FESUAKNA 4
4
Pathianin Mosia thilirkhêl tho theina a pêk
1Khanchu Mosia khan, Rengpa kuanga, taksônloiin ki hê la no nihai, “Rengpa khom ni makunga nan lâr pe no ni, an ti ngânin te,” a tia. 2Khanchu Rengpa’n, “Ni kuta ni intûk kha i mani?” a tia. “Khianghrol,” a tia. 3Khanchu Rengpa’n “Hnuaia khan lei pai ngân ta,” a tia. Khanchu a paia, voikhat zelin mirûl a hong chang pea, an tânsan ta. 4Khanchu Rengpa’n, “Ni kutin zu’nbanin lân, a’rmei khan zu chel ro,” a tia. Khanchu a zu’nbana, a chelin chu khianghrol a chang pe nôk ta. 5Rengpa’n nin irchibulhai Abrahama Pathian, Isaka Pathian le Jakoba Pathian chu nangma kuanga khom nang a ompui ti an inhriat theina hrangin, a tia. 6Khanchu Rengpa’n ni kut leh khan, ni rôpa khan zu thun nôk ro, a tia, a zu thuna a hong kêlsua nôkin chu a kut chu ivur anga vâr ngoiin a phar suaka. 7Ni kut kha zu thun nôk roh a ti pe nôka, khanchu a zu thun nôkin chu a pum danga a taksahai ang dênin a om pe nôk ta. 8Khanchu Pathianin, thilirkhêl voikhatna kha ni thoa nang an iam no le khom, voihnina nir hmuhai tena chu nang iam ta an ti. 9Khanchu kha irsinsiana inhni kha an iam noa, ni ihril tak an sôn no’n chu, tui luang tui zu thâlin lân, irnêng chârna buakin lân: kha tui irnêng châra ni ibuak kha thisen hong chang a ti, a tia. 10Khanchu Mosia’n Rengpa kuanga, “O Rengpa ni tîr no ro, kei chu maton ata mi chong thei ni ma unga, mi chong ak mi ki lei ni sikin,” a tia.
11Khanchu Rengpa’n, “Mihriam hmûr hi tu isiam mo ni isôn, mikuar sêthai, mit vârhai, mitchôhai hi tu itho mo a ini? 12Khasikin fe zelin lân, ni hmûr chu keima hmûr ni a ta, ni ihril hrang khom nang ti pe thiai ki ti,” a tia. 13“Ni mah Rengpa mi dang tîrhai ro,” a tia.
14Kha tena chu Rengpa kha Mosia chunga a milung hoi pe maka, “Ni upa Arona Levi irchia mi a iom mo ni ma? Ama chu chong âng khom a theia, irngai roh nang a don hrangin a hong, nang a hmu’n chu a sân lômin a raifân a ta. 15Khasikin nangma’n chongpui masa’n lân, ki thuhrilhai kha hril pe vingin lân, ni hmûr le a hmûrhai chu keima’n nangni ompui ki ta, nin iti hranghai khom, nangni intitir ki ta. 16Khanchu Arona kha mipui laia ni thuhril irhlettu chang a ta, nangma hrangin ni hmûr ni bâi nang chang pe a ta, nangma chu ama hrangin a Pathian angin om ni ta. 17Khanchu nangma’n, hi khianghrol hi chôi ni ta, kha leh khan irsinsiana thilirkhêlhai ni itho hrang a ni,” a tia.
Aigupta rama Mosia kîr nôkna
18Khanchu Mosia chu a tarpu Jethroa kuang a kîr nôka, “Aigupta rama ki urêng omhai so a dam a harin mo an la om lungkham takin nin fetir ro,” a tia. Khan a tarpu Jethroa khomin “Irtharngam takin va fe ro,” a tia. 19Khan Rengpa’n Midian rama Mosia kuanga khan, “Fe’n lân, Aigupta rama va kîr nôk ro: nang a that hranga irsiamhai kha an thi zoi ta,” a tia. 20Khanchu Mosia chu a dôngma le a nâihai a hruaihaia, sakuartung chunga an chuangtirhaia, Aigupta rama an kîr nôk ta. Mosia khan Pathian khianghrol kha a chôi maia.
21Khanchu Rengpa’n Mosia kuanga khan, “Aigupta ram ni tung tena chu ni kuta thilirkhêl nang ki inchôitirhai hi Faroa mit hmua irlangtir ngêt ro, khannisianlân, a milung inliantir pe ki ta, khanchu mihai kha insuatirhai no ni. 22Khan, nangin Faroa kuanga khan, ‘Rengpa’n, Israel hi ki nâipa ki nâi lutîr a ni: 23#Fes 12.29 khan ki nâipa’n ki sin a tho theina hrangin insua roh ki tia, nuam mak chea, ni nâipa, nâilutîr thatpai ki ti, a ti ti ro,’ a tia. 24Khanchu hiang hin a hong nia, lampui riakbuka khan Rengpa’n Mosia chu a’rtongpuia, that a tuma. 25Khan Zipori’n lung bavo a lâka, a nâipa servun a tana, Mosia ke an tôn pea; khanchu Mosia’n, ‘Ki ta hrangin pasal thisen insuak ngam mi ni nih,’ a tia. 26Khasikin, ‘Sertan sikin pasal thisen insuak ngam ni nih,’ a tia.
27Khanchu Rengpa’n Arona kuang khan, “Mosia va don hrangin ramchârna hmuna son va fe ro,” a tia. Khanchu a fea, Pathian tânga khan a va hmua, a tum ta. 28Khan Mosia’n Rengpa’n a itîr nasan le thilirkhêl tho roh a iti murdi a hrila. 29Khanchu Mosia le Arona’n Israel irchi ulianhai kai chu an koi bukhaia: 30Khanchu Rengpa’n Mosia kuanga a ihril murdi kha Arona’n a hril pehai vinga, mipuihai mit hmua thilirkhêlhai kha a’rhmuhaia. 31Khanchu mipuihai khan tak an sôna: Rengpa’n Israel irchihai chu a ompuihaia, an dengthei lamhai Rengpa’n a ni hmu mai a nih iti an irhriat suakin chu an lu kûnin, chubai an mûk ta.
Currently Selected:
FESUAKNA 4: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
