FESUAKNA 34
34
Thupêk sôm irziakna lungphêk dang
(Dhn 10.1-5)
1 Rengpa khan Mosia kuang hiang hin a ti pea, “Matona ang dêna lungphêk inhni siamin lân, ni inkhoi lungphêk masahaia chuang thuhai kha irziak nôk ki ti. 2Nangtûk zînga irsiamin lân, tâng sîp taka ni hmu hrangin Sinai tânga hong lui roh. 3Mi dang tûte an hong ilui sa hrang ni ma, tâng kôla khan kêlbelra mo sehrâtin mo fâk an izong hrang ni ma,” a tia. 4Khaang khan Mosia khan lungphêk inhni a siama, Rengpa thupêk ang lam takin zîng nôka chu a luipui tâka.
5 Rengpa chu sûmlaia a zuang chuma, a kôla a ngîra, a’rhming Rengpa iti kha a zuang tia. 6#Fes 20.5-6; Nam 14.18; Dhn 5.9-10; 7.9-10 A maton tiang fe angin Rengpa khan, “Keima Rengpa hi khonza le satna sip Pathian chu ki nia, a ninginmur zel ngai loi lungkhamna lian le iamomna inlang ngaitu chu ki ni. 7Suanpâr dênin ki chonginkung tho ngaitu, pualoina le tehelna le sual ngaidam ngai; khan nu le pahai sualna sikin nâihai le tu le te irlo inthum le minli dên khomin dûk intongtirhai lêk no ning,” a tia. 8Mosia chu inrang takin khûksadelin a kûna, chubai a mûka. 9“Rengpa ni milung ki chuk tak takin chu kin kuanga fe sa hrangin nang ki ngên. Hi mihai hin an tukullian bâk khomsian, kin pualoina le sualnahai nin za’n lân, ni mi ni hrangin ni pom ro,” a tia.
Thuthung namindet thar a ni
(Fes 23.14-19; Dhn 7.1-5; 16.1-17)
10 Rengpa’n Mosia kha hiang hin a ti pea, “Israel mihai le thuthung atûn hin kin isiam a ni. Rammual kho hmuna le tu nam chunga ki la itho ngai loi thil roiinpuihai an mit hmu ngeia tho ki ti. Thil irkhêl tak nin ta hrangin ki itho hrang a ni sikin, nin omna hmuna mi tinin keima Rengpa’n thil roiinpui tak ki itho thei lam hi hmu an ti. 11A vuana dân nangni ki ipêkhai hi zôm ngit unglân, malam nin pan thiai lai hin, Amor-hai, Kanaan mihai, Hit mihai, Periz mihai, Hiv mihai le Jebus mihai inhnotsuakhai ki ti. 12Nin fena hrang rama mihai leh khan thuthung nin isiam hrang ni ma, kha kha nin ta hrangin thina a ini thei hrang a ni sikin. 13#Dhn 16.21 An maichâmhai setpai unglân, an lungphunhai insiat unglân, pathiannu Aseri irsinsianahai insiat zit roi.
14“Pathian dang chubai nin imûk hrang ni ma, Rengpa, a’rhming khom “hnarsasia” chu Pathian hnarsasia tak a ni sikin. 15Kha rama mihai leh khan thuthung siam no roi, an pathianhai chubai mûka irbôlna an inhlan zoro khomin, kop sa hrangin nangni fial an ta, an pathianhai laia fâk an inhlan kha fa sa hrangin nin irzuk hrang ni mah. 16Nin nâipasalhaiin kha nam dang nupanghai kha dôngma’n lahai duai an ta, ki ta hrangin iamom loina om hrang le an pathianhai chubai nin mûkpui theina lampuia nangni an ihruai thei hrang a ni. 17#Fes 20.4; Lev 19.4; Dhn 5.8; 27.15 Inluan millim pathianhai chubai nin imûk viat hrang ni mah. 18#Fes 12.14-20; Lev 23.6-8; Nam 28.16-25 Baidi kût chu hmang mai ngai roi. Abib tha, ki zoro khita thu nangni ki ipêk ang khan sûn sari sûng chu chol pol loi bai nin ifâk hrang a ni; kha tha kha Aigupta nin mâkna zoro a ni sikin.
