DANIELA 11
11
1Khan keima chu Media mi Daria kum khatnaa khan, ama indet hrang le inhrât hrangin ngîr ngit ki ti.
Aigupta le Suria ram
2Atûn hin thudik nan entir ki ti. Irngai ro, Persia rama khan, rêng inthum hong suak an ta, a minlinapu tena chu a danghai nêkin irchong a ta; ar chongna sikin irsong a ta, Grik rama mihai inphûthai a ti.
3Khan rêng hrâttak, thu neina roiinpuitak roirêl hrangin hong suak a ta, a thu thuin tho a ti. 4A hong suak ata chu a ram chu irsem ni a ta, kôlkil minlia hin irsem ni a ti, ar chihai hrang ni loiin, a thunei laia a irêl ang ni loiin; a ram chu a mihai hrang ni loiin, mi danghai hrang sutpai ni a ti.
5Khanchu sim tianga rêng kha hrât a ta; a hruaituhai laia mi inkhat chu ama nêkin hrât a ta, irchamnei tak ni a ti. 6Kum hek tiang chu irzom nôk an ta, sim tianga rêng nâinu chu hmâr tianga rêng kuang irngeina siam hrangin zuang a ti, khannisian hrâtna chu nei insôt no ni; a hnông khom hnông ual no nia, a hrâtna khom rêng nâinu pêk ni a ta, a hong hruaihai le ama inhrâttirtu le. 7Khannisian a’rzung ata hon cher thar chu, mi dang inkhat ama hmuna hong om nôk a ta, ama kha chu sipai rualhai le zuang a ta, hmâr tianga rêng irkula khan lût a ta, doihai a ta, inhnê a ti. 8Khan an pathianhai, an irlim siamhai le an sumru le rângachak bêlbûr sahai leh khan Aigupta rama chôipai ving a ta, kum idôr vêl mani chu hmâr tianga rêng ata lei irngam ni a ti. 9Sim tianga rêng rama khan, hmâr tianga rêng kha hong lût a ta, khannisian a rama la kîr nôk a ti.
10A nâihaiin doi an ta, sipai pâl tamtak irchunin hong an ta, inhnea paltanhaiin, kîr nôk an ta, doihai an ti, a kuldet khom. 11Sim tianga rêng chu ningmurin suak a ta doi a ti, hmâr tianga rêng kha, mipui tamtak leh suak an ta, mi tamtak a kuta pêk ni a ti. 12Mi tamtak chu hruai irhmang ni an ta, a lungrîl inrangin, sîngkhat vêl chu naminrîlhai a ti, khannisian zoro sôt ual ni no ni.
13Hmâr tianga rêng kha hong pût nôk a ta, mipui matona nêka tam hong hruaihai nôkin, zoro hnungkhôn kum hek tiang chu sipai râltukfam leh tamtakin hong pan an ti. 14Kha tika khan chu, mi tamtak, sim tianga rêng doi hrangin irsiam an ta; nir chia mi nakhrâtsong mihai le inlârna chu natakin irlek an ta, khannisian irtet no nihai. 15Kha tena chu hmâr tianga rêng hong a ta, khopui kul dettak nei khom luapai a ti: khanchu sim tianga hrâtnahai khan danh zoi no nia, a mi inthanghai khomin, danh zoina hrang hrâtna nei ta no nihai. 16Khanchu a doitu khan a nuamlam takin doi a ta, a kôla tûte ngîr ngam no nihai, ama chu ram roiinpuia khan om a ta, a kuta siatna om a ti.
17Khanchu a ram pumpui hrâtna songin zuang tum a ta, irngeina siam a ti, khan chanlamboi inchangtir hrangin a nâinu kha dôngma’n pe a ta, hlochuk no nia, an lâp khom inlâp no ni. 18Hi zoia hin chu ramchârna tiang irhei a ta, tamtak lâk a ta; khannisian hruaitu inkhatin insîrsiatna sapsuakna chu mong a ta, an sîrinsiatna chu ama chunga irlet a ti. 19Khanchu an rama kul omna tiang irhei a ta, khannisian kal khatin irlet a ta, hmu thei ni ta no ni. 20Khanchu ama omna hmun khan mi inkhat ram roiinpuina sia irfuangtu khêlpai hrangin hong ngîr suak nôk a ta; khannisian sûn sôtnotea, ningmurna sika ni loiin, irdoina sika khom ni loiin, irhmangtirin om a ti.
