2 THURCHI SUINA 20
20
Edom leh irdoina
1Zoro hong sôt ual tena chu Moab le Amon-haiin an irkoppui Meun-hai#20.1: Bu senkhat irhleta khan Meun-hai ti a nia, Hebraiin chu Amon-hai ti a ni. le Jehosafata ram chu an hong doia; 2mi senkhat an honga, Jehosafata kuang, “Tuipui thi râl Edom ram ata sipai tam takin nang hong doi an ta, Hazazon Tamar khua chu an lâkpai ta,” a tia. 3Jehosafata chu a char a dong pe oka, thil tho dân hrang Rengpa ar dona. Ram pumpuiin bu nghei hrang a tia. 4Judai ram kho tin ata Rengpa irdon hrangin Jerusalema mi an hong hluk tâka. 5Annihai le Jerusalema mihai chu tempil tual sin intharna khan an irbuka, rêng Jehosafata chu an makunga a va ngîra. 6Inring takin a chongchaia, “O Rengpa, kin irchibulhaiin Pathian sinthothei tak ni ni, tûte chelthung thei ni mak che. 7#Isa 41.8; Jak 2.23 Hi rama lei om ngaihai kha ni mi Israelhai makunga nin hnotsuakhaia, ni rualpa Abrahama irchihai inei kumtuanga hrang ni ipêk mo ni ma? o kin Pathian! 8Hi rama hin an om tâka, nangma biakna hrang hmun Irthiang an sina. 9A ni hremna hrangin irdoina hai, hri hai, châm hai, thil saloi chi tinrêng hong tung khomsian, hi in mikot, nangma biakna hranga ni inkunga hin ngîr kin ta, ni san ni ti, an iti a ni. 10#Dhn 2.4-19 Irngai ro, atûn hin Amon mihai, Moab mihai le Edom mihaiin an ni doia, kin irchibulhai Aigupta rengata an hong suak khom khan an rama fe phalhai mak chea. Kin puhaiin an ram chu an irhuala, insiat thei mahai. 11Irngai ro, ramchâra kin inei ta hranga ni ni ipêk ram rengata nin hnotsuak tumin an hong irthok tâk a ni! 12O kin Pathian an chunga roi hong rêlin lân; a ni doi hrang sipaihai hi an tama, ite châng thei ma ung. A thôna lam zel inhre ta ma ung, ni makunga kin hong intung phot a ni hi,” an tia.
13Judai rama mi murdi chu an dôngma le an nâihai leh tempil mikota an ngîra. 14Khataka om sa Levi irchia mi inkhat, Zekaria nâipa Jahaziela chunga Rengpa irtha a zuang tunga. Ama chu Asafa pâla mi a ni, Zekaria hi Benaia nâi a nia, Benaia hi Jeiela nâi a ni, a pu chu Matana a ni. 15#Dhn 2.4-19 Jahaziela’n, “Judai rama mi murdi le Jerusalema omhai le nang Jehosafata, Rengpa’n hiang hin a ti, sipai an tam hrai sikin chi no’n lân, ngîk viat no ro. Irdoina chu ki kuta om a ni, nin kuta om ni ma. 16Nangtûk chu Zif irkânna an hongin lei doihai unglân, phâizôl tung mân Jezruel kôl, ram irhelna laia lei inruanghai roi. 17#Fes 14.13-14 Hi irdoinaa hin nin idoihai nang no ni, nin omna hranga khan lei inruanghai phot roi. Rengpa’n nangni inhnêtir a ti. Judai ram le Jerusalema mihaio, chi no roi, ngîkhai viat no roi, doi hrangin irthoksuak roi, Rengpa chu nangni tiang kop a ti,” a tia. 18Reng Jehosafata chu a hmâi kûnin irnêng a sika, mipuihai khom an kûna, Rengpa chubai an mûka. 19Levia irchi, Kohata le Kora pâlhai chu an ngîra, Israelhai Pathian Rengpa chu inpâkin inring takin hla an saka.
20Zînga chu mihaiin Tekoa khua kôl ram irchêpna tiang an pan hrang a nia, an suak hranga khan Jehosafata’n an kuang, “Juda le Jerusalem ruathartehaio, Rengpa nin Pathian chu song unglân, ngîrsuak thei nin ti. A deipu thuhril kha iam unglân, hlochuk nin ti,” a tia. 21Rengin mihai kha a chongpuihaia, Levi irchia zaipôl sakhai chu hun ser bîka innghâk hrang tukfamhai irbelin sipaihai mahruai hrangin an tia; Rengpa chu inpâk roi, “A khonzâna chu kumtuangin a om hrang sikin,” ti hla an saka.
22Khaanga hla an sak laiin a doitu sipaihai an tei phuata, 23Amon-hai le Moabhaiin an doihaia, an that phiarhaia, a sate’n an irdoi tâka. 24Judai rama sipaihaiin ramchâra in irsâng an va dêna, an râlhai an thîrhaia. An rêngin hnuaichanga an inrîl dûla, an lei thi vinga, inkhat lua an tânsuak om mahai.
25Jehosafata le a rualhai chu râllâk sum la hrangin an fea. Kha laia khan sehrât tamtak an om saa, fâk hranghai, tukfamhai, le thilhlu tamtak an hmu sa. Râllâk sum lâk hrang tamtak a nia, sûn thum sûng chu an ilâk mai a nia, an ipêl zoi loi rakin an ilâk a ni. 26A sûn minli nî chu, Baraka irhôra an irchuna, anni hranga a sinthohai sikin Rengpa chu an inpâka. Khasikin kha hmun kha Beraka,#20.26: Beraka ti omzia chu Hebrai chongin “Inpâk” tihna a ni. an iti tâk a ni. 27Rengpa’n an râlhai an hnêtirhai tâk sikin Jehosafata le a rualhai chu lôm takin Jerusalema an fe tâka. 28Khua an tung tôn chu, perkhuanghai, têngrephai le bekulhai tum pumin tempil an pana. 29Israelhai râl, Rengpa an Pathianin a isoisak dân chu an kôlvêla namhaiin an inhriatin chu, Pathian kha an chia. 30Jehosafata chu râl boiin an lala, Rengpa’n kil tin le hmun tina a vêng mai sikin.
Jehosafata zoro hek tiang pang
(1 Rng 22.41-50)
31Jehosafata chu kum sômthum hleikhata khan Judai rama rêng a changa, Jerusalema kum sômhni ringa an lala. A nu chu Azubai, Silhia nâinu a ni. 32A pa Asa ang khan Rengpa makunga sin sa a thoa. 33Nam dang pathian biakna, hmun irsânghai insiat zoi maka, mipuihai khomin an irchibulhai Pathian biak uar ok ta mahai.
34Jehosafata sintho murdi, rêng a chang phut ata a thi ni dêna thuhai chu Hanania nâipa, Jehua thurchi ti irziakna lekhabua a irziak a ni. Israelhai rêng thurchi ti irziakna lekhabua a om. 35Voikhat chu Judai rama rêng Jehosafata’n Israel rêng Ahazia, thil dikloi tho ngaitu leh rual an irchanga. 36Ezion-Geberah Tarsis khuaa fe hrangin irkuanga an kâia. 37Maresa kho mi, Dodavahua nâipa Eliezera’n Jehosafata kuang, “Israel rêng Ahazia-hai leh nin irrualpuihai sikin, Rengpa’n ni sintho insiat a ti,” a tia. An irkuanghai a koi pehaia, Tarsis khuaa fe thei zât zel om ta maka.
Currently Selected:
2 THURCHI SUINA 20: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
