1 THURCHI SUINA 21
21
Davida haiin irtepna an nei
(2 Sam 24.1-25)
1Setana’n Israelhai soisak a nuama, Davida’n Israelhai kha irtepna a neipuihaia. 2Joaba le hruaitu danghai laia, “Israel ram hi a kil khôra Beerseba rengata Dan dênin irfang suak ving unglân, Israel mi iza mo an iom irziakhai ving roi,” a tia. 3Joaba’n “Rengpa hin atûna Israel omhai nêka tam inomtir a ta; ka pu nangma mihai an nia, itho ual sikin mo hi thil hi ni ni inphût, kin nam pumpuiin thei loi kin ichang hrang anga?” a tia. 4Khannisian rêng thu kha a len thang tâk sikin Joaba’n Israel ram chu ar fang suaka, Jerusalema a hong kîr nôka. 5Joaba’n Israel mi om zât chu a hrila. “Sipaia chang thei zât mi nuai sômhleikhat Israel rama an oma, Judai rama nuaiminli le sîngsari an om,” a tia. 6Reng thu kha a zômpui no sikin Joaba’n Levi irchi le Benjamina irchia mihai kha tep sahai maka.
7An sin thôna kha Pathianin lôm maka, Israel mihai kha a hremhaia. 8Davida’n Pathian kuang, “Thil ki tho inchâia, invêtom tak a ni, ni ngaidam ro,” a tia.
9 Rengpa’n Davida deipu Gada kuang, 10“Fe’n lân, lam inthuma kho tak hi mo an thang nuam, a inthang tak hi tho pe ki ti a tih ti Davida kha va hril ro,” a tia.
11Gada kha Davida kuang a fea, Rengpa thuhril kha a van sîr pea, “A kho tak hi mo ni inthang nuam hril ro, 12kum thum châm tuang hi mo, tha thum râl irzûl mo, sûn thum Rengpa vântîrtônin Israel ram pumpui khandaia soisak le hria hrem? Rengpa ni tîrtu kha itin mo ki lei isâm hrang; irngaitua’n lân, ni hril roh,” a tia.
13Davida’n Gada kha hiang hin a ti pea, “A’rngai lam reng inhre ma ung! Mihriamhai kuttum tuang nuam ma ung, Rengpa kuttum tuang ki nuam ual, ama chu phûkdâi a ni sikin,” a tia.
14Khanchu Israelhai laia hri a hon lêngtira; mi sîngsari an thia. 15Rengpa’n Jerusalem insiat hrangin vântîrtôn a zuang tîra, nuam nôk maka, vântîrtônhai kuang khan, “A ruk ta, tho ta no ro,” a tia. Khan vântîrtôn kha Jebus mi Arauna hruizôla khan vântîrtôn kha a ngîra.
16Davida’n a hong ena, Jerusalem insiat hrang vântîrtôn khandai chôi, irnêng le irvân kâra ngîr a hmua, Davida le mipui hruaituhai khan bora puan an sil vinga, hnuai enin an kûna. 17Khan Davida a chongchaia, “O Pathian, thil sual thotu chu keima hi ki ni; irteppui kha ki inthotir a ni; hi mipui ite inhre loihai hin ite tho inchâina nei mahai. Keima leh ki in mihai hi ni hrem ta ro, ni mihai hi chu hôihai ro,” a tia.
18 Rengpa vântîrtônin Gada kuang khan, “Davida chu Jebus mi Arauna hruizôla maichâm sin hrangin hril ro,” a tia. 19Davida’n Rengpa thu a zôma, Gada hril angin a fe tâka. 20Hruizôla khan Arauna le a nâipa minlihai khan gohu an lei chîla, vântîrtôn an hmu’n chu an lei irbîka. 21Arauna’n Davida hong a hmu’n chu hruizôl ata kha a zuang chuma, hnuai en pumin chubai a mûka. 22Davida’n, “Hri a om loina hrangin ni hruizôla hin maichâm siam ki ti, nir chotirin lân, a man nang pe ki ti,” a tia.
23Aruana khan, “Ka pu la ta ro, a sa ni iti lam tak ni ta ri se. Maichâma thilinhlan hrang sehrâtchal khom a om, a hâlna hrang thing khom a om ving ta; baidi thilinhlan hrang bai khom nang ki pêk sa, itinrêng tum ving ki ti,” a tia.
24Reng Davida’n a sâma, “Ni ma, a man dik tak nang pe ki ti, Rengpa ta hranga thilinhlan hrangin ni ta ite a man boiin la no ning; a man boiin hâlirvôm thilinhlan hrang khom inhlan no ning,” a tia. 25Davida’n Arauna chu a hruizôl mana khan rângachak tangka irzaruk a pêka. 26Kha hmuna khan Rengpa hrang maichâm a siama, hâlirvôm thilinhlan le irngeina thilinhlan an hlana. A chongchaia, Rengpa’n a zuang sâma, maichâma hâlirvôm thilinhlan chu irvân ata meiin a zuang kâng inhekpaia.
27 Rengpa’n vântîrtôn khandai kha khâipai hrangin a hrila, a iti angin a thoa. 28Rengpa’n a chongchaina a sâm a nih ti Davida’n an hriata, Arauna hruizôla maichâma khan thil an hlan tâka. 29Kha laia khan Biakbuk in le thilinhlanna maichâm Mosia isiam kha Gibeon-ah a la om maia; 30khannisian, Rengpa khandai tuang a chi sikin Pathian biak hrangin khatak khan Davida chu fe ngam loiin a om tâka.
Currently Selected:
1 THURCHI SUINA 21: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
