FESUAKNA 35
35
Sabat hmang hrang dân
1Mosia’n Israel nam pumpui a koi bûmhaia, an kuang, “Hi hi nangni sin hranga Rengpa thupêk a ni: 2#Fes 20.8-11; 23.12; 31.15; 34.21; Lev 23.3; Dhn 5.12-14 Mâni sinthôna hrangin sûn ruk reng nin inei a ni, sûn sarina ni chu irngam nî sûn irthiang, keima Rengpa hranga serir-up hrang a ni. Mi tukhomin ser loia kha nî sûna sin zong chu that hrang a ni. 3Sabat ni chu mei ten lua in sûnga khom nin itho hrang ni ma,” a tia.
Rengpa puan in sinna hranga tholôm
(Fes 25.1-9)
4Mosia’n Israel mipuihai laia, “Rengpa thupêk chu hi hi a ni; 5Rengpa kuanga thilinhlan nei roi, tukhom a’rhlan nuamhai chu thilinhlan rângachak, tangka dârthîr, 6patzâiirhmi thûr sai, a dum, senduk le sen samul puan, kêl mula siam puan; 7kêlbelra chal a vun sen, savun a sazât, sitim thing; 8meisera hmang hrang oliv hriak, irthu theina sahriak, hâl hrangin thil mirimhoi; 9ochai Efod le a kôlvêla onik lung le lungmantamhai hong chôi roi.
Rengpa omna puan ina sia hrang thilhai
(Fes 39.32-43)
10“Nin laia kut theithiamna nei murdi’n hong irsiamhai sian, Rengpa’n thu a ipêk murdi sin hrangin; 11puan in a chung irkhûna le, hnuai inta ual inkhopna le thingtuai tângkhang, a chopuihai le a bangbul intoinahai; 12Thuthung Bôm zônfunghai, a sîng le a dâihlîm hrang puanzâr; 13dokâng zônfung le hmangrua dang a rêngin; Pathian kuanga inhlan bai, 14hâl invâr hrang meiser siana le hmangruahai; meiserhai le a tui, 15thil mirimhoi hâlna hrang maichâm le a zônfunghai, irpol zât sahriak, thil mirimhoi, puan in kotbâia sia hrang puanzâr; 16thilinhlanhai hâlna hrang maichâm a sîra dârthîr kopa zônfung le a hmangrua murdi irsûkinfâina tuibêl le a toihmun; 17dâia hmang hrang puanzârhai, a chopui le an toitirna dâi mikota hrang puanzâr; 18puan in le a dâi hêmvuakhai le a hruihai; 19Hmun Irthianga sintho hrangin an fe zoroa ochaihai innghâk hrang tukfam enhoi takhai; ochai Arona le a nâihai hrang songkol ser siam ri se,” a tia.
Mipui thilpêk hong inhlan
20Israel mipui irbûmhai chu an chîn indara, 21a’rphaltuhaiin Rengpa omna puan in sinna hrangin thil an hong pêka, Pathian chubai mûk zoroa nang murdihai le ochai tukfamhai siamna hmangrua an hong chôia. 22Mi irzukna neihaiin nupang le pasal irvôna irthei enhoihai, kuarkâihai, kutsabi hai, irthei rângachaka siam thil hlutak takhai an hong chôia Rengpa makunga mahrip takin an inhlana. 23Mi tukhom patzâiirhmi a dum, a senduk mo, a sen samul pat, kêl mula siam puan kêlbelra chal vun a sen; savun a sazât neihaiin an hong chôia. 24Sumru le dârthîr neihaiin Rengpa kuang an hong pêka, i ang khoma hmang thei hrang sitim thing neihaiin an hong chôia. 25Mi kut theithiamna neihaiin patzâiirhmi an hong chôia. 26Kêl mul khom satak thûr sai an hong chôi sa ngai. 27An hruaituhaiin onik lung le lung mantam dang, Efod-a inkhop hrang le rôpphô târ hrang, 28Thil mirimhoi le sahriak inchok thei hrang, irpol hrang le hâl hrang an hong tum ngaia. 29Israel mi tukhom a nuam murdiin, Mosia kuang sin hrangin a thupêk anga hmang hrang thilpêkhai Rengpa kuanga an hong pêk ngai.
Rengpa omna hrang puan in sina kut theithiamhai
(Fes 31.1-11)
30Mosia’n Israel nâihai laia khan, “Juda nam laia mi, Hura tupa Uria nâipa Bezalela chu Rengpa khan an thang tâka. 31Irfûktir theina thil i khom siam hranga kutsin theina le inhriat thiamna nei hrangin Pathianin a sinthotheina an siptira. 32Thil enhoihai ngaituah suaka, rângachak sumru le dâr irfûktir theihai; 33lungmantam inkhop hranga âttan, thing sin, thil enhoi chi tinrêng siam theina a ipêk a ni. 34Dan irchia mi, Ahisamaka nâipa Oholiaba le an ruaiin mi dang kut theithiamhai irchutir theina Rengpa’n a ipêk a ni. 35Thil siam theina, thil enhoi inhriat theina hai, puan zerhmi satak sin, a dum le a senduk le samul puan sen le puan dang không theihai, a ipêk a ni. I khom an sin theia, a hong irhoi hrang anga theina an inei tâk a ni.
Currently Selected:
FESUAKNA 35: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
