2 THURCHI SUINA 23
23
Rengnu Athali chunga tehelna thu
(2 Rng 11.4-16)
1A kum sarina khan chu ochai Jehoiada le sipai irza hruaitu ringahai chu an irhlet irhlôma. Kha mihai kha Jehorama nâipa Azaria hai, Jehohanana nâipa Ismaela hai, Obeda nâipa Azaria hai, Adaia nâipa Maaseia hai, Zikria nâipa Elisafata hai an ni. 2Judai ram an irfangsuaka, Levi irchihai le nam dang hruaituhai chu Jerusalema an hruai bukhaia. 3#2 Sam 7.12 Tempila khan an irbuka, Joasa, rêng nâipa leh khan chong an irkhâma. Jehoiada khan an kuang, “Rengpa khan Davida irchihai chu rêng hrangin an kunga, hi rêng a lei thi tâk nâipa hi rêng chang hrang chu a ni. 4Hiang hin thil tho ei ti, Sabat nia ochai le Levi irchihai sintho hrangin an hong tena, hmun thuma semin hmunkhat chu tempil mikothai hrung an ti. 5Hmun thuma hmun khathaiin chu rêng in hrung an ti, a danghai chu ‘Lung phûm’ mikot kôla om an ti. Mipuihai chu tempil tuala an iom hrang a ni. 6Tempil sûnga chu ochai le Levi irchi sintho lai tak ti no chu, tûte an ilût hrang ni mah. Anni chu serindang an ni sikin, lût thei an ti; mi danghai chu Rengpa thu zômin an ilût hrang ni ma. 7Levi irchihai chu rêng hi irhual khak an ta, khandai phôi sai chôiin an ihrung hrang a ni, rêng fena hmun tina an izui hrang a ni. Tempil sûnga lût tumtuhai chu an ithathai hrang a ni,” a tia.
8Levi irchihai le Judai rama mihaiin Jehoiada ihril angin an thoa. Sabat nia irngam hranghai chu an chela. 9Davida’n tempila a siaa, ufei le phohai chu Jehoiada’n a sema. 10Tempil mikota khandai phôi sai chôiin ar tângtirhaia, rêng kha an hrungtirhai khapa. 11Jehoiada’n Joasa kha a hruaisuaka, rêng tho hrang dân bu kha a pêka, rêngin an siam tâka, ochai Jehoiada le a rualhaiin Joasa chu sahriak an pola, “Reng hi dam sôt ri se,” tiin an khêka.
12Athali’n rêng an chôiindôm ti an hriatin chu, mipui irbukna tempil tiang a fea. 13Reng thar chu rêng ngîrna hranga an indang, tempil sûng lûtna kôl bang kôla ngîr kha a hong hmua, sipai hruaituhai le bekul irputhaiin an irhuala. Mipuihai chu raifân takin an khêk dur dura, bekul an tuma, tempila zaipôlhaiin an thil tum irhâi leh hla an hruaia. Annihai kha a hong hmuin chu ningmurin a puan an pot thêra, “Nin ni ihuang a ni,” tiin a khêka.
14Jehoiada’n tempil vêla that nuam maka, sipai hruaituhai kha a koia, “A hrung hrangin sipai irtâng unglân, a lei inruang nin hmu’n chu thatpai roi,” a tia.
15Athali chu an chela, rêng in tiang an hruaia, sakor mikot an itina kôla khan an thata.
Jehoiada’n Pathian biak dân a siam insa
(2 Rng 11.17-20)
16 Rengpa mi ni hrangin ochai Jehoiada’n rêng Joasa le mipui chu thu a thungpuia. 17Baal an ibiakna hmuna khan an rêngin an fea, an insiata. Maichâm kha an insima, millimhai kha an irfûi inkhoia, Baal ochai Matana chu maichâm kôla an thata. 18Jehoiada chu ochaihai le Levi irchihai chu tempila an sintho hrang, an inthotirhaia, rêng Davida iti angin an tho hrang an semhaia, Mosia dân bua irziak angin Rengpa kuang hâlirvôm thilinhlanhai an inhlana. Irhâihoi tumhai, hla sakhai le hla hruaituhai khomin an itho hrang a ni. 19Jehoiada’n chu tempil mikothai an hrungtirhaia, mi porinche tûte inlûttir phal hrang ni ma.
20Sipai hruaituhai, ram hruaituhai le mipuihaiin Jehoiada pâlin lampuia an irkôia, rêng chu tempil ata rêng ina an hruaia, mikotpuia an lûtpuia, rêngtoihmuna khan rêng chu a toia. 21Mi murdi’n an râi a fâna: Athali chu an tuk that tâk sikin kho sûnga khan buaina om ta mah.
Currently Selected:
2 THURCHI SUINA 23: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
