NUJAOYABA 20
20
Maithai jang rjing si
1Odehe, sorgo ni phrang sorgo ni degla saosi akhai phaiba khe ang nu ba, bo ning hakhor khithu giriyaba ni chabi jang sikhol gedeba khe labu ba. 2Bo ning dragon, jbu grasa, sgain sogo, soithan khe rem hi, maithai jang rjing si ni khlai hi bokhe kha ba. 3Maithai jang rjing si soyasi jadi buthu khe thokhi phin phuya mani khlai hi, hakhor khithu giriyaba ha dangsing hi bokhe phrao jeb hi lep phung kha.
4Boha singhason khe ang nu ba, oraha khamyarao khrip bo bisar khlai mane hukhum rijaoyarao se. Jisu ni grao khe bonsi mithipha ri bani khlai hi, ode bonsi Madai ni grao ni khlai hi bokhro dainso jaoyarao ni bese buthu khebo ang nu ba. Bu buthu mih rege jang boni saokhuli khe khlimyaba niya, bonsi ni bathain buthu ha, bonsi ni yao buthu habo mih rege ni sin laya. Bonsi thangphin hi Krista jang baosi maithai jang rjing si bonsi sason khlai ba. 5Maithai jang rjing si soya si de, gibin subung githirao baija phinya. Bo se sagangthao baija phin ba se. 6Sagangthao baija phinyaba ha dongphayarao ni khophal hambi. Bonsi ni basao hade thih maginyaba ni hukhum khe bonsi mai nang niya kha. Odehe Madai jang Krista ni jonthairao jahi, bo jang baosi maithai jang rjing si bonsi sason khlai ma.
Soithan khe deba ni grao
7Maithai jang rjing si ni yaohon hade, soithan khe jebyaba ni phrang bonsi haiger kha. 8Odehe, phirthi grongbri ni khrip jadi, Gog ar Magog rao khe thokhi hi, jbah nanglai mani khlai hi bojom khlai ma se; bonsi bangba jakha de sagor ni dergong ha hajeng bangba lai ja du. 9Odehe, bonsi de phirthi grongbri ha dongyarao khe naiding hi gatharrao ni khorongma jang nogor hamdao thaoyaba khe bonsi gajeb ba. Thikhabo sorgo ni phrang wai galai phai hi, bonsi khamthar kha. 10Boha bonsi khe thokhiyaba Soithan, mih rege jang mosol gorasali dongyaba waithai jinghi dongyaba wai ni kharnai ha bonsi khe dangkhla kha, oraha sain hor jug jug saja rijao hi bonsi dukhu rijao ma se.
Yaohonthao ni bisar
11Odehe, singhason jnama dedao thaoyaba odehe boni basao ha khamyaba khe ang nu ba. Boni sagang ni phrang phirthi jang nokhasao khaithar ba, ode bonsi ni khlai hi hathan giri kha. 12Subung githirao, gede, khasi, singhason ni sagang ha kham hi laisi khu hi dongba khe ang nu ba. Odehe laisi bajab gibin, hayu ni laisi bajab khebo khu ba. Subung githirao laisi bajab buthu ha khusi dang ba lai ning bonsi ni balam ha bisar khlaijao kha. 13Sagor de boni bising ha subung githi dongyarao khebo haiger kha. Thihyaba ode subung githi ni noleibo, subung githi dengyaba buthu khebo bonsi haiger hi, khusi dangba lai ning bonsi bisar khlaijao kha. 14Odehe, thihyaba jang subung githi ni nolei khe bonsi wai ni kharnai ha dang sing ba. Ebo wai ni kharnai de thih maginyaba se. 15Sere hayu ni laisi bajap ha bumu giri bokhe wai ni kharnai ha bonsi dang sing ba.
Currently Selected:
NUJAOYABA 20: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
