BAKHAN NI RAJABTHAI 37
37
Hamya jang Hamba subung ni phantha
David ni
1Phaphirao ni khlai hi ning dukhu da nang lah;
Boni hamya khusi khebo da libi.
2Samphang lai jasosi srap srup nang; Sam gakhrang lai bo rainlang la nang.
3 Gabra khe lon hi hamba khusi dang lah; Ebo raji ha ning dong hi suk jang dong lah.
4 Gabra hah khusi jang khaja lah; Bo ninthane nangjaoyaba khe ri nang.
5Ning sum bedehe dongma Gabra-ni basao ha yaopha lah;
Bokhe lon lah, bo ning khrip ningthane dong ri ma se.
6Nini gibi khe sainjer lai jasosi jdan phnu ri nang.
Nini gibi sason khe bo sain lai jasosi ja lang la nang.
7 Gabra ha lenggo lah, Bo khe jon hi ning dong lah,
Srap gnang-jayarao khe da libi, Phaphi khusi dangyarao khebo da libi.
8Thamsi khe da yaowai, thamsi khe haiger lah;
Jar khe jar dukhu da ri lah, niyakha de ning hamya khusi dang ma se.
9Phaphi subungrao de negar khlaijao ma se
Gabra khe jonyarao de raji khe mai ma se.
10Khaisa yaohon ha ning phaphirao de jam lang la ma se,
Bonsi ni dongthan khe smai khabo nu nang niya.
11Subung gasainyarao de raji ni bubra ja ma se
Santi jang khaja hi dong ma se.
12Phaphirao de subung gibiyarao khe galai ri mani khlai hi bao re
Thamsi jang bonsi ni basao ha hathai wai re.
13 Gabra bonsi khe mini ma se
Bonsi srap thima se thi hi mithi la kha.
14Dukhisarao ode suliyayarao khe hamya khlai mane
Phaphi subung jarni seng khe khaikho re
Subung belengyaba khe sthai mane bonsi ni baithuli khe them re.
15Bonsi ni seng jarkhe ning dain la ma
Bonsi ni baithuli bo bailang la ma.
16Phaphi subung niha don gabang dong ba thane
Gibi subung niha don gijisa dongyaba muilo ja dao.
17Phaphirao ni raothai Gabra lang la ma se
Gibirao khe bo dimkhao nang.
18Hamba subungrao khe Gabra naiso du
Boni don jug jug bonsi niha dong ma se.
19Dukhu ni bubli ha bo laji nu nang niya
Asari maithai habo bonsi ni hoh gablai ma.
20Phaphirao de srap jam lang la ma se
Gabra-ni sotrurao bo melma ni buphlam bandai riba ha
Sao ba lai waikhudi ha thang la ma se.
21Phaphirao asaba jao khabo, bonsi suphinya
Hamba subungrao de magna jang ri re.
22Boni hamthai maiyarao de raji bubra ja ma se
Thikhabo, sere sarithai ri jao du, bo de jam la ma se.
23Bonsi thangma ni lama de Gabra sagang ha ning smai ri hi deng kha
Bonsi ni dongthai-jithai ni basao ha bo khaja la re.
24Galai kha bo galai so nang niya
Gabra jini yao khe remsong re.
25Ansa ni phrang raba sosi
Gabra gibi subung khe haigerba thi hi ang tharmaiya kho!
Bonsi ni ansaraobo yao kharang ji du thi hi ang nuya.
26Sainmidi bo magna jang jaoba ri re
Bonsi ni ansarao bo hamthai mai hi ning dong nang.
27Hamya khe haiger hi hamba khusi dang lah
Ebo raji ha dong song lah
Odese, nini sarik-surik bo hamsisi dongba mai nang.
28Gibi jang bisar khlaiyaba khe Gabra hamjao du
Bo khe khinyarao khe bo blaoya;
Nalaibo bonsi khe naiso nang,
Phaphirao ni bongso jam ma se.
29Gibirao de raji ni bubra ja ma se
Jug jug sosibo oraha ning dong ma se.
30Gibi subung ni khuh ha de girikthai ni grao baigo re
Gibi jang bisar khlai re.
31 Gabra-ni dara boni khah ha nalaibo bao hi dong re
Bo dara ni lama ni phrang degaoya.
32Subung hamyayarao de subung gibi khe thim hi jon re
Bede khlai hi sthai mane bao re.
33Thikhabo, subung hamyayarao ni yao ha Gabra riya.
Bisar habo bonsi khe gajai ha hokhlai riya.
34 Gabra khe nalai bo naiso hi dong lah,
Boni lama ha hem lah.
Bo nini bumu sugu nang, ode raji khebo ninthane ri nang.
Phaphirao jamba khebo ning nu nang.
35Phaphirao salaiba khe ang nu kha
Hah hamyaba ni bongphang deba lai se.
36Ang naiphin hiba de, bo giri kha
Ang smaiba de, oraha ang nuiya kha.
37Subung hamyarao ni haiyu khe bao lah
Subung belengyarao khe nai lah,
Sere milima nangjaoyarao de basathai-busuthai mai re,
38Hamya khusi dangyarao de bonsi ni basathai-busuthai khrip jam smai ma se.
Bongphang boso phai ba lai jam ma se.
39Subung gibirao khe de Gabra sogo re
Dukhu jasaiba ha bo bonsi ni khorong se.
40 Gabra bonsi khe juru hi sogo re,
Phaphirao ni phrang dimkhao hi boni ha phaiyarao khe sogo re.
Currently Selected:
BAKHAN NI RAJABTHAI 37: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
