michi khurin om mai a ti. 12#Thup 22.2 Khanchu tuidung hi tiang le so tianga ivakamhai khan bua ngam hrangin thingkung chi tinrênghai mông a ta, a hnâhai chu itiklai khom thêm no nia, ra insua loiin om no nihai. A tha tin ra thar nei mai an ti. Biakbuk ata tui zuang luangsuak khan an fâhai sikin. Thingkunghai khan fâk hrang insua an ta, an hnâhai chu mihai damna hrangin hmang ni a ti,” a tia.
Ramri irzêk dân
13 Rengpa Pathianin hiang hin a ti, “Israel nam sôm hleihnihai kuang irchon hranga ram ni izêk hrang dân chu hiang hin ni a ti. Josefa namhaiin tum hni an idong hranghai leh khan. 14Nin irchibulhai kuang khan hi ram hi inluatirhai hrangin chong ki len kung tâk sikin, atûn chu ir-angsarin nin rêngin irsem ta roi. 15Hmâr tianga ramri chu Mediteranean tuipui ata kha nisua tiang panin Hethlon khopui le Hamath panna lampui tianga fe, Zedad khopuia a suaka. 16Hamat le Berotha-ah fe zêl a ta, Hamat le Damaska irdîna Sibraim fe thengin Hauran ramria Hazerhatikon dênin fe a ti. 17Hmâr tianga ramri chu Mediteranean tuipui ata kha Enon khopui nisua tiang a fea, Damaska le Hamath ramri hmâr tiang khan a suaka.
18“Khan nisua tianga ramri chu Damaska le Hauran ramkâr ata kha sim tiang panin a fea, Jordan dung kha Israel le Gilead ramria omin Israel chu nitâk tiang a oma, Gilead chu nisua tiang a oma; khanchu tuipui thia Tamar#47.18: Lei irhlet senkhata chu Tamar ti a nia. Heb tiang chu fel mah hmun a va suna. 19Khanchu sim tianga ramri kha sim tianga nitâk dep tiang irkhô riaiin Tamar ata kha Meribath-kadesh tui omna hmun ten kha a nia. Khanchu hmâr tianga nitâk dep riaiin a fe nôka, Aigupta ramri zuiin Mediteranean tuipui ten kha a ni. 20Khanchu nitâk tianga ramri chu Mediteranean tuipui zel kha a ni, hmâr tianga Hamath fena lampui nitâk tiang dep ten kha a ni. 21Hi ram hi nir chihai kuang khan sem ro; 22hihai hi kumkhua irchon hrang chu ni a ta, khanchu ram dang mi nin laia om nâi le tehai lei nei tâkhai khom khan ram kha nin irsem tena anni khomin dongtum nei an ti. Anni chu Israel mihai anga tep sa ni an ta, Israel mihai laia khan tasân pumin ram kha anni’n dong an ti. 23Ram dang mihai khan an omna hmuna mihai leh khan an dongtum chu hmu seng an ti. Kei Rengpa Pathian hin ki ihril a ni hi,” a tia.
Currently Selected:
EZEKIELA 47: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
