PHILEMON 1
1
Khlimyaba
1Paul, Jisu Krista ni khlai hi phatho ha dongyaba subung, ode jini daphlung Timothe de: jing hamjaoyaba ode jing jang baosi dukhu khlai phayaba Philemon niha, 2ode jini bahandao Aphi niha ja thing, jing siphaiya dongpha laiyaba niha ja thing, nini noh ha longjom bojom jayarao niha ja thing:
3Madai, jini bupha ode Gabra Jisu Krista ni phrang khasaoma jang shanti nisi jang baosi nalaibo dongpha thing.
Philemon ni hamjaoma jang lonma
4Daphlung Philemon, ang Madai biyaba buthu ha nalaibo nini bumu lahi ani Madai niha khajama ni grao khe ang thi re. 5Bede thikhade, Gabra Jisu Krista ni gede ode subung gatharrao khrip gede ni hamjaoma jang lonma ning maiyaba khe ang khna du; 6ning lonma ha ang jang baosi yaowai phalaiyaba de nisi niha dongyaba khrip hamba jinis phura sothar si tharmaiyaba ni balam ha de Krista gede ha hamdao phu mani khlai hi, 7daphlung, nini dara jang subung gatharrao ni khasu ha smao kha bani nini hamjaoma ha ning khaja hi ang gabang ning shanti mai kha.
Onesima ne khlai hi khainsu riyaba
8Odebani, bo nangjaoba lai dang mane hukhum riyaba khe Krista ha hamsi ning khitha rao la khabo, 9hamjaoma ni khlai hi ang Paul ra la khabo, Krista ni subung phatho ha ang jeb jaoyaba ja la khabo, bi dada ning khe khainsu du. 10Ang jar ni basa Onesima khe ang sikhol kha jaohi dongba ha maiyaba, bonthane khlai hi nini ha ang khainsu ri du. 11Bo de sagang ha ninthane khlai hi musi khusi nangya, thikhabo duha de anthane jang ninthane khlai hi gabang khusi ni subung ja kha.
12Bonthane ning ani khasu gojosi khe ang nini ha haiha phin kha. 13Bo se hamba graojma ni khlai hi ang sikhol khah jaoyaba ha boni baslai ha bo ang khe khusi dang ri phu mani khlai hi ani ha nisi dongsong ri mani ang hamsi ning nangjao du. 14Thikhabo, nini khasaoma khe bol jang khasa riba niya hi, nini grao lai ja phu mani khlai hi nini nangjaothai niyakha de musi khebo ang dangma nangjaoya.
15Khaisa basain ni khlai hi ning jang degao laiyaba de thaoglao jang bokhe baslai ha maisong nang thi thihi se, 16Bo de leng lai niya hi, leng thane hamdao, daphlung hamdaothao lai ja hi, anthane khlai hi hamdaothai ja hi, nisi ne khlai hi de saomang ha ode Gabra niha de ar jadao nang kho!
17Odebani, ning ang khe lugu se bao khade, ang lai ning bo khebo lamjao lah. 18Ode nini basao ha asaba gajai khlaiyaba ja thing, nini jinis lagai dong khade ani lagai ha nepha lah. 19Ang Paul jar ni yao jang ning ebo khe reb ba se; ang su ri nang, ani ha ningbo lagai dong thi hi ning khe ang thidaoya. 20Odebani, hoi daphlung, nini khlai hi Gabra ha ang khe khaja ri lah, ode Krista ha ani khah khe masa lah.
21Ang saniba thabo bangdao hi ning khusi dangma se thi hi ang tharmai du bani nini basao ha asa deng hi ninthane ang reb du. 22Asaba ja thing, bokhe se ning dangya hi, noh mathao manebo anthane khlai hi salai lah, nisi biyaba buthu ni khlai hi nisi niha ang yaopha ma nangma thi hi ang lon du.
Haiha bani grao
23Epaphra, Krista Jisu ha ang jang baosi phatho ha dongyaba, ning khe bo khlim ha du. 24Ang jang baosi khusi dangphayaba Marka thu, Aristarka thu, Dema thu, Luk thubo olei jasoni ning bonsibo khlim ha du.
25Jini Gabra Jisu Krista ni khasaoma nisi khrip ni bese jang baosi dongpha thing. Amen.
Currently Selected:
PHILEMON 1: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
