2 THURCHI SUINA 21
21
1Jehosafata chu a thia, Davida khopuia an phûma, a nâipa Jehorama chu ama irthûlin an lala.
Judai rama rêng Jehorama
(2 Rng 8.17-24)
2Judai rama rêng Jehosafata nâipa Jehorama’n nâi kiruk, Azaria hai, Jehiela hai, Zekaria hai, Azarihua hai, Mikaela hai, Sefatia hai a neihaia. 3An pa’n rângachakhai le irchonhlu tamtak a pêkhai vinga, Judai ram khopui kul nei, enkoltu hrang an kung pehai vinga. Jehorama chu a nâi ulian tak a ni sikin Jehosafata’n an laltira. 4Jehorama chu a hon lal indeta, a sanghai chu an thattirhaia. Israelhai laia hruaitu senkhat khom an thattirhai sa. 5Kum sômthum hleihni a ni kumin Jehorama chu rêng a changa, Jerusalema kum riat an lala, 6Israel rêng Ahaba le rêng dang sual ta takhai angin an oma, Ahaba nâinu khom dôngma’n a neia. Rengpa chunga thilsual a thoa; 7#1 Rng 11.36 khannisian, Rengpa’n Davida kuanga a thuthungna le ar chihai chu inlaltirhai mai a tum tâk sikin, Davida irchihai inboi chu nuam maka.
8 #
Irp 27.40
Jehorama inlal laiin Judahai ata Edom-hai tehel an zonga, rêng a bingin an neia. 9Jehorama le a rualhai chu sakor tâli leh Edom-hai chu an va rûnhaia, Edom sipaihaiin an le’rhualhaia; khannisian zân inthim laia an la pût thei hrâm sikin, 10khatak ata chu Edom-haiin Judahai hnuaia om loiin atûn ten hin rêng dang an inei mai a ni ta. Jehorama’n, Rengpa, a’rchibulhai Pathian chu a uksak no sikin, kha lai zoro vêl khan Libna khuahai an irhel pe nôka. 11Judai ram tâng rama pathian dang biakna hmun irsâng a sinhai hluka. Judai ram le Jerusalem mihai chu Rengpa ata tehel zonga, thilsual tho hrangin a kaihruaihaia.
12Deipu Elija’n lekha a thona, “Ni’rchibul Davida Pathian, Rengpa’n ni pa Jehosafata le ni pu Judahai rêng Asa hai omdân ang khan ni om no sikin theiloi ni ichang a ni. 13Israel rênghai omdân angin ni om tâk sikin, Ahaba’n Israel mihai pathian danghai kuang a uirepui ang khan nang khomin Judai rama mi le Jerusalema mihai chu ni uirepuia. Nangma nêka sa, ni sanghai lak ni thatpaihaia. 14Khasikin, Rengpa’n ni mihai, ni nâihai, ni dôngmahai hripuiin hremhai a ta, ni inei murdi nan siattir pe a ti. 15Nang khom, ni sûng nang innatir pe a ta, a nitin nang na pe mai a ti,” tiin.
16Filistia mi le Arab mi senkhat, tuipui kôla Ethiopia mi lei omhai kôla an oma. Rengpa’n khahai kha Jehorama doi hrangin an phûthaia. 17Judai ram chu an hong rûna, rêng inhai an inmoka, rêng dôngmahai le an nâipasalhai chu suaka an chelhai vinga, a nâi mitum Ahazia chu chel mahai. 18Kha irzoiin chu Rengpa’n rêng phîng sûng kha an natir pe nôka, 19kum hni sûng chu a na pe mai tâka, a rîl a hmon pea, a satea natna tuangin a thi tâka. A puhai thia an itho ngai angin a mihaiin ama sûnna hrangin meipui sêm inchok ta mahai. 20Jehorama chu kum sômthum hleihni a niin an lal irphuta, Jerusalema kum riat an lala, a thi hi tûte’n a poi ti om mahai, Davida khopuia khan an phûma, rênghai thâna chu phûm mahai.
Currently Selected:
2 THURCHI SUINA 21: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
