FESUAKNA 5
5
Aigupta rêng makunga Mosia le Arona an ngîrna
1Khanchu Mosia le Arona chu Aigupta rêng kuanga an fea, Faroa kuang khan, “Rengpa Israelhai Pathianin hiang hin a ti, ki mihai hi ramchârna hmuna infetirhai ro, kût an hmang theina hrangin a ti,” an tia. 2Khan Faroa’n, “Tu mo a inih Rengpa nin iti chu, a thu zôma, Israelhai infetirna hranga nin iti? Rengpa nin iti khom inhre ma ung, Israelhai khom infetirhai no ning,” a tia.
3Khanchu anni khan, “Hebraihai Pathianin a ni zuar tongpui nôk ta, khasikin ramchâr sûn thum fena lam inzinna son, Rengpa kuang kin va irbôl theina hrangin nin fetir ro, an tia. Kin tho no’n chu kin chunga hin chem hrei a ni no le hripui inlêngin a ni ithat zoi hrang a ni,” an tia. 4Khanchu Aigupta rêngin an kuang khan, “Itina mo Mosia le Arona hi mipuihai sintho nin inchâihai ngai? nin sin kha van sintirhai chian roi,” a tia. 5Khanchu Faroa’n, “Hi rama hin nin pungin nin tam tâk sikin, nangni ruai hin an puak rik pêl hi nin irngamtirhai ngai”, a tia.
6Hi nî sûn ngêta hin Faroa’n a enkoltu a hruaituhai kuanga khan, 7“Atûn ata chu pilrôngar (ita) siamna hrangin fapon khom zongin pehai ta no roi, an bingin irfuanghai sian buk khôm ta ri sehai. 8Khannisianlân, pilrôngar matona an isin dôr ngêt la sin hrangin ti pehai roi, intôm viat no ri sehai, an irtha a boi sika kêng, ‘Kin Pathian kuang va’rbôl kin ti,’ an iti. 9Khasikin hi nêka tama sin hrangin inphûthai unglân, irlêmin sin zong loi hrangin ti pehai roi.
10“Khanchu an hruaitu, enkoltu pâlhai chu an fea, mi sinthotuhai kuang khan, ‘Faroa’n fapon nangni pe ta no ning’ a ti. 11Nin bingin fapon khom nin ihmu theina hrang taka va zong unglân, nin sintho hi a irkai ual hrang khom ni mah a ti,” an tia. 12Kha tena chu sinthotuhai chu Aigupta ram pumpuia fapon zongin an chaia, 13khan a hruaitu enkoltu pâlhaiin, “Matona pilrôngar nin isin dôr ngêt, a sûn tin nin la isin mai hrang a ni,” tiin an tuarhai maia. 14Khanchu, Faroa sin enkoltuhai khan Israelhai laia hruaituhai kha an vîkhaia, “Itina mo mizân le a vuan sûnhai ten hin matona nin sûn khat sin lua nin iphâk ta loi,” tiin an halhaia.
15Khanchu Israel irchi laia an hruaituhai chu Faroa kuang an va fea, “Itina mo hiang dôr hi teh keini ni sinthotuhai hi, ni nin phût tâka? 16Ni sinthotuhai hi fapon ite ni pe ta loiin ni oma, pilrôngar siam roi, ni ni tia, neinun boiin, irngai roh ni sinthotuhai hi an ni vîka, ni mihai an pua no sikin iti,” an chardong thu an va hrila. 17Khannisianlân ama khomin, “Nin irtha a boi, nin irtha a boi, hi sika kêng hi irphialna zonga Rengpa kuang va’rbôl hrang nin iti ngai a ni,” a tia.
18Khasikin fe unglân sin va zong roi, fapon chu nangni pe ta no ning, khannisianlân pilrôngar sin hranga nangni an inphût zât chu nin isin ngêt hrang a ni, a tia. 19A nî tina pil nin ihâl ite a irkôm thei ual hrang ni ma, an ti an hriata, Israel hruaituhai chu an vânduai bîk iti an irhriat suaka.
20Khanchu Faroa kuang ata an hong kîr nôk tiang chu Mosia le Arona lampui kôla ngîr an hmuhaia; 21khanchu anni kuang khan, “Rengpa’n nangni ompui sian, Pathianin roirêl theina nangni innei ri se, keinihai ni thatna hrangin an kuta chem hring chôiin Faroa mit hmua, an ni ilo a ni ta,” an tia.
Pathian kuanga Mosia a nuar
22Khanchu Mosia chu Rengpa tiang thîrin, “Rengpa itho mo hi mihai hi ni isoisakhai? Itho hranga ni ni itîr mo? 23Faroa kuanga nir hminga thuhril hrangin ni ni tîr ata, Faroa’n hihai chunga hin nunsiat a hmanga, nang lakin ni mihai hi la sansuakhai mai mak chea,” a tia.
Currently Selected:
FESUAKNA 5: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
