DANIELA 10
10
Tigris tui kôla Daniela’n inlârna a hmu
1Persia rêng Kura kum thumna khan, Daniela, ar hming Beltesazzara an iti kuang khan thil a hon langa; kha thil kha a dik a ni, irdoina roiinpuitak a ni: khanchu thil kha an hriat theia, inlârna inhriat theina a neia.
2Kha nikhuaa khan, kei Daniela chu hapta thum a luzôl hîpin irthanvâiin ki oma. 3Bu zel ne ma unga, sa mani uain mani ki bâia thun viat loiin, hapta thum a luzôl a hîp zoi mâka chu sahriak khom irthu loiin.
4Khan tha khatna, sûn sôminhni le minli nia tui roiinpui tak Tigris kôla ki om laiin, 5#Thup 1.13-15; 2.18; 19.12 ki mit ki hor heia; irngai ro, mi puanze irhmia irvo, a konga Upaz rângachak irthianga irkhit hi a oma: 6a taksa khom Berul lung anga om a nia, a hmêl chu kôlirtêk anga om, a mit khom meiser anga, a bân le a kehai chu dâr irtêk anga, a chong irhâi khom mipui irhâi ang a ni.
7Kha inlârna kha keima Daniela vai hin ki hmua, ki kôla omhai khan inlârna chu hmu mahaia, khannisian a sate zelin an inthinga, an irbîk zoi ta. 8Kha tena chu keima vai ki om tâka, inlârna roiinpui chu ki hmua, hrâtna irthahrui boiin ki oma, ki hmêl satna khom a chuaia. 9Khannisian a chong irhâi chu kin hriata; a ni, a chong irhâi kin hriatin chu, inbokin ki hmâi hnuaia siain ki in irnghil tâka. 10Irngai ro, kutin a ni hon thema, ki hong har zoka, 11ki kuang, “O Daniela nang inditom tak, ni kuanga ki thuhril hi inhre theiin lân, ngîr ta ro; ni kuang a ni hong itîr a ni,” a tia. Hi thu hi a hril zoiin chu inthing pumin ki ngîra.
12 #
Thup 12.7
Ki kuang khan, “Chi no ro Daniela, ni Pathian kuang ni’rngaiintôm hrang le inhrethei hranga nir pêk ni ata ni thuhai chu irngaitua a nia, ni thu sika zuang ki ni. 13Khannisian Persia ram hruaituin sûn sômhni sûn khat a nir doipuia; khannisianlân irngai ro, Mikaela hruaitu lian chu ni san hrangin a honga; Persia rêng kuanga khan ki hong oma. 14Sûnmaton tianga ni mihai chunga thil hong tung hrang inhriat theina nei hranga zuang ki ni: inlârna chu sûnmaton tiang a la ini hrang a ni,” a tia.
15Hi thu ang taka ki kuang a hril laiin, kei chu ki kûna, chong thei loiin ki oma. 16Irngai ro, mi inkhat, mihriam nâipa anga inlang hin ki hmûr a zuan thema; khanchu ki bâi ki hong ânga, ki kôla ngîrpa kuang khan, “O Rengpa, inlârna sikin ki char kin donga, a ni delin kin hriata, irthahrui boi angin ki oma, 17hi ki rêngpa siahlo hin, hi ki rêngpa hi itin mo a ichongpui thei hrang? kei lakin irnak boi angin ki oma, thoi khom thoi thei loiin ki oma,” ki tia.
18Khanchu mihriam anga inlang khan a ni hon them nôka, ki hong hrât suak tâka. 19Khanchu ki kuang, “O mi inditom tak, chi no’n lân, irtharngam takin om ro, a ni, hong hrât ta ro,” a tia. Ki kuang thu a hril lai takin ki hong hrât thei tâka.
“Ki rêngpa’n thu hril ri se, nangin ni nin hrâttir tâka,” ki tia.
20Khanchu, ni kuanga ki izuang nasan hi nin hriat mo? Atûn chu Persia ram hruaitu doi hrangin ki ikîr nôk hrang a ni; ki phut tena chu, irngai ro, Grik ram hruaitu hong a ta. 21Khannisian thudik irziaknaa irziak chu hril ki ta: hitaka hin, nin hruaitu Mikaela ti no chu, tûte ni san hrang om no nihai.
Currently Selected:
DANIELA 10: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
