FESUAKNA 36
36
1“Bezalela, Oholiaba le kut sintheihai pâl, Rengpa omna puan ina hrang thil nang murdi sinsiam theina le vârna Rengpa ipêkhai khan, a thupêk ang takin itinrêng an isiam hrang a ni,” a tia.
Mihaiin thilpêk an pêk intam
2Mosia’n Bezalela, Oholiaba le Rengpa’n theina a ipêk le sinzong nuam kut sinthei pâlhai kha a koia, sin phut hrangin a hrilhaia. 3Puan in irthiang sinna hranga Israel mihai thilpêk hong chôi kha Mosia kuang ata an idong a ni. A zîng tin Israel mihai khan an thilpêkhai Mosia tah hrangin an la hong chôi irzôm maia. 4Mi kut sintheihai khan Mosia kuang an fea, 5“Rengpa’n hmun irthianga sinthôna thil siam hranga a itih dân kêng mihaiin an hong ipêk a ni,” an tia. 6Khanchu Mosia kha riakbuk hmun tina khan tukhomin puan in irthiang sinna hranga thilpêk inhlanna nei ta loi hrangin thupêk a sema; khanchu mihaiin thilpêk an hong ichôi ta loi a ni. 7Hong chôi saia om tâk lua kha a nang murdi sinna hranga nang nêkin a itam ual a ni ta.
Rengpa omna puan in sinna thu
(Fes 26.1-37)
8Sinthotuhai laia a kut irloi ualhai khan Rengpa omna puan in chu an sina, patzâi irhmi, samul rông dum, a senduk le a seninlâr cherub dûr ze enhoi taka zepa không hlek sôm hranga siam. 9Puanzâr chu a sei lam mûk sômhni kiriat, puanzâr chu a khang tiang chu mûk minli seng a ni; puanzâr murdi chu a irtiat zit a ni. 10Khan, puanzâr ringa kha chu an suiirzom zita, puanzâr ringa danghai khom an suiirzoma. 11Khan, puanzâr buk tina a hmor taka khan a rông duminpôlin a sina, khaang dên khan a puanzâr hmor letianga irkopa khan a sin saa. 12Phêk tin hmora khan hlam sômringa nângval irkopin, a’rdîntaka phêk inhnina khom khan nângvalin sômringa dang inkhop sai. 13Phêk hni kha inkhata siam hrangin a’rkoptirna hrang rângachak kuaikim sômringa an siama. 14Puan in chung chu kêl mula siam puan hlek sômhleikhatin a siama. 15A rêngin irangnatin a dung mûk sômthum le a khang mûk minliin a isiam a ni. 16A phêkin ringa ngain an insui irkoptira, kiruk danghai khom phêk danga an inkhop sa. 17Phêk khatna sîr tiang khan irkual sômringa le phêk inhnina sîrtaka lekha khan nângval sômringa an inkhop sa a ni. 18In chung inkhata siam hrangin phêk hnihai insui irkoptir hrangin dâr kuaikim sômringa an siama. 19A chung thuaa hmang hrangin kêlbelra chal vun sen le savun a sazât chi an siama.
20Khan, biakbuk bang intunghai chu sitim thingin a siama. 21Thingphêk tin a sei tiang chu mûk sôm, thingphêk tin a khang tiang chu mûk khat le a chimrip a ni. 22Thingphêkhai kha hmunkhata irzom theina hrangin a’rlûtmat thei, a kîm inhni a oma, a rêngin a kîm an inneitirhai chit a ni. 23Sim tianga intung hrangin sômhni, 24an toina hrangin a sûng ir-ông sumrua inluan sômminlia kîm inhnia chel indetna nei chitin, an toina hrang inhni an isia sa a ni. 25Hmâr tianga puan ina intung hrang phêk sômhni, 26an toitirna hrang sumrua siam sômminli, phêk khat hnuaia inhni hni toina siam sa a ni. 27Nitâk tianga puan ina intung hrang phêk ruk, 28a kil tianga hrang phêk hni an isiam a ni. 29Hi a kila hai hi a bula irzomtir a ni, a sîp dêna irzomtir a ni. 30Khaangin chopui kiriat, sumrua inluan an toitirna sômhleiruk, inkhat hnuaia toina hrang inhni hni a iom chit a ni.
31A bang tung tianga indettirna hrangin tângkhang hrang sitim thingtuai sômhlei ringa, 32hmâr tiang banga, sim tiang banga, a hnung tiang nitâk tianga banghaia khan ringa ngain an khanga. 33a tângkhang inlaina taka khan a tung tianga a laitaka khang khan, puan in hmor inhni khan an irtongtir a ni. 34Thingbuk intunghai chu rângachak tuiin an inluana, a tângkhang danghai indetna hrangin rângachak irkual an inkhopa, annihai khom khan rângachaka inluan a ni.
35Patzâi irhmi samul rông dum a senduk le a sen irzêl cherubhai dûr zia enhoi taka zepa không chu chontan puanzârin an hmanga. 36Sitim thing chopui minli puanzâr indettir hrang rângachak inluanin an phuna, rângachak kuaikim an inkhopa, chopuihai phûmna hrang sumrua inluan toina minli an siam sa. 37Puan in mikota târ hrang patzâi irhmi thûr sai samul dum, a senduk le a sen irzêl, a’rvô enhoi tak puanzâr an khônga. 38Hi puanzâr hranga hin sitim thing chopui ringa kuaikim inkhop, a sîphai le puan banga hrang khianghrol tuan rângachakin an inluana, a chopui intoina hrang dâr thîr ringa an siam sa.
Currently Selected:
FESUAKNA 36: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
