1 THURCHI SUINA 12
12
Benjamina mi Davida zuihai
1Reng Saula chia Ziklag khuaa, Davida intânin a om lai khan, Saula chu an irchipui Benjamina irchia mi ni khomsian irdoia lei kop ngai mi iamom taktak Benjamina irchi mihaiin an hong pana. 2Chang tiang le vei tiang inchanghlanga hmang thei an nia, sâilungdêng thei khom an ni sa. 3Gibea mi Sama nâi Ahiezera le Joasa-hai an hruaihaia, kha sipaihai chu hihai hi an ni. Azmaveta nâi Jeziela le Pelet Anathot khua mi Bereka le Jehua. 4“Pasal sa sômthumhai” laia mi sipai irhming inthang Gibea mi Ismaela, Gedera mi Jeremia, Jahaziela, Johanana le Jozabada. 5Harif mi Eluzai, Jerimota, Bealia, Semaria, Sefatia, 6Kora irchia mi Elkana, Isia, Azarela, Joezera, Jasobeama, 7Gedor mi Jerohama nâi Joela, Zebadia.
Gada mi Davida zuihai
8Ramchâra ar bîkna hmuna a om laiin Gada irchia mi irdoia kop sipai irhming inthanghai hin an hong panhaia, pho le ufeia râl doi thei an ni, kâmkeibaknei hmêl irput an ni, rôla sarza anga hrât an ni. 9An rênghai angin an irhminghai chu Ezera, Obadia, Eliaba, 10Mismana, Jeremia, 11Ataia, Eliela 12Johanana, Elzabada 13Jeremia le Makbanaia hai an ni.
14Gada irchia mi sipai senkhathai chu sângkhat hruaitu an nia, a la thar ualhaiin chu irza hruaitu an ni. 15Kum phuta, tha maton taka, Jordan tui lian laiin an hong irkâna, tui hrât laiin nisua tiang le nitâk tianga omhai chu an irzûlhai ta.
Benjamina le Juda Davida zuihai
16Benjamina le Juda irchia mi senkhathai chu Davida omna khur an pana, 17Davida’n a lei donhaia, “Keima tianga kop hranga hong nin niin chu, satakin nangni lei pom ki ti; thil saloi ite nin ta hrangin ki tho no khoma, ki râlhai kuanga ni ni pêk no hrangin chu kin pa Pathianin an hriat, nangni soisak ngêt a ti,” a tia.
18An laia hruaitu inkhat Amasaia chu Pathian irthain an thuama, hiang hin chong an kung tâka:
“Ni mihai kin ni,
Davida, Jesaia nâipa,
nangma mi kin ni.
Irtharngamna ni kuang om sianlân,
nang a san hrangtuhai kuanga khom om sianlân,
Pathianin nang changpui ri se,” a tia.
Davida’n a lei lômhaia, a sipai hruaitua a siahai ta.
Manasea irchi Davida zuihai
19Filistia-haiin Saula doi hranga an irsiam lai khan Davida khom a om saa, Manasea-hai khom senkhatin Davida tiang an kopa; khannisianlân, Filistia hruaituhai chu hmanghai ual ma; a pu Saula tiang kop a tih ti kha a chia, Ziklak khuaa an itîrpai a ni. 20Ziklag khua a hong tungin chu Manasea-hai laia sipai sângkhat hruaitu, Adna, Jozabada, Jediaela, Mikaela, Jozabada, Eliahua, Zilethaia hai ama tiang an rota. 21Davida’n sipai ulian pôl a doipuihaia, mi hrât pâl an nia, 22A nitin Davida san hrangin an hong bôk maia, Pathian sipaihai angin sipai pôl roiinpui tak an ni ta.
Davida sipaihai
23 Rengpa thu angin Saula ram Davida ilua hrang Hebron khuaa Davida kuang irdoina râltukfam irbela fehai chu hiang hin a ni. 24Juda irchia irdoina râltukfam irbela, pho le ufei chôihai chu 6,800 an ni. 25Simeona irchi irdoina mi hrâthai chu 7,100. 26Levia irchi 4,600. 27Jehoiada chu Arona irchihai hruaitu a nia, a kôla 3,700 an om pea; 28Zadoka ruatharte hrâthai chu sipai hruaitu 22 hai le 29Benjamina irchihai laia mi, Saula irchihai, 3,000 matona khan chu a tam ual hi Saula tianga kop ngai an ni. 30Efraima irchihai laia mi, mi hrât an in mi laia irhming inthang 20,800, 31khan Manasea nam chimriphai laia mi Davida rênga siam hranga honghai chu 18,000. 32Isakara irchi laia mi, kha laia thil inhriat mi Israelhai sintho hrang kâmnang inhriat mi a ulian ualhai chu 200, an urênghai chu an thu hnuaia om an ni. 33Zebulun hai laia mi, râl doi thei, irdoina hmangrua hmang thei ving 50,000 lungrîl det irput mi an ni. 34Naftalia hai laia mi sipai hruaitu 1,000 pho le ufei chôi mihriam 37,000 hai le 35Dan hai laia mi râltuk irvoa irbel sai 28,600. 36Asera hai laia mi râl doi thei ving 40,000. 37Khan Jordan râla Reubena-hai laia mi, Gad-hai laia mi, Manasea nam chimrip laia mi irdoina hmangrua tinrêng hmang thei 1,20,000.
38Khahai murdi kha irdoi mi, irbîk thei an ni, Davida chu Israelhai laia rênga siam hranga milung hmunkhat irputin Hebrona an fea; Israel danghai khomin Davida chu rênga siam hrangin lungrîl hmunkhat an irput vinga. 39Khanchu Davida kuang khan, sûn thum fâk zongin an oma; an urênghaiin an isuang pehai ving a ni. 40Kha vai kha ni loiin an kôlvêla, Isakara ram ata honghai, Zebulun ram ata honghai Naftali ram ata sakuartung hai, saringsei hai, sakor hai, sehrâtchal hai le fâk thei thil bai, theipui ra, grep ra, uain, sahriakhai an pêla, sehrât, kêlbelra tamtak an hong chôia, Israel ram chu lômna’n a sipa.
Currently Selected:
1 THURCHI SUINA 12: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
