FESUAKNA 3
3
Pathianin Mosia a koina
1Khanchu Mosia chu a tarpu Jethroa kêlbelra rual enkolin a oma, sûn khat chu ramchârna tâng tiang kêlbelra hôlin a fea. Khan, Pathian tâng an iti Horeb a va tungin chu; 2#Tîr 7.30-34 Rengpa vântirtôn kha a kuang, chînribuka meichokin a zuang inlâr pea, a hong enin chu chînribuk kha a choka, khannisian, kâng maka. 3Khan, Mosia’n “La va irthîn ual hi rong, itina mo chînribuk so a ikâng zoi thei loi, hi thilirkhêl hi la van fel hi rong,” a tia. 4Khan, Rengpa Pathianin a var thîn kha a hmua, Pathianin chînribuk ata kha a hon sama, “Mosi, Mosi, a hong tia. 5Hong nâi no ro; ni kea kekok kha khek ro, ni ngîrna hmun kha hmun irthiang kêng a ni,” a tia. 6Khan kei hi ni pa Pathian, Abrahama Pathian, Isaka Pathian le Jakoba Pathian kha ki ni, a ti pe nôka. Kha tena chu Mosia kha a hmâi a thupa; Pathian a en ngam loi sikin.
7Khanchu Rengpa khan, “Aigupta rama ki mi omhai dengthei taka an om kin hriata, annihai enkoltuhaiin deng an intheitirhaina irhâi ki le’nhriata; an beidongnahai khom kin hriat. 8Khasikin Aigupta mihai kuang ata hruaisuaka inzôkhai hrang le, kha ram mâksana, Kanaan hai, Hit hai, Amor hai, Periz hai, Hiv hai le Jebus hai omna ram sa le lian tak, khuaitui le dût tui luangna rama hruai suak hrangin ki zuang isuak a ni ta. 9Israel irchihai khêk irhâi, Aigupta-haiin an hnuaisiahai lam kha ki hmuhai maia. 10Khasikin nang ki tîr, ki mi Israel irchihai Aigupta ram ata hruai suakin, Faroa kuanga fe ro,” a tia.
11Khan Mosia’n Pathian kuang khan, “Keima Faroa kuanga zu fea, Israelhai Aigupta ram ata zu hruai suakhai hrangin ite chukna nei mo ni ni isôn?” a tia.
12Khanchu, Pathianiin “Keima ni kuang om mai ki ti, nang ki ompui ti inhriatna’n hi hih irsinsia ro: Aigupta ram ata ni hruai suakhai zoiin chu, hi tânga ngêt hin Pathian sin nin la itho hrang a ni,” a tia. 13#Fes 6.2-3 Khanchu Pathianin Mosia kuang khan, “Irngai ro, Israel irchihai kuanga zu fe’n lân, nin irchibulhai Pathianin a ni zuang itîr a ni; zu ti’n lân. Anni’n tu mo a ini, imo a’rhming an ti’n te? itin mo ki iti pehai hrang nir hming an nir donin te,” a tia. 14#Thup 1.4-8 Khanchu, Pathianin Mosia kuang khan, “Kei chu ‘OMA KI NI’, a tia. Khanchu nangma’n Israel irchihai kuanga khan, OMA khan nangnihai hruai suak hrangin a ni zuang itîr a ni, ni iti hrang a ni,” a tia.
15Khanchu Pathianin Mosia kuang khan, “Nangin Israel irchihai kuanga khan, Rengpa nin irchibulhai Pathian Abrahama Pathian, Isaka Pathian le Jakoba Pathianin nin laia hin a ni zuang itîr a ni, hi hi kumtuanga ki’rhming hrang chu a ni, nin irchihai tenin nin nin hriat mai hrang a ni ti roh. 16Fe’n lân Israel ulianhai buk khômhaiin lân, Rengpa nin irchibul Pathian, Abrahama Pathian, Isaka Pathian le Jakoba Pathianin nangni ki zuang pan a ni hi, Aigupta mihaiin nin chunga nangni an ilo lam hi ki hmu ta. 17Aigupta rama dengthei taka nin iom hi, nangni hruai suak ki ta, Kanaan hai, Hit hai, Amor hai, Periz hai, Hiv hai le Jebus hai ram khuaitui le dût tui luangna rama nangni hruai lût ki ti, ki lei iti kha tiin ki kuang a zuan lâr a ni; zu ti’n lân.
18“Khanchu ni chong le’rngai an ta; khanchu Israel ulianhai le nangma Aigupta rêng kuanga fe unglân, a kuanga khan, Rengpa Hebraihai Pathianin a ni zuang irtongpuia; khasikin ramchârna hmuna, sûn thum fena lampuia son Rengpa kin Pathian kuanga kin va irbôl theina hrangin lungkham takin nin fetir ro; va ti unglân. 19Khanchu Aigupta rêngin nakhrât nin song no’n chu nangni phal no nih ti khom kin hriat. 20Khanchu ki kut phar ki ta. Aigupta-hai laia thilirkhêl tak, ki thil thotheinahai hmangin tuang an ta, kha tena kêng nangni a la insua hrang. 21#Fes 12.35-36 Khanchu hi mihai hi Aigupta mihaiin inrenhai an ta, nin suak tena khom kut korongin suak no chin ni. 22Nupang om murdi’n an khua le tui murdi’n sumtaka irvônahai, rângachaka irvônahai, sil le kai, nin nâi le tehai khom tamtak Aigupta rama irchon nin isuakpui hrang tâk a ni,” a tia.
Currently Selected:
FESUAKNA 3: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
