FESUAKNA 6
6
1Khanchu Rengpa’n Mosia kuang khan, “Atûn chu Faroa chunga ki itho hrang hi hmu ta ni ti: Ki kut hrâtna sinin ki mihai infetir a ta, ki mihai a ram ata insuakhai ta a ti.
Pathianin Mosia a koina
2 #
Irp 17.1; 28.3; 35.11; Fes 3.13-15 Khanchu Pathianin Mosia a koia, “Kei Rengpa ki ni: 3Abrahama kuang, Isaka le Jakoba kuanga khom Pathian itinrêng thothei kin lâr pehaia, khannisianlân Jehova ki nih tiin chu la’nlâr pehai ma ung. 4Khan anni kuang khan chu, Kanaan ram, zoro sôtnotea an lei mikhualna ram pe hrang thu ki lei irthungpuihai tâka. 5Atûn chu Israelhai khêk irhâi, Aigupta haiin suak anga an ihmanghai lai hin, ki thu lei thung kin hriat suak ta. 6Khasikin Israel irchihai kuang khan ‘Kei Rengpa’n Aigupta rama nin suak puak rik pêlna ata nangni hruai suak ki ta, an suak chang ta no chin ni. Ki kut hrât tak hmangin dengintheitirhai ki ta, nangni chu nangni hruai suak ki ti. 7Khanchu ki mi ni ta nin ta, kei nin Pathian ni ki ti; khanchu keima hi nin Pathian Rengpa Aigupta hai suak nin changna ata hruai suakpu ki nih ti inhria ta nin ti. 8Abrahama, Isaka le Jakoba ki lei ipêkhaina ram hi nangni’n hong lua nin ta, nin irchon ni ta a ti: Kei Rengpa ki nih tiin hril ta nin tih a tia. 9Khanchu Mosia’n kha thu kha Israel irchihai kuanga a va hrila, khannisianlân an lungrîl sôl sikin le dengthei hrai tâk sikin Mosia thu irngai thei mahaia. 10Khanchu Rengpa’n Mosia kuanga, 11“Va fe’n lân, Aigupta rêng Faroa kuang, Israel irchihai hi a ram ata insuahai ta ri se, va ti pe’n lân,” a tia.
12Khanchu Mosia’n Rengpa kuang khan, “Irngai ro, Israel irchihai lua’n ki thu hril irngai nuam mahaia, keima mi chong ak hi Faroa len vângin chu a’rngai lua le’rngai nuam no ni?” tiin a hrila. 13Khanchu Rengpa’n Mosia le Arona kuang khan, “Aigupta ram ata ki mi Israelhai hruaisuak hrangin thu nangni ki pêk tah ti hi Israelhai le Aigupta rêng va hril roi,” a tia.
Mosia le Arona’n Israel mi hruaituhai irhming an irziakna
14Khanchu hihai hi Israel nâilutîr tak Reubena irchihai chu an ni. Hanoka, Palua, Hezrona, le Karmia hai hi an ni, hihai hi Reubena nam irtihai an ni. 15Khan Simeona irchihai chu Jemuela, Jamina, Ohada, Jakina le Zohara, Kanaan nupangnu le a nâi Saula hai hi an ni, anni hi Simeona nam irti an ni. 16#Nam 3.17-20; 26.57-58; 1 Tsn 6.16-19 Khanchu hihai hi Levi irchihai chu an ni, Gersona, Kohatha le Meraria hai an ni; Levi dam sûng kum chu 137 a ni. 17Khanchu an nam ang takin Gersona nâihai chu Libni le Simeia hai an ni. 18Kohatha nâihai chu Amrama, Izhara, Hebron le Uziela hai an ni; Kohatha dam sûng kum chu 133 a ni. 19Meraria nâihai chu Mahlia le Musia an ni. Hihai hi an irchi fe dân anga Levi nam irtihai an ni.
20Khan Amrama’n chu a pa farnu Jokebedi dôngma’n a neia; khanchu Arona le Mosia a neipuia, Amrama dam sûng kum chu 137 a ni. 21Izhara nâihai chu Kora, Nefega le Zikri hai an ni. 22Uziela nâihai chu Misaela, Elzafana le Sithria hai an ni. 23Khan Arona’n Aminadaba nâinu, Nasona farnu Elisebi dôngma’n a neia; Nadaba, Abihua, Eliazara le Ithamara a neipuia. 24Kora nâihai chu, Asira, Elkana le Abiasafa hai an ni; hihai hi Kora nam irtihai chu an ni. 25Khan Arona nâipa Eliazara chu Putiela nâinupang laia inkhat dôngma’n a neia, Finehasa a neipuia. Hihai hi a nam fe dân anga Levi irchibulhai chu an ni.
26Hihai hi kêng Arona le Mosia Rengpa’n ki mi Israelhai “Aigupta ram ata hruai suak roi, a iti pehai,” an ni. 27Hihai hin kêng Aigupta rêng Faroa va chongpuia, Israel irchihai chu Aigupta ram ata suak hranga va hriltu chu Mosia le Arona hai hi an ni.
Mosia le Arona kuanga Rengpa thupêk
28Khanchu, hiang hin a hong nia, Aigupta rama Rengpa’n Mosia a koi ni khan, 29Rengpa’n, “Kei Rengpa chu ki ni: Aigupta rama rêng Faroa kuang khan, ni kuanga ki ihril murdi hi va hril pe ro,” tiin Mosia kha a hrila. 30Khan Mosia’n Rengpa kuang khan, “Irngai roh kei chu chong ak ki nia, khasikin keima chong hi itin mo Faroa’n a lei irngai hrang?” a tia.
Currently Selected:
FESUAKNA 6: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
