TITA 3
3
Kristianrao ni yaowaithai
1Subung buthu khe sling ri lah, bisardarrao ode hukhum gnangrao ni bakhla ha hap mane, grao mani mane, khrip hamba khusi dang mani slai mani, 2saosi khebo hamya thiya mani, nam khormu phnangya mani, gasain mani, ode khrip subung ni bakhla ha hapyaba grao gibi khe wainso phin ri lah. 3Jingbo, sagang hade, gibir ja ba, grao layayaba, thokhi baiyaba, libima ni khrip jadi ha suk jang dongyaba, hingsa yaowai hi dongyaba, ode jing rege rege dong ba, ar saosi jang saosi jing thalaiya ja ba. 4Thikhabo, jini sogoyah Madai ham bani dara jang maya doya ode boni hamjaoma subung ni basao ha nujaophai hi, 5jar ni dormo ha ebo khusi buthu khe dang bani niya, boni khasaoma ni khlai hi se bo jing khe sogo hi, gadain jayaba ha susa hi, Bese Gathar ha jing gadain ja kha. 6Bese Gathar khe jini sogoyah Jisu Krista ni dara jang, jini basao ha hamsi ning lupha kha. Odebani se, bonsi khasaoma habo jing khe gibi ja ri hi, thaoglao ni hayu khe jing asa khlaiba lai ning don ni phantha buthu jing japhu ba se, 7boni mayama ni khlai hi Madai jang gibi ja hi jing asa khlaiyaba thaoglao ni hayu khe jing mai phu ma. 8Ebo grao lonma nangyaba se.
Madai khe lonyarao de hamba khusi dang phalang mani khlai hi khah muh ri lai la thing, bo buthu khe dang mani ang ning khe nangjao du. Bede thikhade bo buthu de bonthane khlai hi gabang hambi, ar labbo lab se. 9Thikhabo, gibir jathai jang grao banglaiyaba, greng ni khitha khe singbaiyaba buthu, Dara ni balam ha niyalaiyaba buthu khe dangkhlai lah, bo buthu de muilo jang lab musibo giri. 10Asaba subung nam khormu khaikhoyaba khede phin si phin gin bujai bani yaohon hade bokhe bisar da khlai lah. 11Oleiyaba subung de biphot ha galai hi, jarkhe bonsi gajai rila ba se.
Khoyaba ni grao
12Artema ja thing, Tukik ja thing, nini ha ang haiha kha ning, Nikopoli ha ani ha asaba dara jang phai lah. Bede thikhade maising songsi ang oraha dong ma bao du. 13Ukil Zena jang Apollo thu khe, mophosol thangba ha lama ha musi khebo bonsi dukhu maiya mani khlai hi, blaiba lai lai juru lah. 14Ode, jini subung buthubo, nangyaba khe phura khlai mani khlai hi, hamba khusi buthu khe dang hi jarkhe yaopha mane sling lai la thing.
15Aniha dongyarao khripbo ning khe khlim ha du. Lonma ha ang khe khasaoyarao ang khe khlim ri la ha.
Nisi khrip niha khasaoma dong thing.
Currently Selected:
TITA 3: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
