2 THURCHI SUINA 16
16
Israelhai laia buaina
(1 Rng 15.17-22)
1Judai rama Asa kum sômthum ringa an lal kumin, Israel rêng Baasa’n Juda rêng Asa ram ata tûte an hong thei loina hrangin le tûte an fe loina hrangin Rama khuaa kul a sina. 2Asa’n Tempila sum kok ata tangkarua le rângachak a lâksuaka, Damaska khuaa om Suria rêng Benhadada kuang a thona, a kuang, 3“Ka pa le ni pa an irsan ang khan, eini khom irkop ei ta, en ro, tangkarua le rângachak ki hong thona, Israel rêng Baasa leh nin rual irchang masan tan lân, ki ram ata a sipaihai khâipai sian,” a tia.
4Benhadada’n Asa iti chu a sa a tia, a sipai hruaitu a koia, Israel ram chu a rûn tâka, Ijon hai, Dan hai, Abel-maim hai le Naftalia hai biala neinun omna khua murdi chu a lâka. 5Kha thilhai kha rêng Baasa’n a inhriatin Rama khuaa kul a isin chu a’rngamsan tâka. 6Rama kul sinna hrang lung le thinghai chu la hrangin Judai rama mi murdi chu Asa khan a pana, Geba le Mizpa kul sinna’n a hmanga.
Deipu Hanania
7Kha laia khan deipu Hanania chu rêng Asa kuang a honga, a kuang, “Pathian Rengpa iam loiin Suria rêng iampumin ni oma; khasikin, Israel rêng sipaihai chu nin suahai tâka. 8Ethiopia le Libua mihai khan sipai le sakor tâli tamtak le sakor chung chuang mi tamtak an inei mo ni ma? Rengpa chu ni tûnga nang a inhnêtir a ni kha. 9Rengpa’n ama iamzoi loihai chu changpui hrangin rammual pumpuia a mit a inlêngtir ngai a ni. Atûn ata chu doi hrang nei mai ta ni ti, inzakpuiom takin thil ni itho a ni hi,” a tia. 10Deipu chunga khan Asa chu a ning an mur pea, a kut thîr bânhrial leh a khita, intângna ina a khuma, khatak ata chu mi dang chunga khom nghaltôk song a phut tâka.
Asa inlal mongna tiang thu
(1 Rng 15.23-24)
11Asa inlal phut ata a mong dêna thurchi chu Juda le Israel rênghai thurchi irziakna bua a chuang. 12Asa chu kum sômthum kuak an lal zoiin a ke a pân pea, an bâi tâka, Rengpa pan loiin daktor a pana. 13Kum hni zoia chu a thia; 14Davida khopuia, a thân hranga a ichoina khan an phûma. An phûm mân mosola hai, sahriak mirimhoihai an pola, ama sûnpuina’n meipui an sêm ir-al tâka.
Currently Selected:
2 THURCHI SUINA 16: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
