1 THURCHI SUINA 19
19
Amon le Suria Davida’n an hnêhai
(2 Sam 10.1-19)
1Khan Amon rênghai Nahasa chu a thia, a nâipa’n a’rthûl a changa. 2Davida’n, “Khôn mo, Nahasa khan a nin rena, a nâipa Hanuna inren hrang hi ki intâng a ni,” a tia. A pa râl hrangin mi a tîra. Hanuna râl hrangin Davida siahlohai an fea, Amon-hai rama Hanuna in chu an va tunga. 3Amon mi lianhaiin Hanuna kuang khan, “Davida hin sûnpui ta taka râl hrangin mi hong tîr hrangin ni iam mo? Ei ram hi an lâk theina hrangin a siahlohai hi eninrûk hranga a hong itîr a ini loi ma ni?” an tia.
4Davida palaihai chu Hanuna’n a chelhaia, an hnermul a voipai pehaia, an songkol irfualhai khom an kong tena a tanpai pehaia, an fetirhaia. 5An lei isoisak dân chu Davida inhril hrangin mi an tîra, anni chu an inzak luatin, rêng kuang fe an chia, Davida’n, “Jeriko khuaa om unglân, nin hnermul a sei nôk ual tena la hong ta roi,” tiin mi he a bêhaia.
6Reng Hanuna le Amon mihaiin Davida ningmur dân an inhriatin chu Mesopotamia rama mihai le Suria rama Maaka le Soba mihai sakor tâli le sakor chung chuang lana hrangin tangka her sîngthum sângminli an pêka. Tâli sîngthum sânghni an hruaia, annihai leh khan Maaka rêng le a sipaihaiin Medeba kula riakbuk an khuara. 7Amon mihai khom kho tin ata irdoi hrangin an hor thoka.
8Kha kha Davida’n a len hriata, a sipai hruaitu Joaba chu a koia, a sipai hrât pâlhai a bukkhômhaia. 9Amonhai chu an irsiama, an rêng omna khopuia Raba kul pên tiang omhmun an khuara; anni tianga kop rênghai le sipai lei sinhaiin ramri bulhaia hmun an siama.
10Joaba’n a maton tiang le a hnung tianga râlhaiin hong doi a tih ti an hriatin chu, a sipai sa ualhai chu an thang suakhaia, Suria ram ata sipai hong doi hrangin an irtângtirhaia. 11Sipai danghai chu a upa Abisaia an hruaitira, Amon-hai doi hrangin an irtânga. 12Joaba’n, “Suria rama mihai kin hnê no’n chu ni hong sanin lân, Amon-hai nin hnê no’n chu nang hong san ki ti, 13a sân irnak songin lân, ki mihai le ki Pathian omna khuahai sansuak ei ti. Rengpa’n chu a sa a iti lam angin ni lei san a ti,” a tia.
14Joaba le a mihaiin Suria mihai an doia, inhnê loiin an rot tâka. 15Amon mihaiin Suriahai rot an hmu’n chu Joaba upa Abisaia kuang an rota, an khua kul sûnga khan an lûta, Joaba’n Jerusalem tiang a rotsanhaia.
16Suria mihaiin Israelhai chu ngam mahai ti an inhriatin chu Eufrates tui varâla Suria mi danghai chu an punga, Zoba rêng Hadadezera sipai hruaitu Sofaka hai an hong irthoka. 17Kha thu kha Davida an hrila, Israel mihai a bukhaia, Jordan an irkâna, an omna a va tunga. Suriahai kha an hong doi tâka. 18Davida’n tâli chalaituhai sângsari a thathaia, kea fe sipai sîngminli hai le an hruaitu Sofaka khom a that saa. 19Hadadezera haiin Israelhai chu ngam mahai ti an inhriatin chu, Davida leh an chonga, irngeiin a khua mi le sa an chang ta. Suria mihaiin Amon-hai khom san nuam ta mahai.
Currently Selected:
1 THURCHI SUINA 19: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
