2 THURCHI SUINA 24
24
Juda rêng Joasa
(2 Rng 12.1-16)
1Joasa chu kum sari mi a niin Judai rama rêng a changa, Jerusalema kum sômminli an lala, a nu chu Zibi, Beerseba khuaa mi a ni. 2Ochai Jehoiada dam sûng chu Joasa’n Rengpa nuamlam a tho ngaia. 3Jehoiada’n rêng Joasa chu dôngma inhni an neitira, nâinupang le pasal a neipui oka.
4A hong inlal ual tena chu tempil irvo insatir a tuma. 5Ochai le Levi irchihai chu Judai ram khopui ar fangtirhaia, a kum tina tempil irvotirna ruk hrang dôr tholôm ar fuangtirhaia. Irhnot hrangin a tia, khannisian Levi irchihai chu an ir-ial pe oka. 6#Fes 30.11-16 Khanchu Jehoiada a koia, “Levi irchihai hin Judai ram le Jerusalem mihai kuang ata, ‘Irtongna in,’ enkolna hrang Rengpa siahlo Mosia chu an irfuang indik le dik loi itina mo ni ienpui loi?,”; a tia. 7(Mi sualnu Athali zuituhai kha tempila an lût khumhaia, thil irthiang tamtak Baal biakna makunga an ilâksuak a ni.)
8Rengin Levi irchihai chu tholôm kok sina, tempil lûtna mikot bula sia hrangin a tia. 9Jerusalem le Judai ram murdia Pathian siahlo Mosia’n ramchâra mipui tho hrang a indang pehai ang khan hong chôi mai hrangin he a bêhaia. 10Mipuihai le a hruaituhaiin lôm takin tho hrang bituk zât chu an hong chôia, bôm kha an thâk inbit tâka. 11Levi irchihaiin bôm chu a ni tin, a enkol hrangin rêngin a indang pehai kuang an lâk ngaia, bôm kha a bitin chu ochai ulian tak Jehoiada irthûlpuitu le rêng mi indang irziaktu khan an lei lâksuaka, bôm chu a siana khan an sia nôk ngai. Tangka tam tôktak an thosuak tâka.
12Reng le Jehoiada khan tempil irvo insatirna sin enkoltuhai kuang poisa kha an pêkhai ngaia, anni’n lungtuk mihai, thing sin theihai, thîrsuk theihai, tempil irvo insatir hrangin an hmanghaia. 13Inhnê takin mistirihaiin an sina, tempil chu a phuta angin an irvo insa’n an indettira. 14Sintho hrang an tho zoiin chu rângachak le tangkarua an ihmang ban chu ochai inthang tak Jehoiada an pêka; ama’n tempila hmang hrang tâbor le bêlbûr dang a sina.
Jehoiada ithotum an sutpai
Jehoiada dam sûng chu a nitin tempila thil an inhlan ngaia. 15Tar kûnin a dama, kum irzakhat sômthum a dênin a thi tâka. 16Israel mihai kuang Pathian ta hrang le tempil ta hrangin sin a tho insa sikin, Davida khopuia rênghai thâna an phûma.
17Jehoiada a thi zoiin chu Judai rama mipui hruaituhaiin an thu irngai ual hrangin rêng kha an inthêma. 18Mipuihaiin an irchibulhai Pathian Rengpa chu tempila biak nuam ta mahaia, millim hai, pathiannu Aseri irlimhai an biak tâka. An sualna sikin Judai rama mihai le Jerusalema mihai chunga Rengpa ning an mur pea. 19Rengpa’n anni chu hruai kîr hrangin deipuhai a tîra; khannisian mihaiin an thu irngai pe mahaia. 20#Mt 23.35; Lk 11.51 Ochai inlal tak Jehoiada nâipa Zekaria kuang Pathian irtha a zuang tunga, mipuihai hmu theina hranga khan a ngîra, inring takin a khêka, “Rengpa Pathianin hiang hin a ti, itina mo ki thupêkhai zôm nuam loiin nin chunga siatna nin intungtir hrang? ama nin mâksana, ama khomin nangni masan a ti,” a tia. 21Zekaria kha an thuphana khan, rêng thuin tempil tuala khan an dêng thatpai tâka. 22Rengin Zekaria pa Jehoiada, ama ta hranga a kâmnang kha a’rnghilpaia, Zekaria chu an thattirhaia. Zekaria thi hrangin chu, “Ni sintho hi Rengpa’n hmu sianlân, phuba la ri se,” a tia.
Joasa rêng zoro hnungkhôn
23Kum a hong tharin chu, Suria sipaihaiin Judai ram le Jerusalem chu an hong doia, hruaitu tamtak an thata, râllâk sum tamtak Damaska khuaa an chôia. 24Suria sipaihai chu an huanghai nâkin, anni nêka tam ual Juda sipaihai chu an inhnê a ni. An irchibulhai Pathian Rengpa chu an mâksan sikin an ihrât loi a ni. Reng Joasa’n a ituang a ni tâk a ni. 25Joasa’n sâbe lian tak a tuanga, râlhai an chîn zoiin chu a rualhai inhni an irruala, ochai inlaltak Jehoiada nâipasalhai a ithat, phuba chu an lâka, zâlhmuna zâl kha an thata, rêng thâna ni loi, Davida khopuia an phûm tâka. 26(Irruala thattuhai kha Amon mi Simeata nâipa Zabada le Moab mi Simriti nâipa Jehozabada hai an ni.) 27Renghai lekhabu hrilfiana bua Joasa thurchihai, a chungchânga deipu thu leihrilna hai, tempil irvo insatir thuhai a chuang. A nâipa Amazia chu ama irthûlin an lal tâka.
Currently Selected:
2 THURCHI SUINA 24: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
