1 THURCHI SUINA 15
15
Thuthung Bôm lâk an tum nôk thu
1Davida’n a omna hrangin “Davida khopuia” in a sina, Pathian Thuthung Bôm siana hrang hmun a sinsiama, puan in khom a sin saa. 2#Dhn 10.8 “Levi irchihai vaiin Thuthung Bôm chu an irzôn hrang a ni, a’rzôn hrangtuhai leh kumtuanga sintho hrangin Rengpa’n hihai hi an thang,” a tia. 3Davida’n Israel mi murdihai chu Jerusalema Thuthung Bôm siana hranga a isinsiama khan a bukkhômhaia. 4Arona irchi le Levihai chu a koihaia, 5Levi irchi, Kohata irchihai chu irzakhat sômhni, Uriela hai leh an honga. 6Meraria irchi ata irzahni sômhni, Asaia hai leh an honga. 7Gersona irchi ata mi irzakhat sômthum, Joela hai leh an honga. 8Elizafana irchi ata mi irzathum, Semaia hai leh an honga. 9Hebron irchi ata mi sômriat, Eliela hai leh an honga. 10Uziela irchi ata mi irzakhat sômhleihni, Aminadaba hai leh an honga.
11Davida’n ochai Zadoka le Abiathara hai a koihaia, Levi irchia mi kiruk, Uriela, Asaia, Joela, Semaia, Eliela, Aminadaba hai a koihaia, 12an kuanga khan, “Levi irchia hruaitu nin nia, irthiang infâi unglân, nin Levi chanpuihai khom irthiang infâihai roi. Rengpa Israelhai Pathian Thuthung chu a siana hmuna ki isinna dênin nin irzôn intung hrang a ni. 13Lâk kin tum matona khan om mak chêia, Rengpa kin Pathian chu a lâk hrang dân irdon loiin kin oma, a ni isoisak a ni,” a tia. 14Rengpa Israelhai Pathian Thuthung Bôm lapai hrangin chu ochaihai le Levihai chu an irthiang infâi zoi tâka. 15#Fes 25.14 Mosia kuanga Rengpa ihril angin Levi irchihaiin bôm chu a zônfung leh an irzôn tâk a ni.
16Levi irchihai chu zaipôl hai, perkhuang suka têngrep intôka tîr hrangin an ulianhai chu Davida’n a hrilhaia. 17Têngrep inring tak suk hrangin hi mihai hi a bêhaia. 18Joela nâipa Hemana, a sanghai Berekia nâipa Asafa, 19an sangpa Meraria irchia mi Kusaia nâipa Ethana hai. 20Annihai hi changpuia perkhuang sa zât chi inper hrangin Levi irchihai an kunghaia. Zekaria, Aziela, Semiramota, Jehiela, Unia, Eliaba, Maaseia, Benaia. 21Perkhuang irhâi chi thum inper hrangin Levi irchia mi, hihai hi an thang suakhaia. Matithia, Elifelehua, Mikneia, Azazia, tempila pulis Edoma le Jeiela hai leh.
22Kenania chu thil tum thei tak a nia, Levi irchia irhâihoi tumtuhai chu a hruaihaia. 23Berekia le Elkana chu Obed-edoma le Jehia le Thuthung Bôm hrung hrangin an thanghaia. 24Ochai Sebania, Josafata, Nathanela, Amasaia, Zekaria, Benaia, Eliazara hai chu Thuthung Bôm matona fein bekul tumtu hrang an ni.
Thuthung Bôm Jerusalema an chôi
(2 Sam 6.12-22)
25Reng Davida, Israel ulianhai le sipai sângkhat hruaitu chu Obed-doma ina Thuthung Bôm la hrangin raifân takin an fea. 26Rengpa’n Levi irchi, Thuthung Bôm irzôntu hrang a changpui theina hrangin an kuang, sehrâtchal sari le kêlbelra sari an inhlana. 27Davida’n puanze irhmi a satak a sila, hla saktuhai khom, an hruaitu Kenania le Bôm irzôntuhai le an rêngin khaang khan an irvo vinga; Davida’n puanze irhmi Efod ar bel saa. 28Israel mi murdihai chu raifân takin an khêka, bekulhai, kêl irkîhai tumin, têngrep hai sukin, perkhuanghai inper pumin Thuthung Bôm chu Jerusalema an chôikâi tâka. 29Kho sûnga bôm an irzôn lût laiin Saula nâinu Mikali’n tukver ata a thîrhaia, rêng Davida lôm sika lâm le fuan kha a zu hmua, a lungrîla a hnuaisiaa.
Currently Selected:
1 THURCHI SUINA 15: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
