NUJAOYABA 21
21
Nokhasao gadain ar phirthi gadain
1Boha, nokhasao gadain ar phirthi gadain khe ang nu ba; odehe sagang ni nokhasao ar sagang ni phirthi jamlang la kha, ode sagor bo giri kha. 2Odehe nogor gathar Jerusalem gadain, damanjik basai la mani majang sisi sal khlai blai hi dongba lai ning Madai niha sorgo ni phrang akhai phaiba khe ang nu ba. 3Singhason ni phrang khurang bol jang jirik khao hi edehe thiba khe ang khna ba: Khna lah, Madai ni noh de subung ni bising ha dong pha nang. Bonsi de jar ni subung buthu ja nang, odehe Madai bonsi jang dongpha nang, bonsi ni Madaibo bo ja ma se. 4Bonsi ni muthai ni phrang khrip mudi buthu khebo rusa ri nang, bonsi thih phin nang niya kha. Khah baima ja thing, grayaba ja thing ode gilim gasabo japhin nang niya kha. Jinis gajam buthu de jam lang la kha, thi hi bo sainthi phai ba.
5Singhason ha khamyaba ning, Nai lah, khrip jinis khe ang gadain slam kha dou! bo odehe thi ba. Reb lah, ebo grao buthu de lonma ni grao gibiyaba se, bo odehe thiphin ba. 6Odehe ani ha thi ba, Ebo grao buthu phura ja kha. Ang Alpha ar Omega, ang ning khitha jang buju se. Dih gang jaoyarao si dih ling mani hayu ni dikhor ni phrang ang magna dih ri ma se. 7Bokhe deyaba si de ebo jinis buthu khe don phantha mai nang, boni Madai ang ja nang, bonsibo ani basa ja ma se. 8Khinba raoyaba subung, rege regeyaba, sthaibaiyaba, montro ringyaba, saokhuli khe biyaba, khrip mosol jang thokhibaiyaba ni phantha de waithai ha khamyaba wai ni kharnai se.
Jerusalem gadain
9Odehe bokhoh masni, saja yaohonthao ni masni buthu ha gablai si labuyaba sorgo ni degla sni ni bising ha saosi phai hi, aniha thi ba, Phai, Melmasa ni bisik, damanjik khe ninthane ang phnu nang, bo odehe thiphai ba. 10Bese jang hading dedaothao judaothaoyaba ha bo ang khe sugu hi, sorgo ni Madai ni phrang akhai buyaba nogor gathar Jerusalem khe bo anthane phnu ri ba. 11Nogor de Madai ni muima jang jnathar ba, boni jnayaba ni majangthai gabang ning muilo gnang, Jaspar longthai lai, krustal longthai lai se. 12Boni khorong dedaothao ode judaothao se, derga gedeba majhi gin ja du, derga gedeba buthu ha Israel jadi jhigin ni bumu reb du. 13Sainja gede derga gedeba matham, sain kharthi yaoda gede derga gedeba matham, sain kharthi yaosi gede derga gedeba matham, sain jroba gede derga gedeba matham dong. 14Nogor ni khorongma asama ni longthai gaiyaba majhi gin boni ha dong, bo buthu ha Melmasa ni haijaoyasa jhigin buthu ni bumubo dong.
15Bo ang jang sainlaiyaba sorgo ni degla ning nogor, derga gedeba ode boni khorongma buthu khe su mani khlai hi gajao ni goda di hi bo dong ba. 16Nogor de grongbri ja du, bo laoba jang warba baosi se. Boni gajao ni goda jang nogor khe bonsi su ba. Laoba jakha de mel khonbri ja du, bo laoba warba juba baosi gaja se. 17Bode boni khorongma khebo bonsi su hi, subung suyaba khe yaowai hi, sorgo ni degla ning su ba, muh jang rjasi bisagin mubri lai ju du. 18Khorongma de jaspar longthai jang dangyaba se, nogor derphnai lai ragao du, gajao gathar jang slamyaba se. 19Nogor ni khorongma longthai gaiyaba buthu muilo gnang longthai khrip jadi jang majang riyaba se, bonsi asa ni longthai sagangthao gaiyaba Jaspar longthai se, bo maginyaba sapphir longthai se, bo mathamyaba kalkedon longthai se, bo mabriyaba samaragdin longthai se, 20bo mabowayaba de sardonuk thiyaba longthai se, bo madohyaba de kornelian longthai se, bo masniyaba de kruso longthai se, bo majaiyaba de berul longthai se, bo masguyaba de topaz longthai se, majhiyaba de krusopras longthai se, bo majhisehyaba de jasinth longthai se, bo majhiginyaba de amethus longthai se. 21Derga gedeba majhigin buthu de sugayung longthai jang slamyaba se, derga gedeba maphrong masi masi khlai hi slam ba. Odehe bo nogor ni daoglap de gajao buphangma musi gibringyayaba derphnai lai ragao du. 22Bo nogor hade bikhoh musi ang nuya, Gabra Madai raothai gnang ode Melmasa bonsi ni bikhoh se bani. 23Bo nogor khe jna ri mani khlai hi sain jang dainbo nangya, Gabra ni muima jang bokhe jnapha ri bani, Melmasa de boni thaophari se. 24Boni jnama jang khrip jadi daobai nang, ode phirthi ni rajarao bonsi ni muima jang bonsi labu ma se. 25Sain ha boni derga gedeba buthu nalaibo phrao nang niya, horbo ja nang niya. 26Odehe, jadi buthu bonsi ni muima ode bakhan buthu jang baosi bonsi labu ma se. 27Thikhabo, jinis gusu musibo hap phu nang niya, khusi rege rege dangyarao ar mosol grao joyarao ode thokhi baiyaraobo hap phu nang niya, Melmasa ni hayu ni laisi bajap ha bumu rebjaoyarao se ning hap phu ma.
Currently Selected:
NUJAOYABA 21: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
