2 THURCHI SUINA 25
25
Juda rêng Amazia
(2 Rng 14.2-6)
1Kum sômhni ringa a niin Amazia chu an lal irphuta, Jerusalema kum sômhni kuak an lala. A nu chu Jerusalema suak Jehoadini a ni. 2Rengpa nuamlam a thoa; khannisian ngîk pu pumin a itho ngai a ni. 3Reng a chang indet tena chu a pa thattuhai kha a thathaia. 4An nâihai chu tônhai maka, Mosia dân bua, Rengpa thu, “Nu le pahai chu an nâihai sualna sikin thathai hrang ni ma, an nâihai khom an pahai sualna sikin thathai hrang ni ma; anni sualna sik vaiin that an ini hrang a ni,” ti kha a izôm a ni.
Edom doina thu
(2 Rng 14.7)
5Reng Amazia chu Juda mihai le Benjamina mihai chu a panam ang dungzuiin sipai chi dang dangin an omtirhaia; sângkhat pâlhai, irzakhat pâlhai, hruaitu hrang an dang pehaia. Pasal kum sômhni chung tianga chu an om vinga, an rêngin mi nuai thum an ni. 6Hihai bâka hin hmâr tianga Israelhai, mi nuai khat, tangkarua her sângthum irzaminliin a hruaihaia. 7Reng kuang khan deipu inkhat a honga, “Hi Israel sipaihai hi hruaihai no ro. Hmâr tianga mihai tiang Rengpa chu kop ual ma. 8Irdoina khan hrâtpuihai hrangin irtûng no ro. Irdoina inhnêtu nina hi Pathian thu kêng a ini; ni râlhaiin nan hnêna an ti,” a hong tia.
9Amazia chu deipu kuang, “Tangka ki lei ipêkhai kha te, itin mo a ini ta hrang?” a tia. Deipu khan, “Rengpa’n hi nêka tam hi nang a ipêk thei mo ni ma,” a tia. 10Amazia chuangna sipai pâl, Efraima ram ata honghai chu an banhaia, an fetirhaia, Judahai chunga ningmur irlâkin an fe tâka.
11Amazia chu ngam takin a sipaihai leh michi irhôra a fepuihaia, Edom sipaihai leh an irdoia, mi sîngkhat an thathaia. 12Mi sîngkhat an chelhaia, Sela kho kôla rôlpûka an hruaihaia, an namthâkhaia, an thi zoi vinga. 13Amazia’n irdoina a itîrhai loi sipaihai khan Samari le Beth-Horon kâra Juda khopui chu an doia, mi sângthum vêl an thata, râllâk sum tamtak an lâka. 14Amazia’n Edom-hai an hnêa, a hongin chu, an millimhai a hong chôia, a siana a sina chubai a mûka, an makunga mirimhoi a hâla. 15Hi sika hin Rengpa ning an mura, Amazia kuang deipu a tîra. Deipu’n, “Nangma ata an mihai khom sanhai thei loi, nam dang pathianhai chu itina mo ni la ibiakhai mai?,” a tia.
16Rengin, “Itiklai khan mo rêng kuanga thu irdon hrangin nang ki ibe, dâihrek ro, nang thatpaina ki ti,” a tia. Deipu’n, “Ki thu ti irngai nuam mak chea, hi hi ni tho tâk sikin, Pathianin nan boipai a itum a nih ti kin hriat ta,” a ti phota, a dâihrek ta.
Israelhai le irdoi
(2 Rng 14.8-20)
17Juda rêng Amazia le a ulianhaiin Israel doi an tuma, Jehua nâipa Jehoahaza nâi Israel rêng Jehoasa kuang, “Pa le pa, irdoi ei ta,” tia inphût hrangin mi a tîra. 18Jehoasa’n hiang hin a sâma, “Voikhat chu Lebanon tânga ilhling kunghai hin Lebanon-ah sidar thing kuang, ‘Ki nâipa dôngma hrangin ni nâinu ni pe ro,’ a tia. Ramsa chaihaiin ilhling kung chu an palthût tâka. 19Amazia, Edom mihai ni zu inhnêhai hi ni irsong a ni hi na! in sûnga om chi chian ta ro. Nang le ni mihai ta hranga poi hrang thil phordok ta no ro,” a tia.
20Amazia khan a thu kha ite bê’n bê pe maka, Edom mihai pathian irlim a biak sikin Pathianin Israelhai kuta pêk a lei itum a ni. 21Israel rêng Jehoasa le Juda rêng Amazia chu irdoi hrangin an suaka, Judai rama Beth-Semes kho kôla an irdoi tâka. 22Juda sipaihai chu hrât ta mahaia, mâni in lam panin an intân tâka. 23Israel rêng Jehoasa chu Juda rêng Amazia, Joasa nâipa, Ahazia tupa chu a chela, Jerusalema a hruaia, khopui kulbang chu, Efraima mikot ata bang kil tianga inkhâr an iti dênin kulbang mûk irzaminli chu an siatpaia. 24Râllâk sum le tempil rângachak le tangkarua hai, Obed-edoma irchihai ihrung ngai tempil bêl le bûr le rêng ina sum hrêna sahai chu a lâka, bândaa khit hrangin mi a tuanghaia. 25Juda rêng Amazia chu Israel rêng Jehoasa nêkin kum sômhlei ringain a dam sôt uala. 26An lal phut ata a mong dênin Amazia sinthohai chu, Israel le Juda rênghai thurchi ti irziakna bua a chuang. 27Khan, Amazia chu Rengpa kuanga tehel a zong ata ama that tum Jerusalem kho mi an lei iom sa ngai a ni. Inhnung taka Lakis khuaa an tâna; khannisian, a râlhaiin an irzûla, an la va that irmana. 28A ruak chu sakor an inpêltira, Davida khopuia rêng thâna an phûm tâka.
Currently Selected:
2 THURCHI SUINA 25: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
