2 THURCHI SUINA 17
17
Jehosafata rêngin a om
1A pa Asa irthûlin Jehosafata chu rêng a changa, Israelhai doi thei hrangin ar sinsiama. 2Judai ram kul omna khuahaia sipai a siaa, Judai ram thingtânga sipai a siahaia. 3An lal phut laia a pa itho ang khan Jehosafata khomin a thoa, Baal biak nuam maka. Rengpa’n sat a vura. 4A pahai Pathian sin a zonga, Pathian thupêkhai a zôma, Israel rênghai angin om maka. 5Rengpa’n Jehosafata chu Judai rama an lal indettira, mihaiin khâzana an hong pêk ngaia, a irchong ok tâka, mihaiin an irngaiirsâng tâka. 6Rengpa sintho chu a inuam lam tak a nia, an millim biakna hmun irsânghai, Aseri irlimhai Judai ram ata an boipaia.
7Kum thum an lal zoiin Benhaila hai, Obadia hai, Zekaria hai, Nethanela hai, Mikaia hai, Judai ram khopuia irchutirtu a tîrsuaka. 8Levi irchia mi kuak le ochai inhni an fe saa, Levi irchihai chu Semaia hai, Nethania hai, Zebadia hai, Asahela hai, Semiramota hai, Jehonathana hai, Adonija hai, Tobija hai, Tobadonija hai an nia, ochaihai chu Elisama le Jehorama an ni. 9Rengpa dân lekhabu chu an chôia, Judai rama khuahai chu an irfangpuia, mihai an irchutirhaia.
Jehosafata roiinpuizia
10An omna ram sûnga chu Jehosafata doi ngam loi hrangin Rengpa’n an dôptirhaia. 11Filistia mi senkhathaiin khâzana tangkarua le thilpêk dang tamtak an hong pêk ngaia. Arab mi senkhathai khomin kêlbelra sângsari irzasari le kêl sângsari irzasari an hong pêk saa. 12Khanchu, Jehosafata chu a hon lal ual uala, Judai ram sûnga a dung le a khangin kulhai a sina, khopuihai an dinga. 13Khahai hmuna khan fâk zât a hrê pehai oka. Jerusalem khuaa sipai hruaitu lian mi hâitak takhai a siahaia. 14An irlo fe dân angin hruaitu a siahaia. Juda irchia sipai hruaitu tak chu Adna a ni, sipai nuai thum ar ôia. 15A hnuai renga chu Jehohanana a ni, sipai nuai hni le sîngriat ar ôia, 16inthumna chu Zikria nâipa Amasia a ni, sipai nuai hni ar ôia. 17Benjamina irchia sipai hruaitu tak chu sipai songinruk tak Eliada a ni, sipai nuai hni rôppho le thal chôihai ar ôia. 18A hnung renga chu Jehozabada a ni, irdoi irsiamchak sipai nuai khat le sîngriat ar ôia. 19Jerusalema, hi sipaihai hi rêngin a isonghai a nia, hi khêla hin Judai rama kho kulhaia sipai a sia sa a ni.
Currently Selected:
2 THURCHI SUINA 17: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
