2 THURCHI SUINA 18
18
Deipu Mika’n Ahaba a ngo
(1 Rng 22.1-28)
1Juda rêng Jehosafata chu ar chong ok tâka, ar hming an thang ok zoiin chu Israel rêng Ahaba leh irkop hrangin an tia, an nâihai an irneitirhaia. 2Kum tamtak zoia chu Jehosafata chu Samari khuaa Ahaba hmu hrangin a suaka. Jehosafata le a rualhai lômna’n Ahaba’n kêlbelra le sehrât tamtak a thata, hruai an thea. Gilead biala Ramot khua doipui hrangin a koia. 3“Ramot khua doi hrangin ni fe nuam mo?,” a tia. Jehosafata chu, “Ni fe nuam te tena kei le ki sipaihai fe an irsiam mai, nang san ki ti,” a tia. 4“Rengpa irdon masa phot ro,” a ti saa. 5Ahaba’n deipu irzaminli vêl chu, “Ramot khua ki idoi hrang le doi loi hrang?” tiin ar dona. Anni khan, “Doi ro, Pathianin nang ompui a ti,” an tia. 6Jehosafata’n, “Deipu dang Rengpa nir don pe thei an iom loi ma ni?” a tia.
7Ahaba’n, “Inkhat, Imla nâipa Mikaia chu a la om, sin sa ite ni la zongpui thei ngai ma, ennuam ma ung, sin saloi i mani a ihrilsuak ngai kêng,” a tia. Jehosafata’n, “Reng takin khaanga ti hrang chu ni ma duah,” a tia. 8Reng khan hruaitu inkhat a koia, Mika hruai hrangin a tîra. 9Reng inhni chu Samari khopui lampui pên tiang hruizôla rêngtoihmuna khan an toia; deipuhaiin an hrilhaia, thu an hril khumhaia.
10An laia mi inkhat, Kenaana nâipa Zedekia’n thîr se’rki illim a sina, Ahaba kuang, “Suriahai chu hi leh hin beihai ei ta, inhnêhai ei ti,” a tia. 11Deipu danghai khomin khaangin an tia. “Fe’n lân, Ramot khua chu doiin lân, man ngêt ni ti. Rengpa’n nan hnêpui a ti,” an tia.
12Mikaia hruai hranga an tîrin chu a kuang, “Deipu dang murdi’n a sa tiin rêng kuang khan thu an hrila, nang khomin ang khan ti ro,” a tia.
13Mikaia’n, “Rengpa mihring irhming sâmin ki hril, ki Pathianin hril hranga a ni inhril chu ti ki ti,” tiin a sâma.
14Reng Ahaba makunga a va tungin chu, rêngin, “Mikaia, rêng Jehosafata leh Ramot khua kha doi hrang mo doi loi hrang mo?,” a tia. 15Mikaia khan, “Hong doi ngân u ta, nin inhnê mo, Rengpa’n nangni inhnêtir a ti,” a tia. Ahaba’n, “Rengpa irhmingin ki kuang thu ni hrilin thudik vai nin hril ro, voi iza mo ki iti hrang?” a tia.
16 #
Nam 27.17; Ezek 34.5; Mt 9.36; Mk 6.34 Mikaia’n, “Kêlbelra hrungtu nei loi angin Israel mihai chu tânga an indarh ki hmua. Hihai hin hruaitu nei mahai; mâni in lama, a chîn tete’n fe ri sehai, a ti e,” a tia.
17Ahaba’n, Jehosafata kuang, “Irngai ro, keima hranga thil sa hrang ite hril ngai mah ti nang kin hril. Thil saloi inzen a hril ngai,” a tia.
18Mikaia’n, “Rengpa thu hi le’rngai roh. Irvâna a rêngtoihmun Rengpa thu chu ki hmua, vântîrtônhaiin an irhîlhaia. 19Tu mo Ahaba kuanga fe hranga, Ramot doia thi hranga zu huang hrang? Rengpa’n a tia, vântîrtôn senkhatin chu thu an hrila, a danghaiin thu dang an hrila. 20Irtha inkhat hi a zuanga, Rengpa makunga a va ngîra, ‘La zu huang hi rong a ti,’ a tia. Rengpa’n ‘Itin mo ni zu ihrung hrang?’ a tia. 21Irtha khan, ‘Ahaba deipuhai minlak inthotir hrang,’ a tia. 22Khaang khan a ni, Rengpa’n hi deipuhai hi ni kuang minlak a inthotir. Rengpa’n ni siatna hrang a inkung a ni,” a tia.
23Deipu Zedekia’n Mikaia a va pana, “Itiklai khan mo Rengpa irtha’n a ni mâksana, ni kuang a iom tâk?,” a tia.
24Mikaia’n hiang hin a sâma, “Tentan sûngrîla irbîk hranga ni fe tika, inhria ni ti,” a tia.
25Ahaba’n hruaitu inkhat kuang, “Mikaia kha chelin lân, kho sûng hruaitu Amon kuang hruaiin lân, rêng nâipa Joasa khom irhmutir roh. 26Dam takin ki hong kîr nôk mâka chu intângnaa khumin lân, bai le tui vai pe ri se,” a tia.
27Mikaia’n “Dam taka ni hong kîrin chu Rengpa’n a ni ichongpui loi ni a ti; ki iti hi mi tinin inhre ri sehai,” a tia.
Ahaba thina thu
(1 Rng 22.29-35)
28Reng Ahaba le rêng Jehosafata chu Gilead biala Ramot khua doi hrangin an fe tâka. 29Ahaba chu Jehosafata kuang, “Ei irdoi tena irvô indanglam ki ta, nang chu rêng irvôna leh irvô mai ro,” a tia. Reng Ahaba chu a tukrivo a thûla, irdoina khan a va kop sa tâka. 30Suria rêngin tâli chalaitu hruaitu chu, “Israelhai rêng ti no chu tûte doihai no roi,” a tia. 31Khahai kha Jehosafata’n a hmu’n chu Israel rêng mani a sôna, a hong bei tâka. Jehosafata chu a khêka, Rengpa Pathianin a sâma, a doituhai kha an hnotpaihai nôka. 32Tâli chalaitu hruaituhai khan Israel rêng ni mah ti an inhriatin chu, irzûl ta mahaia. 33Suria sipai thal kâpte hin mo rêng Ahaba chu râltukfam leh irvo a kârhai hin hong tok pal lik a ti, a tia. A tâli chalaitu kuang khan, “Sâbe ki tuang ta e, kîrin lân, irdoina hmun ata hi rot ta ro,” a tia. 34An irdoi lai taka hin Ahaba chu tâli chunga a bânga, misa a tâkin chu a thi tâka.
Currently Selected:
2 THURCHI SUINA 18: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
