BAKHAN NI RAJABTHAI 35
35
Juru mane Bithai
David ni
1 Gabra, ang jang nanglaiyarao nanglai lah
Ang jang jbah jayarao jang, jbah ja lah.
2Nini phi khe di hi, nini khajab ni phi khe pha hi,
Ang khe juru mane bol jang ri pha phai.
3Nini jong khe sugu lah, nini seng khebo saikho lah,
Ang khe riksaiyarao khe mathao lah,
Ning khe sogo nang thi hi grao hanggai lah.
4Ang khe sthaima baoyarao laji nu thing
Ang khe hamya baoyarao khin hi khailang la thing,
Ode khah gmang-giji ja thing.
5Bar jang maijibu khe sipkhao ba lai jasosi
Gabra-ni deglarao bonsi khe sipkhao thing.
6Andar bising ha lama milinyaba ha Gabra-ni deglarao bonsi khe rikhlai thing.
7Balam giri hi bonsi ang khe sagai mane jeh makhao sa du,
Ang galaising mane hakhor khu du.
8Bonsi mithiyasa ni bonsi ni basao ha hamya ja thing,
Bonsi ni dukhon ha bonsi jar nang la thing.
Bonsi ni hakhor khuyaba ha bonsi galaising thing.
9 Gabra ha ang khaja la ma
Ang khe sogo bani khlai hi ang gabang ning khaja la nang.
10Ani khah jang Gabra niha thi nang
Gabra, ning lai sere dong?
Ning de dukhi sarao khe boni basao ha dongyarao ni phrang bonsi khe juru la du.
Suliya mathisa sejaoyaba ni phrang bo ning dimkhao la du.
11Mosol sakhi joyarao phai du,
Ang mithiyayaba khe bo niya hi mosol hokhlai du.
12Ani hamba khusi ni baslai ha bonsi hamya khlai du,
Ang gmang-giji ja kha.
13Bonsi limba ha ang dukhu jang bosta phin du
Hoh khongja jahi ang bonsi jang dukhu ja pha du.
Ang yasgu thu hi Madai niha bi ri du.
14Jarni lugurao ni khlai hi dukhu ja pha du,
Olei ning bonsi ni khlai hi ang dukhu khlai du,
Jarni buma thihba ha dukhu jaba lai ning
Bonsi ni khlai hi ang dukhu jang gonggalai du.
15Thikhabo, ang galai hi dongba ha de bonsi khaja hi githim du,
Ang khe dukhu rima ni khlai hi, ang tharmaiyayarao bo githim lai du,
Ang khe dukhu ri mane bonsi jamdaoya.
16Madai khe mithiyarao lai, bonsi ang khe hathai wai hi minithai du.
17 Gabra, bislei sosi ang khe ede ning nai hi dong ma kho?
Ang khe hamya khlaiyarao ni bising ni phrang sogo lah,
Ebo misiraigonma buthu ni phrang ang khe sogo lah.
18Gabang subung githimyarao ni bising ha ang ning khe khajama ni grao khe sainthi hi,
Githimyarao ni gejer ha ning khe bakhan khlai nang.
19Jaya hi sotru jayarao ani basao ha da khaja thing
Balam giri hi ang khe jajaoyayarao ani basao ha da khaja thing.
20Asaba khali lugu lai ang jang sainlaiya,
Jarni rajirao bo thokhima ni se ning bao ba.
21Ang jang nanglai mani khlai hi, bonsi ni khuh khuru du,
Jini muthai jang ning nu la kha thi hi bonsi thi du.
22 Gabra, ning de nu la du, odebani phirik phirik da dong
Gabra, ang jang gajain da dong.
23Baija lah, ang khe sogo mane ripha phai lah,
Gabra, ani Madai, ang khe dimkhao lah.
24 Gabra Madai, nini gibi khe phnu mane
Ani khlai hi bisar khlai lah.
Bonsi khe ani basao ha khajama da ri.
25Jing bao ba lai sophai kha dou! thi hi bonsi ni khah ha da bao thing,
Jing molo thar kha thi! thi hi, ode bo bonsi da thi thing.
26Ani dukhu ha sere khaja du, bonsi laji hi mukhang sim thing,
Ani basao ha sanggayarao, khrip bo laji hi gonggalai mai thing.
27Ani gibi khe khajayarao de gabang ning khaja la thing
Boni dangyasa phantha hamba riyaba
Gabra de muima ja thing thi hi bonsi thi la thing.
28Odese, nini gibi khe ang sainthi nang,
Sainsong ning khe ang bakhan khlai nang.
Currently Selected:
BAKHAN NI RAJABTHAI 35: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
