1 THURCHI SUINA 17
17
Davida kuanga Nathana thu intung
(2 Sam 7.1-17)
1Reng Davida chu in sûnga a om ual tâka. Sûn khat chu deipu Nathana a koia, a kuang, “Sidar thinga siam ina ki oma, Rengpa Thuthung Bôm lak puan in papaia a oma,” a tia.
2Nathana khan, “Insâpna mai ni ti hi te, thoiin lân, Pathianin nang ompui a ti,” a tia. 3Khannisian, kha ni zân khan Pathianin Nathana kuang khan, 4“Fe tan lân, ki siahlo Davida kuang ki thu hi va hril ro, nangma hin ki omna hranga tempil sin hrang ni mak che, 5atûn ten hin Israel mihai Aigupta ram ata ki hruaisuak ata kha tempila la om ngai ma ung. Puan in papaia kêng ki iom ngai, hmun dang danga ki irson thi thiai a ni. 6Israel mihai ki fepuihai laia khan, hruaitu hranga ki ibehai, mi tukhom sidar thinga tempil ni sin pe hrang inphûthai ngai ma ung.
7“Khasikin ki siahlo Davida kha hril ro; kei itinrêng Rengpa hin a kuang, rama ni kêlbelra en lai takin nang ki hruaia, ki mi Israelhai rêngin nang ki siama. 8Ni fena hmun tina nang ki ompuia, ni idoi, ni râlhai murdi, nang kin hnêtira, rammuala rêng irhming inthang takin nang siam ki ta. 9Mi tûte nang isêl loina hrang hmun, ki mi Israelhai hranga ki inthanga nang kin omtira, mi hrât tak takhaiin nang an doia; atûn ata nang doi ta no nihai. 10Ki mi Israelhai hrangin roirêltu kin danga, ni râlhai murdi nang an hnêpui le irchi tamtak pêk kin kunga. 11Ni thi tena, ni pahai kuang ni fe tena, ni nâihai laia inkhat chu rêngin siam ki ti. 12Ama khan in ni sin pe a ti, kumtuanga inlal hrangin siam indet ki ti. 13#2 Kor 6.18; Heb 1.5 A pa ni ki ta, ki nâipa ni ta a ti, nin lal laia rêng ki irheisan ang khan irheisan ta no ning. 14Ki mihai le ki ram sûnga roirêltu’n sia ki ta, a’rchia mihai ngêtin a rêngtoihmun chu hong lua pat an ti,” a tia. 15Pathianin thu a ihril murdi chu Nathana’n Davida a hrila.
Davida Lômthu hril chongchaina
(2 Sam 7.18-29)
16Reng Davida chu Biakbuka khan a fein a toia, a chongchaia, “O Rengpa Pathian, kei le ki in mihai hi ithoa mo hiang dôra ni ni inhlu? 17Kha ten khom khan a ruk ti loiin ki’rchia mihai khom siam insahai mai hrang nin kunga, a ni, o Rengpa Pathian, mi roiinpui tak angin ni ni’rvôtira. 18Imo nang ki la izong ual hrang? Ni siahlo hi ni nin hriat suak ving a ni. 19O Rengpa, ni siahlo hi ki sa theina hrangin, nangma thuin ni chôiindôm ni tuma; ki’rchihai khom chôiindômhai ni tum mai a nih ti ni nin hrila. 20O Rengpa, nangma ang hi tûte om mahai, ki inhriat sûnga chu nangma vai hi Pathian chu ni ni. 21Israel mihai ang hi rammuala nam dang om mahai, suak ata nir tana, Aigupta ram ata ni hruai suakhaia, thil roiinpui le irkhêl ta tak ni thoa nir hming an lâr tâka. 22Israel mihai chu kumtuanga ni mi ni hrangin ni tia, o Rengpa nang hi Pathian tatak ni ni ngêt a ni.
23“Khante o Rengpa kei le ki’rchihai laia ni thu inkung nuam hi, ni thu ang takin hlo inchuktir roh. 24Ni’rhming roiinpui a ta, ni mihaiin itinrêng Rengpa hi Israelhai hrangin Pathian tak a lei ni tâk hi; la ti an ti. Kin lalna khom hi kumtuangin indet ni ti. 25Ni siahlo hi thil tinrêng ni hrila, ki’rchihai khom hon lal mai an tih ni ti sikin, ni kuang hi hi ki hong ihril ngam a ni. 26Nangma chu o Rengpa, Pathian ni nia, hi thil roiinpui tak tho hrang ni nin kung pe tâka. 27An chunga ni phûkdâi nin sua mai theina hrangin satvurin lân, o Rengpa, nangin sat ni vur tâka, ni satvurna chu an chunga om mai ri se,” a tia.
Currently Selected:
1 THURCHI SUINA 17: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