19 #
Fes 13.2
“Nâilutîr pasal le sa a suak maton tak chu keima hrang a ni. 20#Fes 13.13 Sakuartung suak maton tak rêk chu a’rthûlin kêlbelrate inhlanin inhlan thei nin ti, nir hlan no’n chu a ring inher khiak pe roh. Nâilutîr murdi chu ni inhlan nôk ving hrang a ni. Tûte thilinhlan loiin ki kuang an hong inlang thei hrang ni mah.
21 #
Fes 20.9-10; 23.12; 31.15; 35.2; Lev 23.3; Dhn 5.13-14 “Mâni sinthôna hrangin sûn ruk sûngpa reng nin neia, a sûn sari ni chu sin nin izong hrang ni ma, âlkai zoro mo, bu ât zoro mo i ang khomin nin irngam hrang a ni.
22 #
Lev 23.15-21,39-43; Nam 28.26-31 “Bu a tung masatak ât a’rphutin chu, favâng kût hmang unglân, phalbi lût tianga ni thei ra nin bûm zoro’n chu, kairêng kût chu hmang roi. 23Rengpa Israelhai Pathian kuanga pasal murdi chu a kum tin voithum an hong inlang ngêt hrang a ni. 24Nin mâna nam danghai ki len hnothaia, nin ramrihai kin liantir tena chu, hi kût inthumhai laia hin, Rengpa nin Pathian kuang inhlan hranga nin fe zorohai hin tûte’n nin ram lei long no nihai.
25 #
Fes 12.10
“Irbôlna hme nin hlan zoro’n chol kop loi ni inhlan hrang ni mah. Ferkân kût zoroa that sai hme hlek khat khom nangtûka hrang hôi no roi.
26 #
Dhn 14.21; 26.2 “Ni loia chîmu a tung masatak chu Rengpa ni Pathian ina hong chôiinlût ngai roh. Belrate mo kêlte mo a puinu irhnutui leh suang ngai no roh,” tiin.
27 Rengpa’n Mosia kuang khan, “Hi thuhai hi irziak suak ving roh, hi thuhai hi sirbia neiin nangma le Israel kuang thuthung ki isiam a ni,” a ti pea. 28Mosia chu sûn sômminli le zân sômminli ite fâk le in loiin Rengpa leh an oma, lungphêk chunga khan thuthung chonghai thupêk sôm chu a’rziak tâka.
Sinai tâng ata Mosia a chum
29 #
2 Kor 3.7-16
Thupêk sôm irziak lungphêk chôiin Mosia chu Sinai tânga irthokin a chuma, a hmêl chu Rengpa leh an chong sikin a ir-al puma, ama’n chu inhre thei maka. 30Arona le Israel mipuihai khan Mosia kha an enzui maia, a hmêl chu ir-al phutin an hmu maia, a kôla va nâi hrang khom a sate’n an chia. 31Khan Mosia’n a koihaia, Arona le nam hruaituhai murdi chu a kuang an fea, Mosia khan a lei chongpuihaia. 32Kha zoiin chu, Israel mi murdihai a’rhîlin an irbûma, Sinai tânga Rengpa’n a kuanga a ipêk dânhai chu Mosia’n a hrilhaia. 33Mosia’n thu an sîr pehai zoiin chu, puan hmâiirkhûna leh a’rkhuma. 34Rengpa leh chong hrangin Rengpa omna puan ina a fea, a hmâi irkhûna a hlîkpai ngaia, a hong suakin chu Rengpa’n a kuang a iti hrang thu a ipêk murdi kha Israel mipuihai an hrilhai ngai. 35A hmêl ir-al phut kha an ihmu ngai a ni. Khanchu Rengpa chongpui hrangin a fe nôk mâka chu a hmâi a’rkhu nôk ngai.
Currently Selected:
FESUAKNA 34: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
