BAKHAN NI RAJABTHAI 22
22
Gmang-giji ni khurang ode bakhan ni rajabthai
Rajab hoja ni khlai hi. Aijeleth Hash-Shahar birili jang rajab ma. David ni bakhan ni rajabthai.
1O ani Madai, ani Madai, snadi jabani ang khe haiger ba?
Ang juruma sainba ha, ning snadi jabani gajain dong ba?
2Ani Madai khe ang sain ha long du, bo ang khe grao thiphinya,
Hor ja lang la du, ang phirik phirik dongphuya.
3Ning de gathar se, Raja ni khamthan ha kham hi dongyaba
Israel sarao bakhan riyaba ning khe se.
4Jini phagrarao ning khe lon du,
Bonsi lonba ni khlai hi ning sogo ba.
5Bonsi ning khe long du, bonsi khe ning dimkhao du
Nini ha bonsi khah de la du, ning bonsi khe sogo la du.
6Ang de khainsu rima lai se, subung thijaoma ne bo gathaya
Malai bo ang khe malaothai du, ode minithai du.
7Sere ang khe nu re, malaothai re,
Bonsi bokhro thingkhrai hi slai phnu re.
8Madai niha bo jar khe riyaba se, Madai juru thing,
Bokhe de Madai nangjaoyaba se, Madai sogo thing thi hi bonsi thi ba.
9Ning de buma ni sathip ni phrang hajai riyaba se
Buma ni abu ni phrang khrangyaba ning se.
10Hajaiba ni phrang ang nini basao ha asa deng du
Amai ni hoh ha dongba ha ning ani Madai ning se.
11Sotrurao sampha phai du, ang jang gajain ning da dong
Saosi bo ang khe juruyaba giri.
12Musu jla gathang lai ang khe gading du
Basan ni musu jla raoyaba lai ang khe gading du.
13Raigonma khinthaothao ho ba lai ang khe ho ba.
14Ang de dih galaiba lai ja kha
Ani begreng jora bo geble kha,
Ani khah bo breslai khe sep ba lai ja kha.
15Ani bol bo hah ni dihu grip ba lai rainthar kha
Ani slai bo sadap kha,
Githi lai ning hah ha bonsi thu ri kha.
16Sisa lai ning ang khe gading kha
Hamya subung buthu ang khe gajeb kha,
Yao jang igah khebo jaophla kha.
17Ani begreng khebo ang sain phu du
Bonsi de ang khe naithai nai du.
18Ani gainsari khebo bonsi ron lai la kha
Ani sola ni khlai hi bonsi sma nai du.
19 Gabra, ang jang gajain da dong
O ang khe juruyaba, srap gebre lah.
20Seng ni phrang ang khe dimkhao lah
Bo sisa buthu ni phrang ang khe sogo lah.
21Raigonma ni bukhuh ni phrang ang khe sogo lah
Mithang ni bogrong ni gejer ni phrang ang khe khaikho lah.
22Odese, daphlungrao niha nini bumu khe ang sainthi ma
Githimyarao ni gejer ha ning khe ang bakhan ri ma.
23 Gabra khe khinyarao, bokhe bakhan khlai lah
Jakob ni sarik-surik, boni bumu khe sugu lah.
Israel ni basa-bisik, boni rogong ha yasgu thu hi khlim lah.
24Dukhisarao khe bo basasa naiya, ode regejaoya,
Bonsi juruma sain kha de bo khna du ode bonsi khe mukhang phinya.
25Gabang githim laiyarao ni gejer ha nini bumu khe ang sugu nang
Ning khe khinyarao ni sangang ha, ang hanggaiyaba grao khe sothar ri nang.
26Dukhisarao hoh gablai si mai ji thing
Gabra khe smaiyarao bokhe bakhan khlai la thing
Thaoglao jang bonsi ni khah khe smao hi dong thing.
27Khrip mulug ni subung bo Gabra khe mithi nang,
Ode, boni ha khrip jadi bo thangphin ma.
28 Gabra de dedao thaoyaba Raja se
Khrip jadi ni basao ha bisar khlai du.
29Pirthi ni gnangrao boni rogong ha yasgu thu hi khlim nang
Dukhu jang haduri jayarao bo boni sagang ha yasgu thu hi khlim ma.
30Jalairao boni khusi khe dang ma
Boni sasikrao niha bo Gabra-ni grao khe sainthi pha lang ma.
31 Gabra jarni subung khe sogo du thi hi hajai ginyarao khe bo sainthi pha lang ma.
Currently Selected:
BAKHAN NI RAJABTHAI 22: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
