EZEKIELA 46
46
Roirêltu le kûthai
1Khanchu Rengpa Pathianin hiang hin a tia, “Tualzôl sûnginta ual dâikot nisua tianga ngha kha a sinthôna nikhua sûn ruk sûng chu khâr ni a ta, khannisian sabat nî le tha thar nî chu inhong ni a ti. 2Khan rêng chu dâi mikot bokrop lampuia khan lût a ta, dâi mikot chopui kôla khan ngîr a ti. Khanchu ochaihai khan hâlirvôm thilinhlan le irngeina thilinhlan chu inhlan an ti. Dâi mikot bokropa khan Pathian biak a ta, khanchu fesuak nôk a ta, khannisian khohloi tena chu dâi mikot kha khâr ni no ni. 3Khanchu, sabat nikhuahai le tha thar de nîhai chu, kha rama mipuihai khom khan Rengpa chu dâikot lûtna khan chubai an imûk hrang a ni. 4Khanchu sabat nî chu rêngin Rengpa makunga hâlirvôm thilinhlanna hrangin belrate kiruk le belrachal inkhat chôi a ta, an rêng khan demnaboi an ini hrang a ni. 5Khanchu bu thilinhlan belrachal le pêk hranga khan epha khat ni a ta, khanchu belratehai le bu thilinhlan pêk hranga om chu a nuam dôr ni a ta, khanchu epha khat sahriak inkhat seng chôi sa ni a ti. 6Khanchu tha thar kût zoroa, sehrâtchal tuai inkhat, belrate kiruk le belrachal inkhat inhlan an ta, an rêngin demnaboi ni a ti. 7Khanchu sehrâtchal tuai leh khan epha khat pe sa a ti. Belratehai leh khan a nuam dôr pe a ta, khanchu epha khata sahriak inkhat seng pe sa a ti. 8Khan rêng kha a va lût tena chu dâikot bokropa khan fe a ta, khataka ngêt khan suak nôk a ti.
9“Khan kût zorohaia, Rengpa biak hranga mipui hongtuhai chu, hmâr tiang dâikota an lûtin chu an biak zoi le sim tiang dâi mikota khan suak an ta, sim tiang dâi mikota lûttuhai chu hmâr tianga dâi mikota khan suak an ti. Tukhom a lûtna tiang dâikota khan suak thei ni no ni, a maton tianga fe pat hrang a ni. 10Khan, rêng chu mipuihai an lût zoroa hong lût ngai a ta, an suak tena suak nôk ngai a ti. 11Khanchu kûtnahaia le zoro bîk nei kûtnahaia khan bu thilinhlan chu sehrâtchal inkhata khan epha inkhata, belrachal tuai inkhata epha inkhat, belrate pe thei a ta, epha khata hriak litar inthum zêl a ini hrang a ni. 12Khanchu roirêltu rêng khan Rengpa kuang mani, nuam thua hâlirvôm thilinhlan mani, irngeina thilinhlan mani a pêk nuama ni’n chu, a ta hrangin nisua tianga tualzôl sûnginta ual dâikot kha inhong ni a ti. Khanchu sabat nikhuaa a itho dân ang khan inhlan a ta, khanchu dâikot kha a suak zoi tena khâr nôk ni a ti,” a tia.
A nî tina thilinhlan
13Khan Rengpa’n, “A zîng tin Rengpa kuang hâlirvôm thilinhlanna hrangin belrate kum khata mi demnaboi chu pêk ni a ta, hi thilinhlan hi a nî tina tho ngêt hranga om chu a ni. 14Khanchu a zîng tin baidi thilinhlan khom pe sa ni ta, epha hmun ruka zêkin hmun khat le, sahriakin hmun thuma zêkin hmun khat baidi leh irzêl hranga khan. Khanchu kumkhontuangin Rengpa kuanga baidi thilinhlan hi dânin om mai ta a ti. 15Khanchu belrate, baidi le sahriakhai hi kumkhontuangin Rengpa kuang a zîng tin inhlan ni mai ta a ti,” a tia.
Reng le ramhai
16Khan, Rengpa Pathianin hiang hin thu a pêka, “Roirêltu rêngin a ram chu nâipasal a tu kuang khom thilpêk a pêka ni’n chu, khahai kha a nâipa in mihai irchon chu ni ta a ti. 17#Lev 25.10 Khannisian, roirêltu rêng khan a ram chu a sinthotuhai laia a tu khôk mani kuang a pêka#46.17: Jubili kum, kum 50 danha an nei ngai, an hmang hrang dân chu Lev 25.8-55-ah khan a chuang. ni’n chu, kha ram kha zalênna kum a hong tung nôk tena chu an rêng ngêtin hong om nôk a ti. Ama ta a nia, ama le a nâipasalhai vaiin dong ta tak thei an ti. 18Khan roirêltu rêng khan mipuihai irchon rêng rêng anni ata a ilâkpai viat hrang ni maka, a nâipasalhai kuang ram a ipêkhai chu ama ta hranga ram inkunga omhai ta kha a ipêk hrang a ni; ki mipuihai chu an ramhai sutpaia deng an theitirhai loina hrangin,” a tia.
Biakbuk buhmun in
19Khanchu, mihriam khan hmâr tianga ngha tentan lûtna tualzôl sûnginta ual sim tianga dâikot kôla khan a ni hruaia. Hihai hi ochaihai ta hranga tentan irthianghai chu an nia, khanchu tentanhai nitâk tianga om hmun chu a nir hmua. 20Khanchu ki kuang, “Hi hi a ni ochaihaiin sual ta hranga thilinhlan le tho’nsualna thilinhlan hmehai an suangna hrang le baidi thilinhlanhai an ir-emna hrang chu, thil irthiang rêng rêng tualzôl pêninta uala khan a hong chôi loina hrangin,” a tia.
21Khan tualzôl sûnginta uala khan a ni hruaia, tualzôl minlia khan a nin fetira, khan irngai ro, kha irhuan irki tina khan tualzôlhai a oma. 22Irhuan sûng tualzôl irki minlihai khan irkul khom mûk sômminlia sei, mûk sômthuma lian hi a oma; hi a’rki minli hin irtiat nat an ni. 23Khanchu tualzôl tin khan ar hîlin lung bang hi a oma, bang depa khan mei thôna hmunhai hi siamin a oma. 24Khanchu mihriam khan ki kuang, “Hihai hi buhmun inhai chu an nia, mipuihaiin thilinhlan an ipêkhai kha biakbuka sinthotuhaiin an isuangna hrang hmun chu a ni,” a tia.
Currently Selected:
EZEKIELA 46: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