Suria rêng sual
21Khanchu a hmuna khan mi ien nuamloi, ram chôiindômna a ipêk loi chu hong suak a ta; ram a hoi lai takin hong a ta, chongbâi hoitak hmangin ram chu nei a ti. 22Matona mi kha chu tuilian itânin om a ta, koichitin om a ti; a ni, thuthung hruaituhai khom. 23Khanchu a kuang thuthung a siam zoiin chu a sate’n siat zôi a ta; hong ngîr suak nôk hrangin, mipui tômte khomin an hong ihrât thei hrang a ni. 24Irngei zoro laiin ram bial hoina laia hor siam nôk a ta, a pa le a puhai tho ngailoi la tho a ti; mihai laia râllâk le râllâk thilhaia sum kha sem a ta, a ni kuldet chunga khan, khit thunghai chu la khithai an ta, 25a sinthotheina le a hâina chu, sipai pâl tamtak le, sim tianga rêng chunga inphût a ta; sim tiang rêng khan sipai pâl tamtak leh hong doi a ta, khannisian ngîr zoi no nia, a chunga irkhitin a la irkhit mai hrang a ni. 26A ni, a bu tuitak nêkhai ngêt khan ama irhmangtir an ta, a sipai pâlhai khom ihnôlin om an ta, tamtak chu thatin om an ti. 27Hi rênghai hi chu an lungrîla sat loina irput ni an ta, Dokâng hmun khata minlak tho an ta; hlo chu chuk pe ual no ni, a mongna chu zoro inkung saia ni a ti. 28Khanchu sum tamtak chôiin ama rama ngêt kîr nôk a ta, a lungrîla thuthung irthiang doiin om a ta; khaanga thoin, a rama ngêt kîr a ti.
29Zoro indang nî khan hong kîr nôk a ta, sim tiang fe a ti, khannisian an hnung ual hin chu matona ang kha chu ni no ni. 30Kil tina irhualhaiin ama hong doi an ta; khanchu a milung chuk no nia, kîr nôk a ti, thuthung irthiang chunga khan ningmur irlâk a ta, khaanga tho’n kîr nôk a ti, thuthung irthiang hnung songsanhai chu lôm a ti. 31Sipaihai khan doipui an ta, hmun irthianghai porinchetir an ta; a kulhai khom khan hâlirvôm thilinhlan omhai chu pai an ta, irsîna intirom chu inding nôk an ti. 32Khan thuthung chunga dik loina sual thotuhai chongbâi hoina khan insiat ni an ta, khannisian mi an Pathian inhretuhai chu det an ta, thil tamtak tho thei an ti. 33Khan mihai laia a vârhai chu, mi tamtak irchutirhai an ta, khannisian, khandai hai, meichok hai, sal intângna le inrûk irhmangna’n mi tamtak irlet an ti. 34An irlet khomin changpuina chîntea indomin om an ta, mi tamtak êsêlin, êrôhai an ti. 35Khan a vârhai laia senkhatin, anni infâi le irthiang hrang le invâr hrangin irtetpui an ta, a mongna ni dênin; zoro inkung a la ni mai sikin. 36#2 Thes 2.3-4; Thup 13.5-6 Reng khan a nuamlam takin tho a ta; ama chôiirsângin, Pathian tinrêng chunga a lian irti a ta, pathianhai Pathian sêlin thil irkhêl hril a ti: khan a ningmurna a hek pe ving mâka chu hlochuk a ta, a iti chu tho ngêt hrang a nia. 37A’rchihai Pathian khom ite bê’n bê no nia, nupanghai irngainat pathianhai le pathian danghai khom ngaisak viat loiin: mi murdi chunga lian irti a ti. 38Khannisian khahai nêkin kulhai pathian chu chôiindôm a ta, pathian, a pahai inhriat ngailoi khan, rângachak le sumru le, lunghluhai le thil indit omhai le chôiindôm a ti. 39Khan pathian dang changpuina’n kuldet taktak chu doi a ta, mi tukhom a pom murdi chu roiinpuitir a ta; tamtak chunga roi inrêltir a ta, a ram chu man neiin sem a ti.
40Khan mongna nî chu sim tianga rêngin ama hong nor a ta; hmâr tianga rêngin tâli le sakor chung chuang mi le irhuang tamtakhai le kêllaiher angin ama doi an ta, ramhai lûtin, chin zoi a ta, palthuanhai a ti. 41Ram roiinpui khom lûtkhum a ta, tamtak that ni a ti: khannisian a kut ata hihai hi sansuak ni an ti: Edom, Moab, le Amon mihriam sahai chu. 42Ram chunga a kut thâk a ta, Aigupta ram khom inzôk ual no ni. 43Khanchu rângachak le sumru siakhômhai chunga le Aigupta rama thil hluhai chunga thu nei a ti. Khan, Libna le Ethiopia mihai chu ama hrungtu ni an ta, 44khannisian nisua le hmâr tianga thu saloiin buai a ta; khanchu mi tamtak irhmangna le lungkânga ningmurin suak a ti. 45Khan Tuipui le tâng irthiang roiinpui tak kâra khan a rêng puan in chu sung a ta, khannisian a mongna tung a ta, tûte’n san thei ni no ni.
Currently Selected:
DANIELA 11: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
